The daughters of Zelophehad sue for an inheritance.
Numbers 27:1 Forsothe the douytris of Salphaat, sone of Epher, sone of Galaad, sone of Machir, sone of Manasses, that was the sone of Joseph, neiyeden; of whiche douytris these ben the names; Maala, and Noha, and Egla, and Melcha, and Thersa. Numbers 27:2 And thei stoden bifore Moises, and Eleazar, preest, and alle the princes of the puple, at the dore of tabernacle of boond of pees; and seiden, Numbers 27:3 Oure fadir was deed in the deseert, nether he was in the rebelte, that was reisid ayens the Lord, vndur Chore, but he was deed in his synne; he hadde no male sones. Numbers 27:4 Whi is the name of hym takun awei fro his meynee, for he hath no sone? Yif ye possessioun to vs among the kynesmen of oure fadir. Numbers 27:5 And Moises telde the cause of hem to the doom of the Lord;
The law of inheritances.
Numbers 27:6 which seide to Moyses, Numbers 27:7 The douytris of Salphaath axen a iust thing; yyue thou possessioun to hem among the kynnysmen of her fadir, and be thei successouris to hym in to eritage. Numbers 27:8 Forsothe thou schalt speke these thingis to the sons of Israel, Whanne a man is deed with out sone, the eritage schal go to his douyter; Numbers 27:9 if he hath not a douyter, he schal haue eiris his britheren; Numbers 27:10 that and if britheren ben not, ye schulen yyue the eritage to the britheren of his fadir; Numbers 27:11 forsothe if he hath no britheren of his fadir, the eritage schal be youun to hem that ben next to hym. And this schal be hooli, that is, stidefast, bi euerlastynge lawe to the sones of Israel, as the Lord comaundide to Moises.
Moses, being told of his death, sueth for a successor.
Numbers 27:12 Also the Lord seide to Moises, Stie thou in to this hil of Aberym, and biholde thou fro thennus the lond, which Y schal yyue to the sones of Israel. Numbers 27:13 And whanne thou hast seyn it, also thou schalt go to thi puple, as thi brother Aaron yede; Numbers 27:14 for thou offenddidist me in the deseert of Syn, in the ayen seiyng of the multitude, nether woldist halewe me bifor it, on the watris. These ben the watris of ayen seiyng, in Cades, of the deseert of Syn.
Numbers 27:15 To whom Moises answeryde, Numbers 27:16 The Lord God of spiritis of al fleisch puruey a man, that be on this multitude, Numbers 27:17 and may go out, and entre bifor hem, and lede hem out, and lede hem yn, lest the puple of the Lord be as scheep with out schepherde.
Joshua is appointed to succeed him.
Numbers 27:18 And the Lord seide to hym, Take thou Josue, the sone of Nun, a man in whom the spyrit of God is, and set thin hond on hym; Numbers 27:19 and he schal stonde bifore Eleazar, preest, and bifore al the multitude. Numbers 27:20 And thou schalt yyue to hym comaundementis, in the siyt of alle men, and a part of thi glorie, that al the synagoge of the sones of Israel here hym. Numbers 27:21 If ony thing schal be worthi to be do for this man, Eleasar, preest, schal counseil the Lord; he schal go out, and schal go yn, at the word of Eleazar; he, and alle the sones of Israel with him, and the tother multitude. Numbers 27:22 Moises dide as the Lord comaundide, and whanne he hadde take Josue, he settide hym bifore Eleazar, preest, and bifore al the multitude of the puple; Numbers 27:23 and whanne he hadde set hondis on his heed, he reherside alle thingis whiche the Lord comaundide.