Wycliffe Bible

Numbers 16

The rebellion of Korah, Dathan, and Abiram.

Numbers 16:1 Lo! forsothe Chore, the sone of Isuar, sone of Caath, sone of Leuy, and Dathan and Abiron, the sones of Heliab, and Hon, the sone of Pheleph, of the sones of Ruben, rysen ayens Moises, Numbers 16:2 and othere of the sones of Israel, two hundryd men and fifti, prynces of the synagoge, and whiche weren clepid bi names in the tyme of counsel. Numbers 16:3 And whanne thei hadden stonde ayens Moises and Aaron, thei seiden, Suffice it to you, for al the multitude is of hooly men, and the Lord is in hem; whi ben ye reisid on the puple of the Lord? Numbers 16:4 And whanne Moises hadde herd this, he felde lowe on the face. Numbers 16:5 And he spak to Chore, and to al the multitude; he seide, Eerli the Lord schal make knowun whiche perteynen to hym, and he schal applie to hym hooli men; and thei whiche he hath chose, schulen neiye to hym. Numbers 16:6 Therfor do ye this thing; ech man take his cencere, thou Chore, and al thi counsel; Numbers 16:7 and to morewe whanne fier is takun vp, putte ye encense aboue bifor the Lord, and whom euer the Lord chesith, he schal be hooli. Ye sones of Leuy ben myche reisid. Numbers 16:8 And eft Moises seide to Chore, Ye sones of Leuy, here. Numbers 16:9 Whether it is litil to you, that God of Israel departide you fro al the puple, and ioynede you to hym silf, that ye schulden serue hym in the seruyce of tabernacle, and that ye schulden stonde bifor the multitude of puple, and schulden serue hym? Numbers 16:10 Made he therfor thee and alle thi bretheren the sones of Leuy to neiy to hym silf, that ye chalenge to you also preesthod, Numbers 16:11 and al thi gaderyng togidere stonde ayens the Lord? For whi what is Aaron, that ye grutchen ayens hym?

Numbers 16:12 Therfor Moises sente to clepe Dathan and Abiron, the sones of Heliab; whiche answeriden, We comen not. Numbers 16:13 Whethir is it litil to thee, that thou leddist vs out of the lond that flowide with mylk and hony, to sle vs in the deseert, no but also thou be lord of vs? Numbers 16:14 Verili thou hast bronyt vs in to the lond that flowith with streemys of mylk and hony, and hast youe to vs possessioun of feeldis, and of vyneris; whethir also thou wolt putte out oure iyen? Numbers 16:15 We comen not. And Moises was wrooth greetli, and seide to the Lord, Biholde thou not the sacrifices of hem; thou wost that Y took neuere of hem, yhe, a litil asse, nethir Y turmentide ony of hem. Numbers 16:16 And Moises seide to Chore, Thou and al thi congregacioun stonde asidis half bifor the Lord, and Aaron to morewe bi hym silf. Numbers 16:17 Take ye alle bi you silf youre censeris, and putte ye encense in tho, and offre ye to the Lord, tweyn hundrid and fifti censeris; and Aaron holde his censer. Numbers 16:18 And whanne thei hadden do this, while Moises and Aaron stoden, Numbers 16:19 and thei hadden gaderid al the multitude to the dore of the tabernacle ayens hem, the glorie of the Lord apperide to alle. Numbers 16:20 And the Lord spak to Moises and Aaron, and seide, Numbers 16:21 Be ye departid fro the myddis of this congregacioun, that Y leese hem sodeynli. Numbers 16:22 Whiche felden lowe on the face, and seiden, Strongeste God of the spiritis of al fleisch, whethir thin yre schal be fers ayens alle men, for o man synneth?

Moses separateth the people from the rebels' tents.

Numbers 16:23 And the Lord seide to Moises, Numbers 16:24 Comaunde thou to al the puple, that it be departid fro the tabernaclis of Chore, and of Dathan, and of Abiron. Numbers 16:25 And Moises roos, and yede to Dathan and Abiron; and while the eldre men of Israel sueden hym, Numbers 16:26 he seide to the cumpeny, Go ye awey fro the tabernaclis of wickid men, and nyle ye touche tho thingis that parteynen to hem, lest ye ben wlappid in the synnes of hem. Numbers 16:27 And whanne thei hadden gon awei fro the tentis of hem bi the cumpas, Dathan and Abiron yeden out, and stoden in the entryng of her tentis, with wyues, and fre children, and al the multitude. Numbers 16:28 And Moises seide, In this ye schulen wite that the Lord sente me, that Y schulde do alle thingis whiche ye seen, and Y brouyte not forth tho of myn owne herte. Numbers 16:29 If thei perischen bi customable deeth of men, and wounde visite hem, bi which also othere men ben wont to be visitid, Numbers 16:30 the Lord sente not me; but if the Lord doith a newe thing, that the erthe opene his mouth, and swolewe hem, and alle thingis that perteynen to hem, and thei goen doun quyke in to helle, ye schulen wite that thei blasfemeden the Lord.

The earth swalloweth up Korah, and a fire consumeth others.

Numbers 16:31 Therfor anoon as he cesside to speke, the erthe was brokun vndur her feet, Numbers 16:32 and the erthe openyde his mouth, and deuowride hem, with her tabernaclis, and al the catel of hem; Numbers 16:33 and thei yeden doun quike in to helle, and weren hilid with erthe, and perischiden fro the myddis of the multitude. Numbers 16:34 And sotheli al Israel that stood bi the cumpas, fledde fro the cry of men perischinge, and seide, Lest perauenture the erthe swolewe also vs. Numbers 16:35 But also fier yede out fro the Lord, and killide tweyn hundrid and fifti men that offriden encense.

The censers are reserved to holy use.

Numbers 16:36 And the Lord spak to Moises, and seide, Numbers 16:37 Comaunde thou to Eleasar, sone of Aaron, preest, that he take the censeris that liggen in the brennyng, and that he schatere the fier hidur and thidur; for tho ben halewid in the dethis of synneris; Numbers 16:38 and that he bringe forth tho in to platis, and naile to the auter, for encense is offrid in tho to the Lord, and tho ben halewid, that the sonis of Israel se tho for a signe and memorial. Numbers 16:39 Therfor Eleazar, preest, took the brasun senseris, in whiche censeris thei whiche the brennyng deuouride hadden offrid, and he brouyt forth tho in to platis, and nailide to the auter; Numbers 16:40 that the sones of Israel schulden haue thingis aftirward, bi whiche thei schulden remembre, lest ony alien, and which is not of the seed of Aaron, neiy to offre encense to the Lord, lest he suffre, as Chore sufferide, and al his multitude, while the Lord spak to Moises.

Fourteen thousand and seven hundred are slain by a plague for murmuring against Moses and Aaron.

Numbers 16:41 Forsothe al the multitude of the sones of Israel grutchide in the dai suynge ayens Moises and Aaron, and seide, Ye han slayn the puple of the Lord. Numbers 16:42 And whanne discensioun roos, Numbers 16:43 and noise encresside, Moises and Aaron fledden to the tabernacle of the boond of pees; and aftir that thei entriden in to it, a cloude hilide the tabernacle, and the glorie of the Lord apperide.

Numbers 16:44 And the Lord seide to Moises and to Aaron, Numbers 16:45 Go ye awey fro the myddis of this multitude, also now Y schal do awey hem. And whanne thei laien in the erthe, Moises seide to Aaron,

Aaron by incense stayeth the plague.

Numbers 16:46 Take the censer, and whanne fyer is takun vp of the auter, caste encense aboue, and go soone to the puple, that thou preye for hem; for now ire is gon out fro the Lord, and the wounde is feers. Numbers 16:47 And whanne Aaron hadde do this, and hadde runne to the myddis of the multitude, which the brennynge wastid thanne, he offeride encense; Numbers 16:48 and he stood bytwixe the deed men and lyuynge, and bisouyte for the puple, and the wounde ceesside. Numbers 16:49 Sotheli thei that weren smytun weren fourtene thousynde of men and seuene hundrid, with outen hem that perischiden in the discencioun of Chore. Numbers 16:50 And Aaron turnyde ayen to Moyses, to the dore of the tabernacle of boond of pees, aftir that the perischyng restide.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook