By the flying roll is shewed the curse of thieves and swearers.
Zechariah 5:1 And Y was conuertid, and reiside myn iyen, and siy, and lo! a book fleynge. Zechariah 5:2 And he seide to me, What seest thou? And Y seide, Lo! Y se a book fleynge; the lengthe therof was of twenti cubitis, and the breede therof of ten cubitis. Zechariah 5:3 And he seide to me, This is the curs, that goith on the face of al erthe; for ech theef schal be demed, as it is writun there; and ech man swerynge, schal be demyd of this also. Zechariah 5:4 Y schal lede out it, seith the Lord of oostis, and it schal come to the hous of a theef, and to the hous of hym that swerith falsli in my name; and it schal dwelle in myddil of hys hous, and schal waaste hym, and hise trees, and hise stoonys.
By a woman pressed in an ephah, the final damnation of Babylon.
Zechariah 5:5 And the aungel wente out, that spak in me, and seide to me, Reyse thin iyen, and se, what this thing is, that goith out. Zechariah 5:6 And Y seide, What is it? And he seide, This is a pot goyng out. And he seide, This is the iye of hem in al erthe. Zechariah 5:7 And lo! a talent of leed was borun; and lo! a womman sittynge in myddil of the pot. Zechariah 5:8 And he seide, This is vnpite, ether vnfeithfulnesse. And he castide doun hir in myddil of the pot, and sente a gobet of leed in to the mouth therof. Zechariah 5:9 And Y reiside myn iyen, and siy, and lo! twei wymmen goynge out, and a spirit in wyngis of hem; and thei hadden wyngis as wyngis of a kite, and reisiden the pot bitwixe heuene and erthe. Zechariah 5:10 And Y seide to the aungel that spak in me, Whidur beren these the pot? Zechariah 5:11 And he seide to me, That an hous be bildid therto in the lond of Sennaar, and be stablischid, and set there on his foundement.