Psalms 79
The psalmist complaineth of the desolation of Jerusalem.
Psalms 79:1 {The title of the eiyte and seuentithe salm. Of Asaph.} God, hethene men cam in to thin eritage; thei defouliden thin hooli temple, thei settiden Jerusalem in to the keping of applis. Psalms 79:2 Thei settiden the slayn bodies of thi seruauntis, meetis to the volatilis of heuenes; the fleischis of thi seyntis to the beestis of the erthe. Psalms 79:3 Thei schedden out the blood of hem, as watir in the cumpas of Jerusalem; and noon was that biriede. Psalms 79:4 We ben maad schenschipe to oure neiyboris; mowynge and scornynge to hem, that ben in oure cumpas. Psalms 79:5 Lord, hou longe schalt thou be wrooth in to the ende? schal thi veniaunce be kyndelid as fier? Psalms 79:6 Schede out thin ire in to hethene men, that knowen not thee; and in to rewmes, that clepiden not thi name. Psalms 79:7 For thei eeten Jacob; and maden desolat his place.
He prayeth for deliverance,
Psalms 79:8 Haue thou not mynde on oure elde wickidnesses; thi mercies bifore take vs soone, for we ben maad pore greetli. Psalms 79:9 God, oure heelthe, helpe thou vs, and, Lord, for the glorie of thi name delyuer thou vs; and be thou merciful to oure synnes for thi name. Psalms 79:10 Lest perauenture thei seie among hethene men, Where is the God of hem? and be he knowun among naciouns bifore oure iyen. The veniaunce of the blood of thi seruauntis, which is sched out; the weilyng of feterid men entre in thi siyt. Psalms 79:11 Vpe the greetnesse of thin arm; welde thou the sones of slayn men. Psalms 79:12 And yelde thou to oure neiyboris seuenfoold in the bosum of hem; the schenschip of hem, which thei diden schenschipfuli to thee, thou Lord.
and promiseth thankfulness.
Psalms 79:13 But we that ben thi puple, and the scheep of thi leesewe; schulen knouleche to thee in to the world. In generacioun and in to generacioun; we schulen telle thin heriyng.
|
