Sundry observations of moral virtues, and their contrary vices (10-24).
Proverbs 22:1 Betere is a good name, than many richessis; for good grace is aboue siluer and gold. Proverbs 22:2 A riche man and a pore man metten hem silf; the Lord is worchere of euer eithir. Proverbs 22:3 A felle man seeth yuel, and hidith him silf; and an innocent man passid, and he was turmentid bi harm. Proverbs 22:4 The ende of temperaunce is the drede of the Lord; richessis, and glorye, and lijf. Proverbs 22:5 Armuris and swerdis ben in the weie of a weiward man; but the kepere of his soule goith awey fer fro tho. Proverbs 22:6 It is a prouerbe, A yong wexynge man bisidis his weie, and whanne he hath wexe elde, he schal not go awei fro it. Proverbs 22:7 A riche man comaundith to pore men; and he that takith borewyng, is the seruaunt of the leenere. Proverbs 22:8 He that sowith wickidnes, schal repe yuels; and the yerde of his yre schal be endid. Proverbs 22:9 He that is redi to merci, schal be blessid; for of his looues he yaf to a pore man. He that yyueth yiftis, schal gete victorie and onour; forsothe he takith awei the soule of the takeris. Proverbs 22:10 Caste thou out a scornere, and strijf schal go out with hym; and causis and dispisyngis schulen ceesse. Proverbs 22:11 He that loueth the clennesse of herte, schal haue the kyng a freend, for the grace of hise lippis. Proverbs 22:12 The iyen of the Lord kepen kunnyng; and the wordis of a wickid man ben disseyued. Proverbs 22:13 A slow man schal seie, A lioun is withoutforth; Y schal be slayn in the myddis of the stretis. Proverbs 22:14 The mouth of an alien womman is a deep diche; he to whom the Lord is wrooth, schal falle in to it. Proverbs 22:15 Foli is boundun togidere in the herte of a child; and a yerde of chastisyng schal dryue it awey. Proverbs 22:16 He that falsli chalengith a pore man, to encreesse hise owne richessis, schal yyue to a richere man, and schal be nedi. Proverbs 22:17 My sone, bowe doun thin eere, and here thou the wordis of wise men; but sette thou the herte to my techyng. Proverbs 22:18 That schal be fair to thee, whanne thou hast kept it in thin herte, and it schal flowe ayen in thi lippis. Proverbs 22:19 That thi trist be in the Lord; wherfor and Y haue schewid it to thee to dai. Proverbs 22:20 Lo! Y haue discryued it in thre maneres, in thouytis and kunnyng, Proverbs 22:21 that Y schulde schewe to thee the sadnesse and spechis of trewthe; to answere of these thingis to hem, that senten thee. Proverbs 22:22 Do thou not violence to a pore man, for he is pore; nethir defoule thou a nedi man in the yate. Proverbs 22:23 For the Lord schal deme his cause, and he schal turmente hem, that turmentiden his soule. Proverbs 22:24 Nyle thou be freend to a wrathful man, nether go thou with a wood man; Proverbs 22:25 lest perauenture thou lerne hise weies, and take sclaundir to thi soule. Proverbs 22:26 Nyle thou be with hem that oblischen her hondis, and that proferen hem silf borewis for dettis; for if he hath not wherof he schal restore, Proverbs 22:27 what of cause is, that thou take awei hilyng fro thi bed? Proverbs 22:28 Go thou not ouer the elde markis, whiche thi faders han set. Proverbs 22:29 Thou hast seyn a man smert in his werk; he schal stonde bifore kyngis, and he schal not be bifor vnnoble men.