Wycliffe Bible

Proverbs 29

Observations of publick government,

Proverbs 29:1 Sodeyn perischyng schal come on that man, that with hard nol dispisith a blamere; and helth schal not sue hym. Proverbs 29:2 The comynalte schal be glad in the multipliyng of iust men; whanne wickid men han take prinshod, the puple schal weyle. Proverbs 29:3 A man that loueth wisdom, makith glad his fadir; but he that nurschith an hoore, schal leese catel. Proverbs 29:4 A iust king reisith the lond; an auerouse man schal distrie it. Proverbs 29:5 A man that spekith bi flaterynge and feyned wordis to his frend; spredith abrood a net to hise steppis. Proverbs 29:6 A snare schal wlappe a wickid man doynge synne; and a iust man schal preise, and schal make ioye. Proverbs 29:7 A iust man knowith the cause of pore men; an vnpitouse man knowith not kunnyng. Proverbs 29:8 Men ful of pestilence distryen a citee; but wise men turnen awei woodnesse. Proverbs 29:9 If a wijs man stryueth with a fool; whether he be wrooth, ether he leiyith, he schal not fynde reste. Proverbs 29:10 Menquelleris haten a simple man; but iust men seken his soule. Proverbs 29:11 A fool bringith forth al his spirit; a wise man dilaieth, and reserueth in to tyme comynge afterward. Proverbs 29:12 A prince that herith wilfuli the wordis of a leesyng; schal haue alle mynystris vnfeithful. Proverbs 29:13 A pore man and a leenere metten hem silf; the Lord is liytnere of euer ethir. Proverbs 29:14 If a kyng demeth pore men in treuthe; his trone schal be maad stidfast with outen ende.

and of private.

Proverbs 29:15 A yerde and chastisyng schal yyue wisdom; but a child, which is left to his wille, schendith his modir. Proverbs 29:16 Grete trespassis schulen be multiplied in the multipliyng of wickid men; and iust men schulen se the fallyngis of hem. Proverbs 29:17 Teche thi sone, and he schal coumforte thee; and he schal yyue delicis to thi soule. Proverbs 29:18 Whanne prophesie faylith, the puple schal be distried; but he that kepith the lawe, is blessid. Proverbs 29:19 A seruaunt mai not be tauyt bi wordis; for he vndirstondith that that thou seist, and dispisith for to answere. Proverbs 29:20 Thou hast seyn a man swift to speke; foli schal be hopid more than his amendyng. Proverbs 29:21 He that nurschith his seruaunt delicatli fro childhod; schal fynde hym rebel aftirward.

Of anger, pride, thievery, cowardice, and corruption.

Proverbs 29:22 A wrathful man territh chidingis; and he that is liyt to haue indignacioun, schal be more enclynaunt to synnes. Proverbs 29:23 Lownesse sueth a proude man; and glorie schal vp take a meke man of spirit. Proverbs 29:24 He that takith part with a theef, hatith his soule; he herith a man chargynge greetli, and schewith not. Proverbs 29:25 He that dredith a man, schal falle soon; he that hopith in the Lord, shal be reisid. Proverbs 29:26 Many men seken the face of the prince; and the doom of alle men schal go forth of the Lord. Proverbs 29:27 Iust men han abhomynacioun of a wickid man; and wickid men han abhomynacioun of hem, that ben in a riytful weye. A sone kepynge a word, schal be out of perdicioun.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook