Wycliffe Bible

Psalms 105

An exhortation to praise God, and to seek out his works.

Psalms 105:1 {The title of the hundrid and fourthe salm. Alleluya.} Knouleche ye to the Lord, and inwardli clepe ye his name; telle ye hise werkis among hethen men. Psalms 105:2 Synge ye to hym, and seie ye salm to him, and telle ye alle hise merueylis; Psalms 105:3 be ye preisid in his hooli name. The herte of men sekynge the Lord be glad; Psalms 105:4 seke ye the Lord, and be ye confermed; seke ye euere his face. Psalms 105:5 Haue ye mynde on hise merueilis, whiche he dide; on his grete wondris, and domes of his mouth. Psalms 105:6 The seed of Abraham, his seruaunt; the sones of Jacob, his chosun man.

The story of God's providence over Abraham,

Psalms 105:7 He is oure Lord God; hise domes ben in al the erthe. Psalms 105:8 He was myndeful of his testament in to the world; of the word which he comaundide in to a thousynde generaciouns. Psalms 105:9 Which he disposide to Abraham; and of his ooth to Isaac. Psalms 105:10 And he ordeynede it to Jacob in to a comaundement; and to Israel in to euerlastinge testament. Psalms 105:11 And he seide, I shal yiue to thee the lond of Canaan; the cord of youre eritage. Psalms 105:12 Whanne thei weren in a litil noumbre; and the comelingis of hem weren ful fewe. Psalms 105:13 And thei passiden fro folk in to folk; and fro a rewme in to another puple. Psalms 105:14 He lefte not a man to anoye hem; and he chastiside kyngis for hem. Psalms 105:15 Nile ye touche my cristis; and nyle ye do wickidli among my prophetis.

over Joseph,

Psalms 105:16 And God clepide hungir on erthe; and he wastide al the stidefastnesse of breed. Psalms 105:17 He sente a man bifore hem; Joseph was seeld in to a seruaunt. Psalms 105:18 Thei maden lowe hise feet in stockis, irun passide by his soule; Psalms 105:19 til the word of him cam. The speche of the Lord enflawmede him; Psalms 105:20 the king sente and vnbond hym; the prince of puplis sente and delyuerede him. Psalms 105:21 He ordeynede him the lord of his hous; and the prince of al his possessioun. Psalms 105:22 That he schulde lerne hise princis as him silf; and that he schulde teche hise elde men prudence.

over Jacob in Egypt,

Psalms 105:23 And Israel entride in to Egipt; and Jacob was a comeling in the lond of Cham. Psalms 105:24 And God encreesside his puple greetli; and made hym stidefast on hise enemyes. Psalms 105:25 He turnede the herte of hem, that thei hatiden his puple; and diden gile ayens hise seruauntis.

over Moses delivering the Israelites,

Psalms 105:26 He sent Moises, his seruaunt; thilke Aaron, whom he chees. Psalms 105:27 He puttide in hem the wordis of hise myraclis; and of hise grete wondris in the lond of Cham. Psalms 105:28 He sente derknessis, and made derk; and he made not bitter hise wordis. Psalms 105:29 He turnede the watris of hem in to blood; and he killide the fischis of hem. Psalms 105:30 And the lond of hem yaf paddoks; in the priue places of the kyngis of hem. Psalms 105:31 God seide, and a fleische flie cam; and gnattis in alle the coostis of hem. Psalms 105:32 He settide her reynes hail; fier brennynge in the lond of hem. Psalms 105:33 And he smoot the vynes of hem, and the fige trees of hem; and al to-brak the tree of the coostis of hem. Psalms 105:34 He seide, and a locuste cam; and a bruk of which was noon noumbre. Psalms 105:35 And it eet al the hey in the lond of hem; and it eet al the fruyt of the lond of hem. Psalms 105:36 And he killide ech the firste gendrid thing in the lond of hem; the firste fruitis of alle the trauel of hem.

over the Israelites brought out of Egypt, fed in the wilderness, and planted in Canaan.

Psalms 105:37 And he ledde out hem with siluer and gold; and noon was sijk in the lynagis of hem. Psalms 105:38 Egipt was glad in the goyng forth of hem; for the drede of hem lai on Egipcians. Psalms 105:39 He spredde abrood a cloude, in to the hiling of hem; and fier, that it schynede to hem bi nyyt. Psalms 105:40 Thei axiden, and a curlew cam; and he fillide hem with the breed of heuene. Psalms 105:41 He brak a stoon, and watris flowiden; floodis yeden forth in the drye place. Psalms 105:42 For he was myndeful of his hooli word; which he hadde to Abraham, his child. Psalms 105:43 And he ledde out his puple in ful out ioiyng; and hise chosun men in gladnesse. Psalms 105:44 And he yaf to hem the cuntreis of hethen men; and thei hadden in possessioun the trauels of puplis. Psalms 105:45 That thei kepe hise iustifiyngis; and seke his lawe.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook