Wycliffe Bible

Psalms 37

David persuadeth to patience and confidence in God, by the different estate of the godly and the wicked.

Psalms 37:1 {The title of the sixe and thrittithe salm. To Dauith.} Nile thou sue wickid men; nether loue thou men doynge wickidnesse. Psalms 37:2 For thei schulen wexe drie swiftli as hey; and thei schulen falle doun soone as the wortis of eerbis. Psalms 37:3 Hope thou in the Lord, and do thou goodnesse; and enhabite thou the lond, and thou schalt be fed with hise richessis. Psalms 37:4 Delite thou in the Lord; and he schal yyue to thee the axyngis of thin herte. Psalms 37:5 Schewe thi weie to the Lord; and hope thou in hym, and he schal do. Psalms 37:6 And he schal lede out thi riytfulnesse as liyt, and thi doom as myddai; Psalms 37:7 be thou suget to the Lord, and preye thou hym. Nile thou sue hym, that hath prosperite in his weie; a man doynge vnriytfulnessis. Psalms 37:8 Ceese thou of ire, and forsake woodnesse; nyle thou sue, that thou do wickidli. Psalms 37:9 For thei, that doen wickidli, schulen be distried; but thei that suffren the Lord, schulen enerite the lond. Psalms 37:10 And yit a litil, and a synnere schal not be; and thou schalt seke his place, and schalt not fynde. Psalms 37:11 But mylde men schulen enerite the lond; and schulen delite in the multitude of pees. Psalms 37:12 A synnere schal aspie a riytful man; and he schal gnaste with hise teeth on hym. Psalms 37:13 But the Lord schal scorne the synnere; for he biholdith that his day cometh. Psalms 37:14 Synners drowen out swerd; thei benten her bouwe. To disseyue a pore man and nedi; to strangle riytful men of herte. Psalms 37:15 Her swerd entre in to the herte of hem silf; and her bouwe be brokun. Psalms 37:16 Betere is a litil thing to a iust man; than many richessis of synneris. Psalms 37:17 For the armes of synneris schal be al to-brokun; but the Lord confermeth iust men. Psalms 37:18 The Lord knowith the daies of vnwemmed; and her heritage schal be withouten ende. Psalms 37:19 Thei schulen not be schent in the yuel tyme, and thei schulen be fillid in the dayes of hungur; Psalms 37:20 for synneris schulen perische. Forsothe anoon as the enemyes of the Lord ben onourid, and enhaunsid; thei failynge schulen faile as smoke. Psalms 37:21 A synnere schal borewe, and schal not paie; but a iust man hath merci, and schal yyue. Psalms 37:22 For thei that blessen the Lord schulen enerite the lond; but thei that cursen hym schulen perische. Psalms 37:23 The goyng of a man schal be dressid anentis the Lord; and he schal wilne his weie. Psalms 37:24 Whanne he fallith, he schal not be hurtlid doun; for the Lord vndursettith his hond. Psalms 37:25 I was yongere, and sotheli Y wexide eld, and Y siy not a iust man forsakun; nethir his seed sekynge breed. Psalms 37:26 Al dai he hath merci, and leeneth; and his seed schal be in blessyng. Psalms 37:27 Bouwe thou awei fro yuel, and do good; and dwelle thou in to the world of world. Psalms 37:28 For the Lord loueth doom, and schal not forsake hise seyntis; thei schulen be kept with outen ende. Vniust men schulen be punyschid; and the seed of wickid men schal perische. Psalms 37:29 But iust men schulen enerite the lond; and schulen enabite theronne in to the world of world. Psalms 37:30 The mouth of a iust man schal bithenke wisdom; and his tunge schal speke doom. Psalms 37:31 The lawe of his God is in his herte; and hise steppis schulen not be disseyued. Psalms 37:32 A synnere biholdith a iust man; and sekith to sle hym. Psalms 37:33 But the Lord schal not forsake hym in hise hondis; nethir schal dampne hym, whanne it schal be demed ayens hym. Psalms 37:34 Abide thou the Lord, and kepe thou his weie, and he schal enhaunse thee, that bi eritage thou take the lond; whanne synneris schulen perische, thou schalt se. Psalms 37:35 I siy a wickid man enhaunsid aboue; and reisid vp as the cedris of Liban. Psalms 37:36 And Y passide, and lo! he was not; Y souyte hym, and his place is not foundun. Psalms 37:37 Kepe thou innocence, and se equite; for tho ben relikis to a pesible man. Psalms 37:38 Forsothe vniust men schulen perische; the relifs of wickid men schulen perische togidere. Psalms 37:39 But the helthe of iust men is of the Lord; and he is her defendere in the tyme of tribulacioun. Psalms 37:40 And the Lord schal helpe hem, and schal make hem fre, and he schal delyuere hem fro synneris; and he schal saue hem, for thei hopiden in hym.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook