Proverbs 26
Observations about fools,
Proverbs 26:1 As snow in somer, and reyn in heruest; so glorie is vnsemeli to a fool. Proverbs 26:2 For whi as a brid fliynge ouer to hiy thingis, and a sparowe goynge in to vncerteyn; so cursing brouyt forth with out resonable cause schal come aboue in to sum man. Proverbs 26:3 Beting to an hors, and a bernacle to an asse; and a yerde in the bak of vnprudent men. Proverbs 26:4 Answere thou not to a fool bi his foli, lest thou be maad lijk hym. Proverbs 26:5 Answere thou a fool bi his fooli, lest he seme to him silf to be wijs. Proverbs 26:6 An haltinge man in feet, and drinkinge wickidnesse, he that sendith wordis by a fonned messanger. Proverbs 26:7 As an haltinge man hath faire leggis in veyn; so a parable is vnsemeli in the mouth of foolis. Proverbs 26:8 As he that casteth a stoon in to an heep of mercurie; so he that yyueth onour to an vnwijs man. Proverbs 26:9 As if a thorn growith in the hond of a drunkun man; so a parable in the mouth of foolis. Proverbs 26:10 Doom determyneth causis; and he that settith silence to a fool, swagith iris. Proverbs 26:11 As a dogge that turneth ayen to his spuyng; so is an vnprudent man, that rehersith his fooli. Proverbs 26:12 Thou hast seyn a man seme wijs to hym silf; an vnkunnyng man schal haue hope more than he.
about sluggards,
Proverbs 26:13 A slow man seith, A lioun is in the weie, a liounnesse is in the foot pathis. Proverbs 26:14 As a dore is turned in his hengis; so a slow man in his bed. Proverbs 26:15 A slow man hidith hise hondis vndur his armpit; and he trauelith, if he turneth tho to his mouth. Proverbs 26:16 A slow man semeth wysere to hym silf, than seuene men spekynge sentensis.
and about contentious busybodies.
Proverbs 26:17 As he that takith a dogge bi the eeris; so he that passith, and is vnpacient, and is meddlid with the chiding of anothir man. Proverbs 26:18 As he is gilti, that sendith speris and arowis in to deth; Proverbs 26:19 so a man that anoieth gilefuli his frend, and whanne he is takun, he schal seie, Y dide pleiynge. Proverbs 26:20 Whanne trees failen, the fier schal be quenchid; and whanne a priuy bacbitere is withdrawun, stryues resten. Proverbs 26:21 As deed coolis at quic coolis, and trees at the fier; so a wrathful man reisith chidyngis. Proverbs 26:22 The wordis of a pryuei bacbitere ben as symple; and tho comen til to the ynneste thingis of the herte. Proverbs 26:23 As if thou wolt ourne a vessel of erthe with foul siluer; so ben bolnynge lippis felouschipid with the werste herte. Proverbs 26:24 An enemy is vndirstondun bi hise lippis, whanne he tretith giles in the herte. Proverbs 26:25 Whanne he makith low his vois, bileue thou not to hym; for seuene wickidnessis ben in his herte. Proverbs 26:26 The malice of hym that hilith hatrede gilefuli, schal be schewid in a counsel. Proverbs 26:27 He that delueth a diche, schal falle in to it; and if a man walewith a stoon, it schal turne ayen to hym. Proverbs 26:28 A fals tunge loueth not treuth; and a slidir mouth worchith fallyngis.
|
