Wycliffe Bible

Psalms 18

David praiseth God for his manifold and marvellous blessings.

Psalms 18:1 {The title of the seuenetenthe salm. To victorie, the word of the Lord to Dauid; which spak the wordis of this song, in the dai in which the Lord delyuerede hym fro the hond of alle hise enemyes, and fro the hond of Saul; and he seide:} Lord, my strengthe, Y schal loue thee; Psalms 18:2 the Lord is my stidfastnesse, and my refuyt, and mi deliuerere. Mi God is myn helpere; and Y schal hope in to hym. My defendere, and the horn of myn helthe; and myn vptakere. Psalms 18:3 I schal preise, and ynwardli clepe the Lord; and Y schal be saaf fro myn enemyes. Psalms 18:4 The sorewis of deth cumpassiden me; and the strondis of wickidnesse disturbliden me. Psalms 18:5 The sorewis of helle cumpassiden me; the snaris of deeth bifor ocupieden me. Psalms 18:6 In my tribulacioun Y inwardli clepide the Lord; and Y criede to my God. And he herde my vois fro his hooli temple; and my cry in his siyt entride in to hise eeris. Psalms 18:7 The erthe was mouede togidere, and tremblede togidere; the foundementis of hillis weren troblid togidere, and weren moued togidere; for he was wrooth to hem. Psalms 18:8 Smoke stiede in the ire of hym, and fier brente out fro his face; coolis weren kyndlid of hym. Psalms 18:9 He bowide doun heuenes, and cam doun; and derknesse was vndur hise feet. Psalms 18:10 And he stiede on cherubym, and flei; he fley ouer the pennes of wyndis. Psalms 18:11 And he settide derknesses his hidyng place, his tabernacle in his cumpas; derk water was in the cloudes of the lowere eir. Psalms 18:12 Ful cleer cloudis passiden in his siyt; hail and the coolis of fier. Psalms 18:13 And the Lord thundrid fro heuene; and the hiyeste yaf his vois, hail and the coolis of fier camen doun. Psalms 18:14 And he sente hise arowis, and distriede tho men; he multipliede leytis, and disturblide tho men. Psalms 18:15 And the wellis of watris apperiden; and the foundementis of the erthe weren schewid. Lord, of thi blamyng; of the brething of the spirit of thin ire. Psalms 18:16 He sente fro the hiyeste place, and took me; and he took me fro many watris. Psalms 18:17 He delyuerede me fro my strongeste enemyes; and fro hem that hatiden me, fro thei weren coumfortid on me. Psalms 18:18 Thei camen bifor me in the dai of my turment; and the Lord was maad my defendere. Psalms 18:19 And he ledde out me in to breede; he maad me saaf, for he wolde me. Psalms 18:20 And the Lord schal yelde to me bi my riytfulnesse; and he schal yelde to me bi the clennesse of myn hondis. Psalms 18:21 For Y kepte the weies of the Lord; and Y dide not vnfeithfuli fro my God. Psalms 18:22 For alle hise domes ben in my siyt; and Y puttide not awei fro me hise riytfulnessis. Psalms 18:23 And Y schal be vnwemmed with hym; and Y schal kepe me fro my wickidnesse. Psalms 18:24 And the Lord schal yelde to me bi my riytfulnesse; and bi the clennesse of myn hondis in the siyt of hise iyen. Psalms 18:25 With the hooli, thou schalt be hooli; and with a man innocent, thou schalt be innocent. Psalms 18:26 And with a chosun man, thou schalt be chosun; and with a weiward man, thou schalt be weiward. Psalms 18:27 For thou schalt make saaf a meke puple; and thou schalt make meke the iyen of proude men. Psalms 18:28 For thou, Lord, liytnest my lanterne; my God, liytne thou my derknessis. Psalms 18:29 For bi thee Y schal be delyuered fro temptacioun; and in my God Y schal go ouer the wal. Psalms 18:30 Mi God, his weie is vndefoulid, the speches of the Lord ben examyned bi fier; he is defendere of alle men hopynge in hym. Psalms 18:31 For whi, who is God out takun the Lord? ethir who is God outakun oure God? Psalms 18:32 God that hath gird me with vertu; and hath set my weie vnwemmed. Psalms 18:33 Which made perfit my feet as of hertis; and ordeynynge me on hiye thingis. Psalms 18:34 Which techith myn hondis to batel; and thou hast set myn armys as a brasun bouwe. Psalms 18:35 And thou hast youe to me the kyueryng of thin helthe; and thi riythond hath vptake me. And thi chastisyng amendide me in to the ende; and thilke chastisyng of thee schal teche me. Psalms 18:36 Thou alargidist my paaces vndur me; and my steppis ben not maad vnstidefast. Psalms 18:37 Y schal pursue myn enemyes, and Y schal take hem; and Y schal not turne til thei failen. Psalms 18:38 I schal al to-breke hem, and thei schulen not mowe stonde; thei schulen falle vndur my feet. Psalms 18:39 And thou hast gird me with vertu to batel; and thou hast supplauntid, ether disseyued, vndur me men risynge ayens me. Psalms 18:40 And thou hast youe myn enemyes abac to me; and thou hast distried men hatynge me. Psalms 18:41 Thei crieden, and noon was that maad hem saaf; thei crieden to the Lord, and he herde not hem. Psalms 18:42 And Y schal al to-breke hem, as dust bifor the face of wynd; Y schal do hem awei, as the cley of stretis. Psalms 18:43 Thou schalt delyuere me fro ayenseiyngis of the puple; thou schalt sette me in to the heed of folkis. Psalms 18:44 The puple, which Y knewe not, seruede me; in the herynge of eere it obeiede to me. Psalms 18:45 Alien sones lieden to me, alien sones wexiden elde; and crokiden fro thi pathis. Psalms 18:46 The Lord lyueth, and my God be blessid; and the God of myn helthe be enhaunsid. Psalms 18:47 God, that yauest veniaunces to me, and makist suget puplis vndur me; my delyuerere fro my wrathful enemyes. Psalms 18:48 And thou schalt enhaunse me fro hem, that risen ayens me; thou schalt delyuere me fro a wickid man. Psalms 18:49 Therfor, Lord, Y schal knouleche to thee among naciouns; and Y schal seie salm to thi name. Psalms 18:50 Magnyfiynge the helthis of his kyng; and doynge merci to his crist Dauid, and to his seed til in to the world.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook