Psalms 2
The Kingdom of Christ.
Psalms 2:1 Whi gnastiden with teeth hethene men; and puplis thouyten veyn thingis? Psalms 2:2 The kyngis of erthe stoden togidere; and princes camen togidere ayens the Lord, and ayens his Crist? Psalms 2:3 Breke we the bondis of hem; and cast we awei the yok of hem fro vs. Psalms 2:4 He that dwellith in heuenes schal scorne hem; and the Lord schal bimowe hem. Psalms 2:5 Thanne he schal speke to hem in his ire; and he schal disturble hem in his stronge veniaunce. Psalms 2:6 Forsothe Y am maad of hym a kyng on Syon, his hooli hil; prechynge his comaundement. Psalms 2:7 The Lord seide to me, Thou art my sone; Y haue gendrid thee to dai. Psalms 2:8 Axe thou of me, and Y schal yyue to thee hethene men thin eritage; and thi possessioun the termes of erthe. Psalms 2:9 Thou schalt gouerne hem in an yrun yerde; and thou schalt breke hem as the vessel of a pottere.
Kings are exhorted to accept it.
Psalms 2:10 And now, ye kyngis, vndurstonde; ye that demen the erthe, be lerud. Psalms 2:11 Serue ye the Lord with drede; and make ye ful ioye to hym with tremblyng. Psalms 2:12 Take ye lore; lest the Lord be wrooth sumtyme, and lest ye perischen fro iust waie. Whanne his ire brenneth out in schort tyme; blessed ben alle thei, that tristen in hym.
|
