Wycliffe Bible

Proverbs 28

General observations of impiety and religious integrity.

Proverbs 28:1 A wickid man fleeth, whanne no man pursueth; but a iust man as a lioun tristynge schal be with out ferdfulnesse. Proverbs 28:2 For the synnes of the lond ben many princis therof; and for the wisdom of a man, and for the kunnyng of these thingis that ben seid, the lijf of the duyk schal be lengere. Proverbs 28:3 A pore man falsli calengynge pore men, is lijk a grete reyn, wherynne hungur is maad redi. Proverbs 28:4 Thei that forsaken the lawe, preisen a wickid man; thei that kepen the lawe, ben kyndlid ayens hym. Proverbs 28:5 Wickid men thenken not doom; but thei that seken the Lord, perseyuen alle thingis. Proverbs 28:6 Betere is a pore man goynge in his sympilnesse, than a riche man in schrewid weies. Proverbs 28:7 He that kepith the lawe, is a wijs sone; but he that fedith glotouns, schendith his fadir. Proverbs 28:8 He that gaderith togidere richessis bi vsuris, and fre encrees, gaderith tho togidere ayens pore men. Proverbs 28:9 His preyer schal be maad cursid, that bowith awei his eere; that he here not the lawe. Proverbs 28:10 He that disseyueth iust men in an yuel weye, schal falle in his perisching; and iuste men schulen welde hise goodis. Proverbs 28:11 A ryche man semeth wijs to him silf; but a pore man prudent schal serche him. Proverbs 28:12 In enhaunsing of iust men is miche glorie; whanne wickid men regnen, fallyngis of men ben. Proverbs 28:13 He that hidith hise grete trespassis, schal not be maad riytful; but he that knoulechith and forsakith tho, schal gete merci. Proverbs 28:14 Blessid is the man, which is euere dredeful; but he that is harde of soule, schal falle in to yuel. Proverbs 28:15 A rorynge lioun, and an hungry bere, is a wickid prince on a pore puple. Proverbs 28:16 A duyk nedi of prudence schal oppresse many men bi fals chalenge; but the daies of hym that hatith aueryce, schulen be maad longe. Proverbs 28:17 No man susteyneth a man that falsly chalengith the blood of a man, if he fleeth til to the lake. Proverbs 28:18 He that goith simpli, schal be saaf; he that goith bi weiward weies, schal falle doun onys. Proverbs 28:19 He that worchith his lond, schal be fillid with looues; he that sueth ydelnesse, schal be fillid with nedynesse. Proverbs 28:20 A feithful man schal be preisid myche; but he that hastith to be maad riche, schal not be innocent. Proverbs 28:21 He that knowith a face in doom, doith not wel; this man forsakith treuthe, yhe, for a mussel of breed. Proverbs 28:22 A man that hastith to be maad riche, and hath enuye to othere men; woot not that nedinesse schal come on hym. Proverbs 28:23 He that repreueth a man, schal fynde grace aftirward at hym; more than he that disseyueth bi flateryngis of tunge. Proverbs 28:24 He that withdrawith ony thing fro his fadir and fro his modir, and seith that this is no synne, is parcener of a manquellere. Proverbs 28:25 He that auauntith hym silf, and alargith, reisith stryues; but he that hopith in the Lord, schal be sauyd. Proverbs 28:26 He that tristith in his herte, is a fool; but he that goith wiseli, Proverbs 28:27 schal be preysid. He that yyueth to a pore man, schal not be nedi; he that dispisith a pore man bisechynge, schal suffre nedynesse. Proverbs 28:28 Whanne vnpitouse men risen, men schulen be hid; whanne tho vnpitouse men han perischid, iust men schulen be multiplied.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook