Upon the reading of the Law, separation is made from the mixed multitude.
Nehemiah 13:1 Forsothe in that dai it was red in the book of Moises, in heryng of the puple; and it was foundun writun ther ynne, that Amonytis and Moabitis owen not entre in to the chirche of God til in to with outen ende; Nehemiah 13:2 for thei metten not the sones of Israel with breed and watir, and thei hiriden ayens the sones of Israel Balaam, for to curse hem; and oure God turnede the cursyng in to blessyng. Nehemiah 13:3 Sotheli it was doon, whanne thei hadden herd the lawe, thei departiden ech alien fro Israel.
Nehemiah at his return causeth the chambers to be cleansed.
Nehemiah 13:4 And upon these thingis Eliasib, the prest, was blameful, that was the souereyn in the tresorie of the hows of oure God, and was the neiybore of Tobie. Nehemiah 13:5 Therfor he made to him a grete treserie, that is, in the hows of God; and men kepynge yiftis, and encence, and vessels, and the tithe of wheete, of wyn, and of oile, the partis of dekenes, and of syngeris, and of porteris, and the firste fruytis of prestis, weren there bifor him. Nehemiah 13:6 Forsothe in alle these thingis Y was not in Jerusalem; for in the two and thrittithe yeer of Artaxerses, kyng of Babiloyne, Y cam to the kyng, and in the ende of daies Y preiede the kyng. Nehemiah 13:7 And Y cam in to Jerusalem, and Y vndurstood the yuel, which Eliasib hadde do to Tobie, to make to hym a tresour in the porchis of Goddis hows; and to me it semede ful yuel. Nehemiah 13:8 And Y castide forth the vessels of the hows of Tobie out of the tresorie; Nehemiah 13:9 and Y comaundide, and thei clensiden the tresories; and Y brouyte ayen there the vessels of Goddis hous, sacrifice, and encence.
He reformeth the offices in the house of God.
Nehemiah 13:10 And Y knew that the partes of dekenes weren not youun, and that ech man of the dekenes and of the syngeris, and of hem that mynystriden hadde fledde in to his cuntrei; Nehemiah 13:11 and Y dide the cause ayens magistratis, and Y seide, Whi forsaken we the hous of God? And Y gaderide hem togidere, that is, dekenes and mynystris that hadden go awei, and Y made hem to stonde in her stondyngis. Nehemiah 13:12 And al Juda brouyte the tithe of wheete, of wiyn, and of oile, in to bernes. Nehemiah 13:13 And we ordeyneden on the bernes, Selemye, the prest, and Sadoch, the writere, and Phadaie, of the dekenes, and bisidis hem, Anan, the sone of Zaccur, the sone of Mathanye; for thei weren preued feithful men, and the partis of her britheren weren bitakun to hem. Nehemiah 13:14 My God, haue mynde of me for this thing, and do thou not awei my merciful doyngis, whiche Y dide in the hows of my God, and in hise cerymonyes.
The violation of the Sabbath,
Nehemiah 13:15 Yn tho daies Y siy in Juda men tredinge pressours in the sabat, men bryngynge hepis, and chargynge on assis wiyn, and grapis, and figis, and al birthun, and bringynge in to Jerusalem in the dai of sabat; and Y witnesside to hem, that thei schulden sille in the dai, in which it was leueful to sille. Nehemiah 13:16 And men of Tire dwelliden in it, and brouyten in fischis, and alle thingis set to sale, and thei selden in the sabatis to the sones of Juda and of Jerusalem. Nehemiah 13:17 And Y rebuykide the principal men of Juda, and Y seide to hem, What is this yuel thing which ye doen, and maken vnhooli the daie of the sabat? Nehemiah 13:18 Whether oure fadris diden not these thingis, and oure God brouyte on vs al this yuel, and on this citee? and ye encreessen wrathfulnesse on Israel, in defoulynge the sabat. Nehemiah 13:19 Forsothe it was doon, whanne the yatis of Jerusalem hadden restid in the dai of sabat, Y seide, Schitte ye the yatis; and thei schittiden the yatis; and I comaundide, that thei schuden not opene tho yatis til aftir the sabat. And of my children Y ordeynede noumbris on the yatis, that no man schulde brynge in a birthun in the dai of sabat. Nehemiah 13:20 And marchauntis, and men sillinge alle thingis set to sale dwelliden with out Jerusalem onys and twies. Nehemiah 13:21 And Y aresonyde hem, and Y seide to hem, Whi dwellen ye euene ayens the wal? If ye doon this the secounde tyme, Y schal sette hond on you. Therfor fro that tyme thei camen not in the sabat. Nehemiah 13:22 Also Y seide to dekenes, that thei schulden be clensid, and that thei schulden come to kepe the yatis, and to halowe the dai of sabat. And therfor for this thing, my God, haue mynde of me, and spare me bi the mychilnesse of thi merciful doyngis.
and the marriages with strange wives.
Nehemiah 13:23 But also in tho daies Y siy Jewys weddinge wyues, wymmen of Azotus, and wymmen of Amonytis, and wymmen of Moabitis. Nehemiah 13:24 And her children spaken half part bi the speche of Ayotus, and kouden not speke bi the speche of Jewis, and thei spaken bi the langage of puple and of puple. Nehemiah 13:25 And Y rebuykide hem, and Y curside; and Y beet the men of hem, and Y made hem ballid, and Y made hem to swere bi the Lord, that thei schulden not yyue her douytris to the sones of tho aliens, and that thei schulden not take of the douytris of tho aliens to her sones, and to hem silf; Nehemiah 13:26 and Y seide, Whether Salomon, the kyng of Israel, synnede not in siche a thing? And certis in many folkis was no kyng lijk hym, and he was loued of his God, and God settide hym kyng on al Israel, and therfor alien wymmen brouyten hym to synne. Nehemiah 13:27 Whether also we vnobedient schulden do al this grete yuel, that we trespasse ayens oure Lord God, and wedde alien wyues? Nehemiah 13:28 Forsothe Sanabalath Horonyte hadde weddid a douyter of the sones of Joiada, sone of Eliasib, the grete prest, which Sanaballath Y droof awei fro me. Nehemiah 13:29 My Lord God, haue mynde ayens hem, that defoulen presthod, and the riyt of prestis and of dekenes. Nehemiah 13:30 Therfor I clenside hem fro alle aliens, and I ordeynede ordris of prestis and of dekenes, ech man in his seruice, and in the offring, Nehemiah 13:31 that is, dressing, of trees in tymes ordeyned, and in the firste fruytis. My God, haue mynde of me in to good.