Agur's confession of faith.
Proverbs 30:1 The wordis of hym that gaderith, of the sone spuynge. The prophesie which a man spak, with whom God was, and which man was coumfortid bi God dwellyng with hym, and seide, Proverbs 30:2 Y am the moost fool of men; and the wisdom of men is not with me. Proverbs 30:3 Y lernede not wisdom; and Y knew not the kunnyng of hooli men. Proverbs 30:4 Who stiede in to heuene, and cam doun? Who helde togidere the spirit in hise hondis? who bonde togidere watris as in a cloth? Who reiside alle the endis of erthe? What is name of hym? and what is the name of his sone, if thou knowist? Proverbs 30:5 Ech word of God is a scheld set a fiere, to alle that hopen in hym. Proverbs 30:6 Adde thou not ony thing to the wordis of hym, and thou be repreued, and be foundun a liere.
The two points of his prayer.
Proverbs 30:7 I preiede thee twei thingis; denye not thou to me, bifor that Y die. Proverbs 30:8 Make thou fer fro me vanyte and wordis of leesyng; yyue thou not to me beggery and richessis; yyue thou oneli necessaries to my lijflode; Proverbs 30:9 lest perauenture Y be fillid, and be drawun to denye, and seie, Who is the Lord? and lest Y compellid bi nedynesse, stele, and forswere the name of my God.
The meanest are not to be wronged.
Proverbs 30:10 Accuse thou not a seruaunt to his lord, lest perauenture he curse thee, and thou falle doun.
Four wicked generations.
Proverbs 30:11 A generacioun that cursith his fadir, and that blessith not his modir. Proverbs 30:12 A generacioun that semeth cleene to it silf, and netheles is not waischun fro hise filthis. Proverbs 30:13 A generacioun whose iyen ben hiy, and the iye liddis therof ben reisid in to hiy thingis. Proverbs 30:14 A generacioun that hath swerdis for teeth, and etith with hise wank teeth; that it ete nedi men of erthe, and the porails of men.
Four things insatiable.
Proverbs 30:15 The watir leche hath twei douytris, seiynge, Brynge, bringe. Thre thingis ben vnable to be fillid, and the fourthe, that seith neuere, It suffisith; Proverbs 30:16 helle, and the mouth of the wombe, and the erthe which is neuere fillid with water; but fier seith neuere, It suffisith.
Parents are not to be despised.
Proverbs 30:17 Crowis of the stronde picke out thilke iye, that scorneth the fadir, and that dispisith the child beryng of his modir; and the briddis of an egle ete that iye.
Four things hard to be known.
Proverbs 30:18 Thre thingis ben hard to me, and outirli Y knowe not the fourthe thing; Proverbs 30:19 the weye of an egle in heuene, the weie of a serpent on a stoon, the weie of a schip in the myddil of the see, and the weie of a man in yong wexynge age. Proverbs 30:20 Siche is the weie of a womman auowtresse, which etith, and wipith hir mouth, and seith, Y wrouyte not yuel.
Four things intolerable.
Proverbs 30:21 The erthe is moued bi thre thingis, and the fourthe thing, which it may not susteyne; Proverbs 30:22 bi a seruaunt, whanne he regneth; bi a fool, whanne he is fillid with mete; Proverbs 30:23 bi an hateful womman, whanne sche is takun in matrymonye; and bi an handmaide, whanne sche is eir of hir ladi.
Four things exceeding wise.
Proverbs 30:24 Foure ben the leeste thingis of erthe, and tho ben wisere than wise men; Proverbs 30:25 amtis, a feble puple, that maken redi mete in heruest to hem silf; Proverbs 30:26 a hare, a puple vnmyyti, that settith his bed in a stoon; Proverbs 30:27 a locust hath no kyng, and al goith out bi cumpanyes; Proverbs 30:28 an euete enforsith with hondis, and dwellith in the housis of kingis.
Four things stately.
Proverbs 30:29 Thre thingis ben, that goon wel, and the fourthe thing, that goith richeli. Proverbs 30:30 A lioun, strongeste of beestis, schal not drede at the meetyng of ony man; Proverbs 30:31 a cok gird the leendis, and a ram, and noon is that schal ayenstonde him.
Wrath is to be prevented.
Proverbs 30:32 He that apperith a fool, aftir that he is reisid an hiy; for if he hadde vndurstonde, he hadde sett hond on his mouth. Proverbs 30:33 Forsothe he that thristith strongli teetis, to drawe out mylk, thristith out botere; and he that smytith greetli, drawith out blood; and he that stirith iris, bringith forth discordis.