The Midianites are spoiled, and Balaam slain.
Numbers 31:1 And the Lord spak to Moyses, and seide, Numbers 31:2 Venge thou firste the sones of Israel of Madianytis, and so thou schalt be gaderid to thi puple. Numbers 31:3 And anoon Moises seide, Arme ye men of you to batel, that moun take of Madianytis the veniaunce of the Lord. Numbers 31:4 Of ech lynage be chosun a thousynde men of Israel, that schulen be sent to batel. Numbers 31:5 And of ech lynage thei yauen a thousynde, that is twelue thousynde of men, redi to batel; Numbers 31:6 whiche Moises sente with Fynees, the sone of Eleazar, preest. And he bitook to hem hooli vesselis, and trumpis to make sown. Numbers 31:7 And whanne thei hadden fouyt ayens Madianytis, and hadden ouercome, thei killiden alle the malis, Numbers 31:8 and the kyngis of hem, Euy, and Reem, and Sur, and Hur, and Rebe, fyue princes of the folc of hem. Also thei killiden bi swerd Balaam, the sone of Beor. Numbers 31:9 And thei token the wymmen of hem, and the litle children, and alle beestis, and al purtenaunce of howshold; what euer thei myyten haue, thei spuyleden; Numbers 31:10 flawme brente as wel citees, as litle townes and castels. Numbers 31:11 And they token pray, and alle thingis whiche thei hadden take, as wel of men as of beestis, and thei brouyten to Moyses, Numbers 31:12 and to Eleazar, preest, and to al the multitude of the sones of Israel. Forsothe thei baren othere thingis perteynynge to vss, to the castels in the feldi places of Moab bisidis Jordan, ayens Jericho.
Moses is wroth with the officers for saving the women alive.
Numbers 31:13 Moises and Eleazar, preest, and alle the princes of the synagoge, yeden out in to the comyng of hem, with out the castels, that is, of the tabernacle. Numbers 31:14 And Moises was wrooth to the princes of the oost, to tribunes, and centuriouns, that camen fro batel; Numbers 31:15 and he seide, Whi reserueden ye wymmen? Numbers 31:16 whether it be not these that disseyueden the sones of Israel, at the suggestioun of Balaam, and maden you to do trespas ayens the Lord, on the synne of Phegor, wherfor also the puple was slayn? Numbers 31:17 And therfor sle ye alle men, what euer thing is of male kynde, and litle children; and strangle ye the wymmen that knew men fleischli; Numbers 31:18 forsothe reserue ye to you damesels, and alle wymmen virgyns,
How the soldiers, with their captives and spoil, are to be purified.
Numbers 31:19 and dwelle ye with out the castels in seuene daies. He that sleeth a man, ether touchith a slayn man, schal be clensid in the thridde and the seuenthe dai; Numbers 31:20 and of al the pray, whether it is clooth, ether vessel, and ony thing maad redi in to thingis perteynynge to vss, of the skynnys and heeris of geet, and of tre, it schal be clensid.
Numbers 31:21 And Eleazar, preest, spak thus to the men of the oost that fouyten, This is the comaundement of the lawe, which the Lord comaundide to Moises, Numbers 31:22 The gold, and siluer, and bras, and yrun, and tiyn, and leed, and al thing that may passe by flawme, schal be purgid bi fier; Numbers 31:23 sotheli what euer thing may not suffre fier, schal be halewid bi the watir of clensyng. Numbers 31:24 And ye schulen waische youre clothis in the seuenthe dai, and ye schulen be clensid; and aftirward ye schulen entre in to the castels of the tabernacle.
The proportion whereby the prey is to be divided.
Numbers 31:25 And the Lord seide to Moises, Take ye the summe of tho thingis that ben takun, fro man til to beeste, Numbers 31:26 thou, and Eleazar, preest, and alle the princes of the comyn puple. Numbers 31:27 And thou schalt departe euenli the prey bytwixe hem that fouyten and yeden out to batel, and bitwixe al the multitude. Numbers 31:28 And thou schalt departe a part to the Lord, of hem that fouyten, and weren in batel, o soule of fiue hundrid, as wel of men, as of oxun, and of assis, and of scheep. Numbers 31:29 And thou schalt yyue that part to Eleazar, preest, for tho ben the firste fruytis of the Lord. Numbers 31:30 Also of the myddil part of the sones of Israel, thou schalt take the fiftithe heed of men, and of oxun, and of assis, and of scheep, and of alle lyuynge beestis; and thou schalt yyue tho to the dekenes, that waken in the kepyngis of the tabernacle of the Lord. Numbers 31:31 And Moyses and Eleazar diden, as the Lord comaundide. Numbers 31:32 Forsothe the prey which the oost hadde take, was sixe hundrid fyue and seuenti thousynde of scheep, Numbers 31:33 of oxun two and seuenti thousynde, Numbers 31:34 of assis sixti thousynde and a thousynde; Numbers 31:35 the soules of persones of femal kynde, that knewen not fleischli men, two and thretti thousynde. Numbers 31:36 And the myddil part was youun to hem that weren in the batel, of scheep thre hundrid seuene and thretti thousynde and fyue hundrid; Numbers 31:37 of whiche sixe hundrid fyue and seuenti scheep weren noumbrid in to the part of the Lord; Numbers 31:38 and of sixe and thretti thousynde oxun, Numbers 31:39 two and seuenti oxun, and of thretti thousynde assis and fyue hundryd, oon and sixti assis; Numbers 31:40 of sixtene thousynde persoones of men, twei and thretti persoones bifelden in to the part of the Lord. Numbers 31:41 And Moises bitook the noumbre of the firste fruytis of the Lord to Eleazar, preest, as it was comaundid to hym, Numbers 31:42 of the myddil part of the sones of Israel, which he departide to hem that weren in batel. Numbers 31:43 And of the myddil part that bifelde to the tother multitude, that is, of thre hundrid seuene and thretti thousynde scheep and fyue hundrid, Numbers 31:44 and of sixe and thretti thousynde oxun, Numbers 31:45 and of thretti thousynde assis and fyue hundrid, Numbers 31:46 and of sixtene thousynde wymmen, Numbers 31:47 Moyses took the fyftithe heed, and yaf to the dekenes, that wakiden in the tabernacle of the Lord, as the Lord comaundide.
The voluntary oblation unto the treasury of the LORD.
Numbers 31:48 And whanne the princes of the oost, and the tribunes and centuriouns hadden neiyed to Moises, Numbers 31:49 thei seiden, We thi seruauntis han teld the noumbre of fiyters, whiche we hadden vndur oure hoond, and sotheli not oon failide; Numbers 31:50 for which cause we offren in the fre yiftis of the Lord, alle bi vs silf, that that we myyten fynde of gold in the pray, girdelis for the myddil of wymmen, and bies of the armes, and ryngis, and ournementis of the arm nyy the hond, and bies of the neckis of wymmen, that thou preye the Lord for vs. Numbers 31:51 And Moises and Eleazar, preest, token al the gold in dyuerse spices, Numbers 31:52 ether kyndis, bi the weiyte of the seyntuarye, sixtene thousynde seuene hundrid and fifti siclis, of the tribunes, and centuriouns. Numbers 31:53 For that that ech man rauyschide in the prey, was his owne; Numbers 31:54 and thei baren the gold taken in to the tabernacle of witnessyng, in to the mynde of the sones of Israel, bifor the Lord.