Observations about kings,
Proverbs 25:1 Also these ben the Parablis of Salomon, whiche the men of Ezechie, kyng of Juda, translatiden. Proverbs 25:2 The glorie of God is to hele a word; and the glorie of kyngis is to seke out a word. Proverbs 25:3 Heuene aboue, and the erthe bynethe, and the herte of kyngis is vnserchable. Proverbs 25:4 Do thou a wei rust fro siluer, and a ful cleene vessel schal go out. Proverbs 25:5 Do thou awei vnpite fro the cheer of the kyng, and his trone schal be maad stidfast bi riytfulnesse. Proverbs 25:6 Appere thou not gloriouse bifore the kyng, and stonde thou not in the place of grete men. Proverbs 25:7 For it is betere, that it be seid to thee, Stie thou hidur, than that thou be maad low bifore the prince.
and about avoiding of quarrels, and sundry causes thereof.
Proverbs 25:8 Brynge thou not forth soone tho thingis in strijf, whiche thin iyen sien; lest aftirward thou maist not amende, whanne thou hast maad thi frend vnhonest. Proverbs 25:9 Trete thi cause with thi frend, and schewe thou not priuyte to a straunge man; Proverbs 25:10 lest perauenture he haue ioye of thi fal, whanne he hath herde, and ceesse not to do schenschipe to thee. Grace and frenschip delyueren, whiche kepe thou to thee, that thou be not maad repreuable. Proverbs 25:11 A goldun pomel in beddis of siluer is he, that spekith a word in his time. Proverbs 25:12 A goldun eere ryng, and a schinynge peerle is he, that repreueth a wijs man, and an eere obeiynge. Proverbs 25:13 As the coold of snow in the dai of heruest, so a feithful messanger to hym that sente thilke messanger, makith his soule to haue reste. Proverbs 25:14 A cloude and wind, and reyn not suynge, is a gloriouse man, and not fillynge biheestis. Proverbs 25:15 A prince schal be maad soft bi pacience; and a soft tunge schal breke hardnesse. Proverbs 25:16 Thou hast founde hony, ete thou that that suffisith to thee; lest perauenture thou be fillid, and brake it out. Proverbs 25:17 Withdrawe thi foot fro the hous of thi neiybore; lest sum tyme he be fillid, and hate thee. Proverbs 25:18 A dart, and a swerd, and a scharp arowe, a man that spekith fals witnessing ayens his neiybore. Proverbs 25:19 A rotun tooth, and a feynt foot is he, that hopith on an vnfeithful man in the dai of angwisch, Proverbs 25:20 and leesith his mentil in the dai of coold. Vynegre in a vessel of salt is he, that singith songis to the worste herte. As a mouyte noieth a cloth, and a worm noieth a tree, so the sorewe of a man noieth the herte. Proverbs 25:21 If thin enemy hungrith, feede thou him; if he thirstith, yyue thou watir to hym to drinke; Proverbs 25:22 for thou schalt gadere togidere coolis on his heed; and the Lord schal yelde to thee. Proverbs 25:23 The north wind scatereth reynes; and a sorewful face distrieth a tunge bacbitinge. Proverbs 25:24 It is betere to sitte in the corner of an hous without roof, than with a womman ful of chidyng, and in a comyn hous. Proverbs 25:25 Coold watir to a thirsti man; and a good messanger fro a fer lond. Proverbs 25:26 A welle disturblid with foot, and a veyne brokun, a iust man fallinge bifore a wickid man. Proverbs 25:27 As it is not good to hym that etith myche hony; so he that is a serchere of maieste, schal be put doun fro glorie. Proverbs 25:28 As a citee opyn, and with out cumpas of wallis; so is a man that mai not refreyne his spirit in speking.