Proverbs 6:1 Mi sone, if thou hast bihiyt for thi freend; thou hast fastned thin hoond at a straunger. Proverbs 6:2 Thou art boundun bi the wordis of thi mouth; and thou art takun with thin owne wordis. Proverbs 6:3 Therfor, my sone, do thou that that Y seie, and delyuere thi silf; for thou hast fallun in to the hond of thi neiybore. Renne thou aboute, haste thou, reise thi freend; Proverbs 6:4 yyue thou not sleep to thin iyen, nether thin iyeliddis nappe. Proverbs 6:5 Be thou rauyschid as a doo fro the hond; and as a bridde fro aspiyngis of the foulere.
Proverbs 6:6 O! thou slowe man, go to the amte, ether pissemyre; and biholde thou hise weies, and lerne thou wisdom. Proverbs 6:7 Which whanne he hath no duyk, nethir comaundour, nether prince; Proverbs 6:8 makith redi in somer mete to hym silf, and gaderith togidere in heruest that, that he schal ete. Proverbs 6:9 Hou long schalt thou, slow man, slepe? whanne schalt thou rise fro thi sleep? Proverbs 6:10 A litil thou schalt slepe, a litil thou schalt nappe; a litil thou schalt ioyne togidere thin hondis, that thou slepe. Proverbs 6:11 And nedynesse, as a weigoere, schal come to thee; and pouert, as an armed man. Forsothe if thou art not slow, thi ripe corn schal come as a welle; and nedynesse schal fle fer fro thee.
Proverbs 6:12 A man apostata, a man vnprofitable, he goith with a weiward mouth; Proverbs 6:13 he bekeneth with iyen, he trampith with the foot, he spekith with the fyngur, Proverbs 6:14 bi schrewid herte he ymagyneth yuel, and in al tyme he sowith dissenciouns. Proverbs 6:15 His perdicioun schal come to hym anoon, and he schal be brokun sodeynli; and he schal no more haue medecyn.
Seven things hateful to God.
Proverbs 6:16 Sixe thingis ben, whyche the Lord hatith; and hise soule cursith the seuenthe thing. Proverbs 6:17 Hiye iyen, a tunge liere, hondis schedinge out innocent blood, Proverbs 6:18 an herte ymagynynge worste thouytis, feet swifte to renne in to yuel, Proverbs 6:19 a man bringynge forth lesingis, a fals witnesse; and him that sowith discordis among britheren.
The blessings of obedience.
Proverbs 6:20 Mi sone, kepe the comaundementis of thi fadir; and forsake not the lawe of thi modir. Proverbs 6:21 Bynde thou tho continueli in thin herte; and cumpasse to thi throte. Proverbs 6:22 Whanne thou goist, go tho with thee; whanne thou slepist, kepe tho thee; and thou wakynge speke with tho. Proverbs 6:23 For the comaundement of God is a lanterne, and the lawe is liyt, and the blamyng of techyng is the weie of lijf; Proverbs 6:24 that the comaundementis kepe thee fro an yuel womman, and fro a flaterynge tunge of a straunge womman.
The mischiefs of whoredom.
Proverbs 6:25 Thin herte coueite not the fairnesse of hir; nether be thou takun bi the signes of hir. Proverbs 6:26 For the prijs of an hoore is vnnethe of o loof; but a womman takith the preciouse soule of a man. Proverbs 6:27 Whether a man mai hide fier in his bosum, that hise clothis brenne not; Proverbs 6:28 ethir go on colis, and hise feet be not brent? Proverbs 6:29 So he that entrith to the wijf of his neiybore; schal not be cleene, whanne he hath touchid hir. Proverbs 6:30 It is not greet synne, whanne a man stelith; for he stelith to fille an hungri soule. Proverbs 6:31 And he takun schal yelde the seuenthe fold; and he schal yyue al the catel of his hous, and schal delyuere hym silf. Proverbs 6:32 But he that is avouter; schal leese his soule, for the pouert of herte. Proverbs 6:33 He gaderith filthe, and sclaundrith to hym silf; and his schenschip schal not be don awei. Proverbs 6:34 For the feruent loue and strong veniaunce of the man schal not spare in the dai of veniaunce, Proverbs 6:35 nether schal assente to the preieris of ony; nether schal take ful many yiftis for raunsum.