Observations of selflove,
Proverbs 27:1 Haue thou not glorie on the morewe, not knowynge what thing the dai to comynge schal bringe forth. Proverbs 27:2 Another man, and not thi mouth preise thee; a straunger, and not thi lippis preise thee. Proverbs 27:3 A stoon is heuy, and grauel is chariouse; but the ire of a fool is heuyere than euer eithir. Proverbs 27:4 Ire hath no merci, and woodnesse brekynge out hath no merci; and who mai suffre the fersnesse of a spirit stirid?
of true love,
Proverbs 27:5 Betere is opyn repreuyng, than loue hid. Proverbs 27:6 Betere ben the woundis of hym that loueth, than the gileful cossis of hym that hatith. Proverbs 27:7 A man fillid schal dispise an hony coomb; but an hungri man schal take, yhe, bittir thing for swete. Proverbs 27:8 As a brid passinge ouer fro his nest, so is a man that forsakith his place. Proverbs 27:9 The herte delitith in oynement, and dyuerse odours; and a soule is maad swete bi the good counsels of a frend. Proverbs 27:10 Forsake thou not thi frend, and the frend of thi fadir; and entre thou not in to the hous of thi brothir, in the dai of thi turment. Betere is a neiybore nyy, than a brothir afer.
of care to avoid offences,
Proverbs 27:11 Mi sone, studie thou a boute wisdom, and make thou glad myn herte; that thou maist answere a word to a dispisere. Proverbs 27:12 A fel man seynge yuel was hid; litle men of wit passinge forth suffriden harmes. Proverbs 27:13 Take thou awei his clooth, that bihiyte for a straunger; and take thou awei a wed fro hym for an alien man. Proverbs 27:14 He that blessith his neiybore with greet vois; and risith bi niyt, schal be lijk hym that cursith. Proverbs 27:15 Roouys droppynge in the dai of coold, and a womman ful of chidyng ben comparisond. Proverbs 27:16 He that withholdith hir, as if he holdith wynd; and auoidith the oile of his riyt hond. Proverbs 27:17 Yrun is whettid bi irun; and a man whettith the face of his frend. Proverbs 27:18 He that kepith a fige tre, schal ete the fruytis therof; and he that is a kepere of his lord, schal be glorified. Proverbs 27:19 As the cheris of men biholdinge schynen in watris; so the hertis of men ben opyn to prudent men. Proverbs 27:20 Helle and perdicioun schulen not be fillid; so and the iyen of men moun not be fillid. Proverbs 27:21 As siluer is preuyd in a wellyng place, and gold is preued in a furneys; so a man is preued bi the mouth of preyseris. The herte of a wickid man sekith out yuels; but a riytful herte sekith out kunnyng. Proverbs 27:22 Thouy thou beetist a fool in a morter, as with a pestel smytynge aboue dried barli; his foli schal not be don awei fro him.
and of the household care.
Proverbs 27:23 Knowe thou diligentli the cheere of thi beeste; and biholde thou thi flockis. Proverbs 27:24 For thou schalt not haue power contynueli; but a coroun schal be youun to thee in generacioun and in to generacioun. Proverbs 27:25 Medewis ben openyd, and greene eerbis apperiden; and hey is gaderid fro hillis. Proverbs 27:26 Lambren be to thi clothing; and kidis be to the prijs of feeld. Proverbs 27:27 The mylke of geete suffice to thee for thi meetis; in to the necessarie thingis of thin hous, and to lijflode to thin handmaidis.