Christ's resurrection is declared by an angel to the women.
Matthew 28:1 But in the euentid of the sabat, that bigynneth to schyne in the firste dai of the woke, Marie Mawdelene cam, and another Marie, to se the sepulcre. Matthew 28:2 And lo! ther was maad a greet ertheschakyng; for the aungel of the Lord cam doun fro heuene, and neiyede, and turnede awei the stoon, and sat theron. Matthew 28:3 And his lokyng was as leit, and hise clothis as snowe; Matthew 28:4 and for drede of hym the keperis weren afeerd, and thei weren maad as deede men. Matthew 28:5 But the aungel answeride, and seide to the wymmen, Nyle ye drede, for Y woot that ye seken Jhesu, that was crucified; Matthew 28:6 he is not here, for he is risun, as he seide; come ye, and se ye the place, where the Lord was leid. Matthew 28:7 And go ye soone, and seie ye to his disciplis, that he is risun. And lo! he schal go bifore you in to Galilee; there ye schulen se hym. Matthew 28:8 Lo! Y haue biforseid to you. And thei wenten out soone fro the biriels, with drede and greet ioye, rennynge to telle to hise disciplis.
He himself appeareth unto them.
Matthew 28:9 And lo! Jhesus mette hem, and seide, Heile ye. And thei neiyeden, and heelden his feet, and worschipiden him. Matthew 28:10 Thanne Jhesus seide to hem, Nyle ye drede; go ye, telle ye to my britheren, that thei go in to Galile; there thei schulen se me.
The chief priests give the soldiers money to say that he was stolen out of his sepulchre.
Matthew 28:11 And whanne thei weren goon, lo! summe of the keperis camen in to the citee, and telden to the princis of prestis alle thingis that weren doon. Matthew 28:12 And whanne thei weren gaderid togidere with the elder men, and hadden take her counseil, thei yauen to the kniytis miche monei, Matthew 28:13 and seiden, Seie ye, that hise disciplis camen bi nyyt, and han stolen hym, while ye slepten. Matthew 28:14 And if this be herd of the iustice, we schulen counseile hym, and make you sikir. Matthew 28:15 And whanne the monei was takun, thei diden, as thei weren tauyt. And this word is pupplischid among the Jewis, til in to this day.
Christ appeareth to his disciples,
Matthew 28:16 And the enleuen disciplis wenten in to Galilee, in to an hille, where Jhesus hadde ordeyned to hem. Matthew 28:17 And thei sayn hym, and worschipiden; but summe of hem doutiden. Matthew 28:18 And Jhesus cam nyy, and spak to hem, and seide, Al power in heuene and in erthe is youun to me.
and sendeth them to baptize and teach all nations.
Matthew 28:19 Therfor go ye, and teche alle folkis, baptisynge hem in the name of the Fadir, and of the Sone, and of the Hooli Goost; Matthew 28:20 techynge hem to kepe alle thingis, what euer thingis Y haue comaundid to you; and lo! Y am with you in alle daies, in to the ende of the world.