God rebuketh the sedition of Miriam and Aaron.
Numbers 12:1 And Marie spak and Aaron ayens Moises, for his wijf a womman of Ethiope, Numbers 12:2 and seiden, Whethir God spak oneli by Moises? whethir he spak not also to vs in lijk maner? And whanne the Lord hadde herd this, he was wrooth greetli; Numbers 12:3 for Moises was the myldest man, ouer alle men that dwelliden in erthe. Numbers 12:4 And anoon the Lord spak to Moises and to Aaron and to Marye, Go out ye thre aloone to the tabernacle of boond of pees. And whanne thei weren gon yn, Numbers 12:5 the Lord cam doun in a piler of cloude, and he stood in the entryng of the tabernacle, and clepide Aaron and Marie. Numbers 12:6 And whanne thei hadden go, he seide to hem, Here ye my wordis; if ony among you is a profete of the Lord, Y schal appere to hym in reuelacioun, ethir Y schal speke to hym bi a dreem. Numbers 12:7 And he seide, And my seruaunt Moises is not siche, which is moost feithful in al myn hows; Numbers 12:8 for Y speke to hym mouth to mouth, and he seeth God opynli, and not bi derke spechis and figuris. Why therfor dredden ye not to bacbite ether depraue my seruaunt Moises? Numbers 12:9 And the Lord was wrooth ayens hem, and he wente a wei.
Miriam's leprosy is healed at the prayer of Moses.
Numbers 12:10 And the cloude yede awei, that was on the tabernacle and lo! Marie apperide whijt with lepre as snow. And whanne Aaron biheelde hir, and siy hir bispreynd with lepre, Numbers 12:11 he seide to Moises, My lord, Y beseche, putte thou not this synne on vs, Numbers 12:12 which we diden folili, that this womman be not maad as deed, and as a deed borun thing which is cast out of the wombe of his modir; lo! now the half of hir fleisch is deuourid with lepre. Numbers 12:13 And Moises criede to the Lord, and seide, Lord, Y biseche, heele thou hir.
God commandeth her to be shut out of the host.
Numbers 12:14 To whom the Lord answerid, If hir fadir hadde spet in to hir face, where sche ouyte not to be fillid with schame, nameli in seuene daies? Therfor be sche departid out of the tentis bi seuen daies, and aftirward sche schal be clepid ayen. Numbers 12:15 And so Marie was excludid out of the tentis bi seuene daies; and the puple was not mouyd fro that place, til Marie was clepid ayen. Numbers 12:16 And the puple yede forth fro Asseroth, whanne the tentis weren set in the deseert of Pharan.