Psalms 41
God's care for the poor.
Psalms 41:1 {The title of the fourtithe salm. For victorie, the song of Dauid.} Blessid is he that vndurstondith on a nedi man and pore; the Lord schal delyuere hym in the yuel dai. Psalms 41:2 The Lord kepe hym, and quykene hym, and make hym blesful in the lond; and bitake not hym in to the wille of his enemyes. Psalms 41:3 The Lord bere help to hym on the bed of his sorewe; thou hast ofte turned al his bed stre in his sijknesse.
David complaineth of his enemies' treachery.
Psalms 41:4 I seide, Lord, haue thou mercy on me; heele thou my soule, for Y synnede ayens thee. Psalms 41:5 Myn enemyes seiden yuels to me; Whanne schal he die, and his name schal perische? Psalms 41:6 And if he entride for to se, he spak veyn thingis; his herte gaderide wickidnesse to hym silf. Psalms 41:7 He yede with out forth; and spak to the same thing. Alle myn enemyes bacbitiden pryuyli ayens me; ayens me thei thouyten yuels to me. Psalms 41:8 Thei ordeineden an yuel word ayens me; Whether he that slepith, schal not leie to, that he rise ayen? Psalms 41:9 For whi the man of my pees, in whom Y hopide, he that eet my looues; made greet disseit on me.
He fleeth to God for succour.
Psalms 41:10 But thou, Lord, haue merci on me, and reise me ayen; and Y schal yelde to hem. Psalms 41:11 In this thing Y knew, that thou woldist me; for myn enemye schal not haue ioye on me. Psalms 41:12 Forsothe thou hast take me vp for ynnocence; and hast confermed me in thi siyt with outen ende. Psalms 41:13 Blessid be the Lord God of Israel, fro the world and in to the world; be it doon, be it doon.
|
