Wisdom promiseth godliness to her children,
Proverbs 2:1 Mi sone, if thou resseyuest my wordis, and hidist myn heestis anentis thee; Proverbs 2:2 that thin eere here wisdom, bowe thin herte to knowe prudence. Proverbs 2:3 For if thou inwardli clepist wisdom, and bowist thin herte to prudence; Proverbs 2:4 if thou sekist it as money, and diggist it out as tresours; Proverbs 2:5 thanne thou schalt vndirstonde the drede of the Lord, and schalt fynde the kunnyng of God. Proverbs 2:6 For the Lord yyueth wisdom; and prudence and kunnyng is of his mouth. Proverbs 2:7 He schal kepe the heelthe of riytful men, and he schal defende hem that goen sympli. Proverbs 2:8 And he schal kepe the pathis of riytfulnesse, and he schal kepe the weies of hooli men. Proverbs 2:9 Thanne thou schalt vndirstonde riytfulnesse, and dom, and equytee, and ech good path.
and safety from evil company,
Proverbs 2:10 If wysdom entrith in to thin herte, and kunnyng plesith thi soule, Proverbs 2:11 good councel schal kepe thee, and prudence schal kepe thee; Proverbs 2:12 that thou be delyuered fro an yuel weie, and fro a man that spekith weiward thingis. Proverbs 2:13 Whiche forsaken a riytful weie, and goen bi derk weies; Proverbs 2:14 whiche ben glad, whanne thei han do yuel, and maken ful out ioye in worste thingis; Proverbs 2:15 whose weies ben weywerd, and her goyingis ben of yuel fame. Proverbs 2:16 That thou be delyuered fro an alien womman, and fro a straunge womman, that makith soft hir wordis; Proverbs 2:17 and forsakith the duyk of hir tyme of mariage, and hath foryete the couenaunt of hir God. Proverbs 2:18 For the hous of hir is bowid to deeth, and hir pathis to helle. Proverbs 2:19 Alle that entren to hir, schulen not turne ayen, nether schulen catche the pathis of lijf.
and direction in good ways.
Proverbs 2:20 That thou go in a good weie, and kepe the pathis of iust men. Proverbs 2:21 Forsothe thei that ben riytful, schulen dwelle in the lond; and symple men schulen perfitli dwelle ther ynne. Proverbs 2:22 But vnfeithful men schulen be lost fro the loond; and thei that doen wickidli, schulen be takun awey fro it.