Wycliffe Bible

Matthew 18

Christ warneth his disciples to be humble and harmless:

Matthew 18:1 In that our the disciplis camen to Jhesu, and seiden, Who, gessist thou, is gretter in the kyngdom of heuenes? Matthew 18:2 And Jhesus clepide a litil child, and putte hym in the myddil of hem; Matthew 18:3 and seide, Y seie treuthe to you, but ye be turned, and maad as litle children, ye schulen not entre in to the kyngdom of heuenes. Matthew 18:4 Therfor who euer mekith hym as this litil child, he is gretter in the kyngdom of heuenes. Matthew 18:5 And he that resseyueth o siche litil child in my name, resseyueth me. Matthew 18:6 But who so sclaundrith oon of these smale, that bileuen in me, it spedith to hym that a mylnstoon of assis be hangid in his necke, and he be drenchid in the depnesse of the see.

to avoid offences, and not to despise the little ones:

Matthew 18:7 Woo to the world, for sclaundris; for it is nede that sclaundris come; netheles wo to thilke man bi whom a sclaundre cometh. Matthew 18:8 And if thin hoond or thi foot sclaundreth thee, kitte it of, and caste awei fro thee. It is betere to thee to entre to lijf feble, ethir crokid, than hauynge tweyne hoondis or twey feet to be sent in to euerlastynge fier. Matthew 18:9 And if thin iye sclaundre thee, pulle it out, and caste awei fro thee. It is betere to thee with oon iye to entre in to lijf, thanne hauynge tweyn iyen to be sent in to the fier of helle. Matthew 18:10 Se ye, that ye dispise not oon of these litle. For Y seie to you, that the aungels of hem in heuenes seen euermore the face of my fadir that is in heuenes. Matthew 18:11 For mannus sone cam to saue that thing that perischide. Matthew 18:12 What semeth to you? If ther weren to sum man an hundrid scheep, and oon of hem hath errid, whethir he schal not leeue nynti and nyne in desert, and schal go to seche that that erride? Matthew 18:13 And if it falle that he fynde it, treuli Y seie to you, that he schal haue ioye theron more than on nynti and nyne that erriden not. Matthew 18:14 So it is not the wille bifor youre fadir that is in heuenes, that oon of these litle perische.

teacheth how we are to deal with our brethren, when they offend us:

Matthew 18:15 But if thi brother synneth ayens thee, go thou, and repreue hym, bitwixe thee and hym aloone; if he herith thee, thou hast wonnun thi brother. Matthew 18:16 And if he herith thee not, take with thee oon or tweyne, that euery word stonde in the mouth of tweyne or thre witnessis. Matthew 18:17 And if he herith not hem, seie thou to the chirche. But if he herith not the chirche, be he as an hethen and a pupplican to thee. Matthew 18:18 Y seie to you treuli, what euer thingis ye bynden on erthe, tho schulen be boundun also in heuene; and what euer thingis ye vnbynden on erthe, tho schulen be vnboundun also in heuene. Matthew 18:19 Eftsoone Y seie to you, that if tweyne of you consenten on the erthe, of euery thing what euer thei axen, it schal be don to hem of my fadir that is in heuenes. Matthew 18:20 For where tweyne or thre ben gaderid in my name, there Y am in the myddil of hem.

and how oft to forgive them:

Matthew 18:21 Thanne Petre cam to hym, and seide, Lord, how ofte schal my brother synne ayens me, and Y schal foryyue hym? Matthew 18:22 Whether til seuen tymes? Jhesus seith to hym, Y seie not to thee, til seuene sithis; but til seuenti sithis seuene sithis.

which he setteth forth by a parable of the king, that took account of his servants,

Matthew 18:23 Therfor the kyngdom of heuenes is licned to a kyng, that wolde rekyn with hise seruauntis. Matthew 18:24 And whanne he bigan to rekene, oon that ouyte ten thousynde talentis, was brouyt to hym. Matthew 18:25 And whanne he hadde not wherof to yelde, his lord comaundide hym to be seld, and his wijf, and children, and alle thingis that he hadde, and to be paied. Matthew 18:26 But thilke seruaunt felde doun, and preiede hym, and seide, Haue pacience in me, and Y schal yelde to thee alle thingis. Matthew 18:27 And the lord hadde merci on that seruaunt, and suffride hym to go, and foryaf to hym the dette. Matthew 18:28 But thilke seruaunt yede out, and foonde oon of his euen seruauntis, that ouyte hym an hundrid pens; and he helde hym, and stranglide hym, and seide, Yelde that that thou owest. Matthew 18:29 And his euen seruaunt felle doun, and preyede hym, and seide, Haue pacience in me, and Y schal quyte alle thingis to thee. Matthew 18:30 But he wolde not; but wente out, and putte hym in to prisoun, til he paiede al the dette. Matthew 18:31 And hise euen seruauntis, seynge the thingis that weren don, soreweden greetli. And thei camen, and telden to her lord alle the thingis that weren don.

and punished him, who shewed no mercy to his fellow.

Matthew 18:32 Thanne his lord clepide hym, and seide to hym, Wickid seruaunt, Y foryaf to thee al the dette, for thou preiedist me. Matthew 18:33 Therfor whether it bihouede not also thee to haue merci on thin euen seruaunt, as Y hadde merci on thee? Matthew 18:34 And his lord was wroth, and took hym to turmentouris, til he paiede al the dette. Matthew 18:35 So my fadir of heuene schal do to you, if ye foryyuen not euery man to his brother, of youre hertes.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook