Wycliffe Bible

Proverbs 24

Sundry observations of moral virtues, and their contrary vices (10-24).

Proverbs 24:1 Sue thou not yuele men, desire thou not to be with hem. Proverbs 24:2 For the soule of hem bithenkith raueyns, and her lippis speken fraudis. Proverbs 24:3 An hous schal be bildid bi wisdom, and schal be maad strong bi prudence. Proverbs 24:4 Celeris schulen be fillid in teching, al riches preciouse and ful fair. Proverbs 24:5 A wijs man is strong, and a lerned man is stalworth and miyti. Proverbs 24:6 For whi batel is bigunnun with ordenaunce, and helthe schal be, where many counsels ben. Proverbs 24:7 Wisdom is hiy to a fool; in the yate he schal not opene his mouth. Proverbs 24:8 He that thenkith to do yuels, schal be clepid a fool. Proverbs 24:9 The thouyte of a fool is synne; and a bacbitere is abhomynacioun of men. Proverbs 24:10 If thou that hast slide, dispeirist in the dai of angwisch, thi strengthe schal be maad lesse. Proverbs 24:11 Delyuere thou hem, that ben led to deth; and ceesse thou not to delyuere hem, that ben drawun to deth. Proverbs 24:12 If thou seist, Strengthis suffisen not; he that is biholdere of the herte, vndirstondith, and no thing disseyueth the kepere of thi soule, and he schal yelde to a man bi hise werkis. Proverbs 24:13 Mi sone, ete thou hony, for it is good; and an honycomb ful swete to thi throte. Proverbs 24:14 So and the techyng of wisdom is good to thi soule; and whanne thou hast founde it, thou schalt haue hope in the laste thingis, and thin hope schal not perische. Proverbs 24:15 Aspie thou not, and seke not wickidnesse in the hous of a iust man, nether waste thou his reste. Proverbs 24:16 For a iust man schal falle seuene sithis in the dai, and schal rise ayen; but wickid men schulen falle in to yuele. Proverbs 24:17 Whanne thin enemye fallith, haue thou not ioye; and thin herte haue not ful out ioiyng in his fal; Proverbs 24:18 lest perauenture the Lord se, and it displese hym, and he take awei his ire fro hym. Proverbs 24:19 Stryue thou not with the worste men, nether sue thou wickid men. Proverbs 24:20 For whi yuele men han not hope of thingis to comynge, and the lanterne of wickid men schal be quenchid. Proverbs 24:21 My sone, drede thou God, and the kyng; and be thou not medlid with bacbiteris. Proverbs 24:22 For her perdicioun schal rise togidere sudenli, and who knowith the fal of euer either? Proverbs 24:23 Also these thingis that suen ben to wise men. It is not good to knowe a persoone in doom. Proverbs 24:24 Puplis schulen curse hem, that seien to a wickid man, Thou art iust; and lynagis schulen holde hem abhomynable. Proverbs 24:25 Thei that repreuen iustli synners, schulen be preisid; and blessing schal come on hem. Proverbs 24:26 He that answerith riytful wordis, schal kisse lippis. Proverbs 24:27 Make redi thi werk with outforth, and worche thi feelde dilygentli, that thou bilde thin hous aftirward. Proverbs 24:28 Be thou not a witnesse with out resonable cause ayens thi neiybore; nether flatere thou ony man with thi lippis. Proverbs 24:29 Seie thou not, As he dide to me, so Y schal do to him, and Y schal yelde to ech man aftir his werk. Proverbs 24:30 I passide bi the feeld of a slow man, and bi the vyner of a fonned man; and, lo! Proverbs 24:31 nettlis hadden fillid al, thornes hadden hilid the hiyere part therof, and the wal of stoonys with out morter was distried. Proverbs 24:32 And whanne Y hadde seyn this thing, Y settide in myn herte, and bi ensaumple Y lernyde techyng. Proverbs 24:33 Hou longe slepist thou, slow man? whanne schalt thou ryse fro sleep? Sotheli thou schalt slepe a litil, thou schalt nappe a litil, thou schalt ioyne togidere the hondis a litil, to take reste; Proverbs 24:34 and thi nedynesse as a currour schal come to thee, and thi beggerie as an armed man.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook