Numbers 29
The offering at the feast of Trumpets,
Numbers 29:1 Forsothe the firste dai of the seuenthe monethe schal be hooli, and worschipful to you; ye schulen not do ony seruyle werk ther ynne, for it is the day of sownyng, and of trumpis. Numbers 29:2 And ye schulen offre brent sacrifice, in to swettest odour to the Lord, o calf of the droue, o ram, and seuene lambren of o yeer, with out wem; Numbers 29:3 and in the sacrificis of tho ye schulen offre thre tenthe partis of flour spreynt togidere with oile, bi ech calfe, twey tenthe partis bi a ram, Numbers 29:4 o tenthe part bi a lomb, whiche togidere ben seuen lambren. Numbers 29:5 And ye schulen offre a buc of geet, which is offrid for synne, in to the clensyng of the puple, Numbers 29:6 with out the brent sacrifice of kalendis, with hise sacrifices, and without euerlastynge brent sacrifice, with customable fletynge offryngis; and bi the same cerymonyes ye schulen offre encense in to swettiste odour to the Lord.
at the day of afflicting their souls,
Numbers 29:7 Also the tenthe dai of this seuenthe monethe schal be hooli and worschipful to you, and ye schulen turmente youre soulis; ye schulen not do ony seruyle werk ther ynne. Numbers 29:8 And ye schulen offre brent sacrifice to the Lord, in to swettiste odour; o calf of the droue, o ram, seuene lambren of o yeer with out wem. Numbers 29:9 And in the sacrifices of tho ye schulen offre thre tenthe partis of flour spreynt togidere with oyle, bi ech calf, twey tenthe partis bi a ram, Numbers 29:10 the tenthe part of a dyme bi each lomb, that ben togidere seuene lambren. Numbers 29:11 And ye schulen offre a buc of geet for synne, with out these thingis that ben wont to be offrid for synne in to clensyng, and ye schulen offre euerlastinge brent sacrifice in sacrifice, and fletinge offryngis of tho.
Numbers 29:12 Forsothe in the fiftenthe dai of this seuenthe monethe, that schal be hooli and worschipful to you, ye schulen not do ony seruyle werk, but ye schulen halewe solempnyte to the Lord in seuene daies; and ye schulen offre brent sacrifice,
and on the eight days of the feast of Tabernacles.
Numbers 29:13 in to swetiste odour to the Lord, threttene calues of the droue, twey rammes, fouretene lambren of o yeer, with out wem. Numbers 29:14 And in the moiste sacrifices of tho ye schulen offre thre tenthe partis of flour spreynt to gidere with oile bi ech calf, that ben togidere threttene calues, and ye schulen offre twei tenthe partis to twei rammes togidere, that is, o tenthe part to o ram, and ye schulen offre the tenthe part of a Numbers 29:15 dyme to ech lomb, whiche ben to gidere fourteene lambren. Numbers 29:16 And ye schulen offre a buc of geet for synne, with out euerlastynge brent sacrifice, and with out the sacrifice and moiste offryng therof.
Numbers 29:17 In the tother dai ye schulen offre twelue calues of the droue, twei rammes, fouretene lambren of o yeer without wem. Numbers 29:18 And ye schulen halewe riytfuli sacrifices, and moiste offryngis of alle, bi calues, and rammes, and lambren. Numbers 29:19 And ye schulen offre a buc of geet for synne, with out euerlastynge brent sacrifice, and with out the sacrifice and moist offryng therof.
Numbers 29:20 In the thridde dai ye schulen offre euleuen calues, twei rammes, fourtene lambren of o yeer, without wem. Numbers 29:21 And ye schulen halewe riytfuli the sacrifices, and moiste offryngis of alle, bi the caluys, and rammes, and lambren. Numbers 29:22 And ye schulen offre a buk of geet for synne, with out euerlastynge brent sacrifice, and with out the sacrifice and moiste offryng therof.
Numbers 29:23 In the fourthe day ye schulen offre ten calues, twey rammes, fourtene lambren of o yeer with oute wem. Numbers 29:24 And ye schulen halewe riytfuli the sacrifices, and moiste offryngis of alle, bi the calues, and rammes, and lambren. Numbers 29:25 And ye schulen offre a buk of geet for synne, with out euerlastynge brent sacrifice, and with out the sacrifice and moiste offryng therof.
Numbers 29:26 In the fyuethe dai ye schulen offre nyne calues, twei rammes, fourtene lambren of o yeer, with oute wem. Numbers 29:27 And ye schulen halewe riytfuli the sacrifices, and moiste offryngis of alle, bi the calues, and rammes, and lambren. Numbers 29:28 And ye schulen offre a buc of geet for synne, with out euerlastynge brent sacrifice, and with out the sacrifice and moiste offryng therof.
Numbers 29:29 In the sixte dai ye schulen offre eiyt calues, and twei rammes, fourtene lambren of o yeer with out wem. Numbers 29:30 And ye schulen halewe riytfuli the sacrifices, and moiste offryngis of alle, bi the calues, and rammes, and lambren. Numbers 29:31 And ye schulen offre a buk of geet for synne, with out euerlastynge brent sacrifice, and with out the sacrifice and moiste offryng therof.
Numbers 29:32 In the seuenthe dai ye schulen offre seuene calues, twei rammes, fourtene lambren of o yeer with out wem. Numbers 29:33 And ye schulen halewe riytfuli the sacrifices, and moiste offryngis of alle, bi the calues, and rammes, and lambren. Numbers 29:34 And ye schulen offre a buc of geet for synne, with out euerlastynge brent sacrifice, and with out the sacrifice and moiste offryng therof.
Numbers 29:35 In the eiythe dai, which is moost solempne ether hooli; ye schulen not do ony seruyle werk, Numbers 29:36 and ye schulen offre brent sacrifice in to swettest odour to the Lord, o calf, o ram, seuene lambren of o yeer with out wem. Numbers 29:37 And ye schulen halewe riytfuli the sacrifices and moiste offryngis of alle, bi the calues, and rammes, and lambren. Numbers 29:38 And ye schulen offre a buc of geet for synne, with out euerlastynge brent sacrifice, and with out the sacrifice, and moiste offryng therof. Numbers 29:39 Ye schulen offre these thingis to the Lord, in youre solempnytees, with out avowis, and wilful offryngis, in brent sacrifice, in sacrifice, in moist offryng, and in peesible sacrifices. Numbers 29:40 And Moises telde to the sones of Israel alle thingis whiche the Lord comaundide to hym.
|
