Wycliffe Bible

Matthew 13

Matthew 13:1 In that dai Jhesus yede out of the hous, and sat bisidis the see. Matthew 13:2 And myche puple was gaderid to hym, so that he wente up in to a boot, and sat; and al the puple stood on the brenke.

The parable of the sower and the seed:

Matthew 13:3 And he spac to hem many thingis in parablis, and seide, Lo! he that sowith, yede out to sowe his seed. Matthew 13:4 And while he sowith, summe seedis felden bisidis the weie, and briddis of the eir camen, and eeten hem. Matthew 13:5 But othere seedis felden in to stony places, where thei hadden not myche erthe; and anoon thei sprongen vp, for thei hadden not depnesse of erthe. Matthew 13:6 But whanne the sonne was risun, thei swaliden, and for thei hadden not roote, thei drieden vp. Matthew 13:7 And other seedis felden among thornes; and thornes woxen vp, and strangeleden hem. Matthew 13:8 But othere seedis felden in to good lond, and yauen fruyt; summe an hundrid foold, an othir sixti foold, an othir thritti foold. Matthew 13:9 He that hath eris of heryng, here he. Matthew 13:10 And the disciplis camen nyy, and seiden to him, Whi spekist thou in parablis to hem? Matthew 13:11 And he answeride, and seide to hem, For to you it is youun to knowe the priuytees of the kyngdom of heuenes; but it is not youun to hem. Matthew 13:12 For it shal be youun to hym that hath, and he shal haue plente; but if a man hath not, also that thing that he hath shal be takun awei fro hym. Matthew 13:13 Therfor Y speke to hem in parablis, for thei seynge seen not, and thei herynge heren not, nether vndurstonden; Matthew 13:14 that the prophesie of Ysaie seiynge be fulfillid in hem, With heryng ye schulen here, and ye shulen not vndurstonde; and ye seynge schulen se, and ye shulen not se; Matthew 13:15 for the herte of this puple is greetli fattid, and thei herden heuyli with eeris, and thei han closed her iyen, lest sumtime thei seen with iyen, and with eeris heeren, and vndirstonden in herte, and thei be conuertid, and Y heele hem. Matthew 13:16 But youre iyen that seen ben blesside, and youre eeris that heren. Matthew 13:17 Forsothe Y seie to you, that manye profetis and iust men coueitiden to se tho thingis that ye seen, and thei sayn not, and to heere tho thingis that ye heren, and thei herden not.

the exposition of it.

Matthew 13:18 Therfor here ye the parable of the sowere. Matthew 13:19 Ech that herith the word of the rewme, and vndirstondith not, the yuel spirit cometh, and rauyschith that that is sowun in his herte; this it is, that is sowun bisidis the weie. Matthew 13:20 But this that is sowun on the stony loond, this it is, that herith the word of God, and anoon with ioye takith it. Matthew 13:21 And he hath not roote in hym silf, but is temporal. For whanne tribulacioun and persecucioun is maad for the word, anoon he is sclaundrid. Matthew 13:22 But he that is sowun in thornes, is this that heerith the word, and the bisynesse of this world, and the fallace of ritchessis strangulith the word, and it is maad with outen fruyt. Matthew 13:23 But he that is sowun in to good loond, is this that herith the word, and vnderstondeth, and bryngith forth fruyt. And summe makith an hundrid fold, treuli anothir sixti fold, and another thritti fold.

The parable of the tares,

Matthew 13:24 Anothir parable Jhesus puttide forth to hem, and seide, The kyngdom of heuenes is maad lijk to a man, that sewe good seed in his feld. Matthew 13:25 And whanne men slepten, his enemy cam, and sewe aboue taris in the myddil of whete, and wente awei. Matthew 13:26 But whanne the erbe was growed, and made fruyt, thanne the taris apperiden. Matthew 13:27 And the seruauntis of the hosebonde man camen, and seiden to hym, Lord, whether hast thou not sowun good seed in thi feeld? where of thanne hath it taris? Matthew 13:28 And he seide to hem, An enemy hath do this thing. And the seruauntis seiden to him, Wolt thou that we goon, and gaderen hem? Matthew 13:29 And he seide, Nay, lest perauenture ye in gaderynge taris drawen vp with hem the whete bi the roote. Matthew 13:30 Suffre ye hem bothe to wexe in to repyng tyme; and in the tyme of ripe corne Y shal seie to the reperis, First gadere ye to gidere the taris, and bynde hem to gidere in knytchis to be brent, but gadere ye whete in to my berne.

of the mustard seed,

Matthew 13:31 Another parable Jhesus puttide forth to hem, and seide, The kyngdom of heuenes is lijk to a corn of seneuey, which a man took, and sewe in his feeld. Matthew 13:32 Which is the leeste of alle seedis, but whanne it hath woxen, it is the moste of alle wortis, and is maad a tre; so that briddis of the eir comen, and dwellen in the bowis therof.

of the leaven,

Matthew 13:33 Another parable Jhesus spac to hem, The kyngdom of heuenes is lijk to sour douy, which a womman took, and hidde in thre mesuris of mele, til it were alle sowrid. Matthew 13:34 Jhesus spac alle thes thingis in parablis to the puple, and he spac not to hem with out parablis, that it schulde be fulfillid, Matthew 13:35 that is seid bi the prophete, seiynge, Y shal opene my mouth in parablis; Y shal telle out hid thingis fro the makyng of the world. Matthew 13:36 Thanne he lefte the puple, and cam in to an hous; and hise disciplis camen to him, and seiden, Expowne to vs the parable of taris of the feeld. Matthew 13:37 Which answeride, and seide, He that sowith good seed is mannus sone; Matthew 13:38 the feeld is the world; but the good seed, these ben sones of the kyngdom, but taris, these ben yuele children; Matthew 13:39 the enemye that sowith hem is the feend; and the ripe corn is the endyng of the world, the reperis ben aungels. Matthew 13:40 Therfor as taris ben gaderid togidere, and ben brent in fier, so it shal be in the endyng of the world. Matthew 13:41 Mannus sone shal sende hise aungels, and thei schulen gadere fro his rewme alle sclaundris, and hem that doon wickidnesse; Matthew 13:42 and thei schulen sende hem in to the chymney of fier, there shal be weping and betyng to gidere of teeth. Matthew 13:43 Thanne iuste men schulen schyne as the sunne, in the rewme of her fadir. He that hath eeris of heryng, here he.

of the hidden treasure,

Matthew 13:44 The kyngdom of heuenes is lijk to tresour hid in a feld, which a man that fyndith, hidith; and for ioye of it he goith, and sillith alle thingis that he hath, and bieth thilk feeld.

of the pearl,

Matthew 13:45 Eftsoone the kyngdom of heuenes is lijk to a marchaunt, that sechith good margaritis; Matthew 13:46 but whanne he hath foundun o precious margarite, he wente, and selde alle thingis that he hadde, and bouyte it.

of the drawnet cast into the sea,

Matthew 13:47 Eft the kyngdom of heuenes is lijk to a nette cast into the see, and that gaderith to gidere of al kynde of fisschis; Matthew 13:48 which whanne it was ful, thei drowen vp, and seten bi the brenke, and chesen the goode in to her vessels, but the yuel thei kesten out. Matthew 13:49 So it schal be in the endyng of the world. Aungels schulen go out, and schulen departe yuel men fro the myddil of iuste men. Matthew 13:50 And thei shulen sende hem in to the chymnei of fier; ther shal be weping and gryntyng of teeth. Matthew 13:51 Han ye vndirstonde alle these thingis? Thei seien to hym, Yhe. Matthew 13:52 He seith to hem, Therfor euery wise man of lawe in the kyngdom of heuenes, is lijk to an hosebonde man, that bryngith forth of his tresoure newe thingis and elde.

and how Christ is contemned of his own countrymen.

Matthew 13:53 And it was doon, whanne Jhesus hadde endid these parablis, he passide fro thennus. Matthew 13:54 And he cam in to his cuntrei, and tauyte hem in her synagogis, so that thei wondriden, and seiden, Fro whennus this wisdam and vertues camen to this? Matthew 13:55 Whether is not this the sone of a carpentere? Whether his modir be not seid Marie? and hise britheren, James, and Joseph, and Symount, and Judas? and hise sistris, Matthew 13:56 whether thei alle ben not among us? Fro whennus thanne alle thes thingis camen to this? Matthew 13:57 And so thei weren sclaundrid in hym. But Jhesus seide to hem, A profete is not with oute worschip, but in his owen cuntre, and in his owen hous. Matthew 13:58 And he dide not there manye vertues, for the vnbileue of hem.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook