Wycliffe Bible

Matthew 21

Christ rideth into Jerusalem upon an ass,

Matthew 21:1 And whanne Jhesus cam nyy to Jerusalem, and cam to Bethfage, at the mount of Olyuete, thanne sente he his twei disciplis, and seide to hem, Matthew 21:2 Go ye in to the castel that is ayens you, and anoon ye schulen fynde an asse tied, and a colt with hir; vntien ye, and brynge to me. Matthew 21:3 And if ony man seie to you ony thing, seie ye, that the Lord hath nede to hem; and anoon he schal leeue hem. Matthew 21:4 Al this was doon, that that thing schulde be fulfillid, that was seid bi the prophete, seiynge, Seie ye to the douyter of Syon, Lo! Matthew 21:5 thi kyng cometh to thee, meke, sittynge on an asse, and a fole of an asse vnder yok. Matthew 21:6 And the disciplis yeden, and diden as Jhesus comaundide hem. Matthew 21:7 And thei brouyten an asse, and the fole, and leiden her clothis on hem, and maden hym sitte aboue. Matthew 21:8 And ful myche puple strewiden her clothis in the weie; othere kittiden braunchis of trees, and strewiden in the weie. Matthew 21:9 And the puple that wente bifore, and that sueden, crieden, and seiden, Osanna to the sone of Dauid; blessid is he that cometh in the name of the Lord; Osanna in hiy thingis. Matthew 21:10 And whanne he was entrid in to Jerusalem, al the citee was stirid, and seide, Who is this? Matthew 21:11 But the puple seide, This is Jhesus, the prophete, of Nazareth of Galilee.

driveth the buyers and sellers out of the Temple,

Matthew 21:12 And Jhesus entride in to the temple of God, and castide out of the temple alle that bouyten and solden; and he turnede vpsedoun the bordis of chaungeris, and the chayeris of men that solden culueris. Matthew 21:13 And he seith to hem, It is writun, Myn hous schal be clepid an hous of preier; but ye han maad it a denne of theues. Matthew 21:14 And blynde and crokid camen to hym in the temple, and he heelide hem. Matthew 21:15 But the princis of prestis and scribis, seynge the merueilouse thingis that he dide, and children criynge in the temple, and seiynge, Osanna to the sone of Dauid, hadden indignacioun, Matthew 21:16 and seiden to hym, Herist thou what these seien? And Jhesus seide to hem, Yhe; whether ye han neuer redde, That of the mouth of yonge children, and of soukynge childryn, thou hast maad perfit heriyng?

curseth the fig tree,

Matthew 21:17 And whanne he hadde left hem, he wente forth out of the citee, in to Bethanye; and there he dwelte, and tauyte hem of the kyngdom of God. Matthew 21:18 But on the morowe, he, turnynge ayen in to the citee, hungride. Matthew 21:19 And he saye a fige tree bisidis the weie, and cam to it, and foond no thing ther ynne but leeues oneli. And he seide to it, Neuer fruyt come forth of thee, in to with outen eende, And anoon the fige tre was dried vp. Matthew 21:20 And disciplis sawen, and wondriden, seiynge, Hou anoon it driede. Matthew 21:21 And Jhesus answeride, and seide to hem, Treuli Y seie to you, if ye haue feith, and douten not, not oonli ye schulen do of the fige tree, but also if ye seyn to this hil, Take, and caste thee in to the see, it schal be don so. Matthew 21:22 And alle thingis what euere ye bileuynge schulen axe in preyer, ye schulen take.

putteth to silence the priests and elders,

Matthew 21:23 And whanne he cam in to the temple, the princis of prestis and elder men of the puple camen to hym that tauyte, and seiden, In what power doist thou these thingis? and who yaf thee this power? Matthew 21:24 Jhesus answeride, and seide to hem, And Y schal axe you o word, the which if ye tellen me, Y schal seie to you, in what power Y do these thingis. Matthew 21:25 Of whennys was the baptym of Joon; of heuene, or of men? And thei thouyten with ynne hem silf, Matthew 21:26 seiynge, If we seien of heuene, he schal seie to vs, Whi thanne bileuen ye not to hym? If we seien of men, we dreden the puple, for alle hadden Joon as a prophete. Matthew 21:27 And thei answeriden to Jhesu, and seiden, We witen not. And he seide to hem, Nether Y seie to you, in what power Y do these thingis.

and rebuketh them by the similitude of the two sons,

Matthew 21:28 But what semeth to you? A man hadde twey sones; and he cam to the firste, and seide, Sone, go worche this dai in my vyneyerd. Matthew 21:29 And he answeride, and seide, Y nyle; but afterward he forthouyte, and wente forth. Matthew 21:30 But he cam to the tother, and seide on lijk maner. And he answeride, and seide, Lord, Y go; and he wente not. Matthew 21:31 Who of the tweyne dide the fadris wille? Thei seien to hym, The firste. Jhesus seith to hem, Treuli Y seie to you, for pupplicans and hooris schulen go bifor you in to the kyngdom of God. Matthew 21:32 For Joon cam to you in the weie of riytwisnesse, and ye bileueden not to him; but pupplicans and hooris bileueden to hym. But ye sayn, and hadden no forthenkyng aftir, that ye bileueden to hym.

and the husbandmen, who slew such as were sent unto them.

Matthew 21:33 Here ye another parable. There was an hosebonde man, that plauntide a vynyerd, and heggide it aboute, and dalfe a presour ther ynne, and bildide a tour, and hiride it to erthe tilieris, and wente fer in pilgrimage. Matthew 21:34 But whanne the tyme of fruytis neiyede, he sente his seruauntis to the erthe tilieris, to take fruytis of it. Matthew 21:35 And the erthetilieris token his seruauntis, and beeten the toon, thei slowen another, and thei stonyden another. Matthew 21:36 Eftsoone he sente othere seruauntis, mo than the firste, and in lijk maner thei diden to hem. Matthew 21:37 And at the laste he sente his sone to hem, and seide, Thei schulen drede my sone. Matthew 21:38 But the erthe tilieris, seynge the sone, seiden with ynne hem silf, This is the eire; come ye, sle we hym, and we schulen haue his eritage. Matthew 21:39 And thei token, and castiden hym out of the vynyerd, and slowen hym. Matthew 21:40 Therfor whanne the lord of the vyneyerd schal come, what schal he do to thilke erthe tilieris? Matthew 21:41 Thei seien to hym, He schal leese yuele the yuele men, and he schal sette to hire his vyneyerd to othere erthetilieris, whyche schulen yelde to hym fruyt in her tymes. Matthew 21:42 Jhesus seith to hem, Redden ye neuer in scripturis, The stoon which bilderis repreueden, this is maad in to the heed of the corner? Of the Lord this thing is don, and it is merueilous bifor oure iyen. Matthew 21:43 Therfor Y seie to you, that the kyngdom of God schal be takun fro you, and shal be youun to a folc doynge fruytis of it. Matthew 21:44 And he that schal falle on this stoon, schal be brokun; but on whom it schal falle, it schal al tobrise hym. Matthew 21:45 And whanne the princes of prestis and Farisees hadden herd hise parablis, thei knewen that he seide of hem. Matthew 21:46 And thei souyten to holde hym, but thei dredden the puple, for thei hadden hym as a prophete.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook