Wycliffe Bible

Matthew 10

Christ sendeth out his twelve Apostles, enabling them with power to do miracles,

Matthew 10:1 And whanne his twelue disciplis weren clepid togidere, he yaf to hem powere of vnclene spiritis, to caste hem out of men, and to heele eueri langour, and sijknesse. Matthew 10:2 And these ben the names of the twelue apostlis; the firste, Symount, that is clepid Petre, and Andrew, his brothir; James of Zebede, and Joon, his brothir; Filip, and Bartholomeu; Matthew 10:3 Thomas, and Matheu, pupplican; and James Alfey, and Tadee; Matthew 10:4 Symount Chananee, and Judas Scarioth, that bitrayede Crist.

giveth them their charge, teacheth them,

Matthew 10:5 Jhesus sente these twelue, and comaundide hem, and seide, Go ye not in to the weie of hethene men, and entre ye not in to the citees of Samaritans; Matthew 10:6 but rather go ye to the scheep of the hous of Israel, that han perischid. Matthew 10:7 And go ye, and preche ye, and seie, that the kyngdam of heuenes shal neiye; Matthew 10:8 heele ye sike men, reise ye deede men, clense ye mesels, caste ye out deuelis; freeli ye han takun, freli yyue ye. Matthew 10:9 Nyle ye welde gold, nether siluer, ne money in youre girdlis, not a scrippe in the weie, Matthew 10:10 nether twei cootis, nethir shoon, nether a yerde; for a werkman is worthi his mete. Matthew 10:11 In to what euere citee or castel ye schulen entre, axe ye who therynne is worthi, and there dwelle ye, til ye go out. Matthew 10:12 And whanne ye goon in to an hous, grete ye it, and seyn, Pees to this hous. Matthew 10:13 And if thilk hous be worthi, youre pees schal come on it; but if that hous be not worthi, youre pees schal turne ayen to you. Matthew 10:14 And who euere resseyueth not you, nethir herith youre wordis, go ye fro that hous or citee, and sprenge of the dust of youre feet. Matthew 10:15 Treuly Y seie to you, it shal be more suffrable to the loond of men of Sodom and of Gommor in the dai of iugement, than to thilke citee.

comforteth them against persecutions:

Matthew 10:16 Lo! Y sende you as scheep in the myddil of wolues; therfor be ye sliy as serpentis, and symple as dowues. Matthew 10:17 But be ye war of men, for thei schulen take you in counseilis, and thei schulen bete you in her synagogis; Matthew 10:18 and to meyris, or presidentis, and to kyngis, ye schulen be lad for me, in witnessyng to hem, and to the hethen men. Matthew 10:19 But whanne thei take you, nyle ye thenke, hou or what thing ye schulen speke, for it shal be youun to you in that our, what ye schulen speke; Matthew 10:20 for it ben not ye that speken, but the spirit of youre fadir, that spekith in you. Matthew 10:21 And the brother shal take the brother in to deeth, and the fader the sone, and sones schulen rise ayens fadir and modir, and schulen turmente hem bi deeth. Matthew 10:22 And ye schulen be in hate to alle men for my name; but he that shall dwelle stille in to the ende, shal be saaf. Matthew 10:23 And whanne thei pursuen you in this citee, fle ye in to anothir. Treuli Y seie to you, ye schulen not ende the citees of Israel, to for that mannus sone come. Matthew 10:24 The disciple is not aboue the maistir, ne the seruaunt aboue hys lord; Matthew 10:25 it is ynowy to the disciple, that he be as his maistir, and to the seruaunt as his lord. If thei han clepid the hosebonde man Belsabub, hou myche more his houshold meyne? Matthew 10:26 Therfor drede ye not hem; for no thing is hid, that schal not be shewid; and no thing is priuey, that schal not be wist. Matthew 10:27 That thing that Y seie to you in derknessis, seie ye in the liyt; and preche ye on housis, that thing that ye heeren in the ere. Matthew 10:28 And nyle ye drede hem that sleen the bodi; for thei moun not sle the soule; but rather drede ye hym, that mai lese bothe soule and bodi in to helle. Matthew 10:29 Whether twei sparewis ben not seeld for an halpeny? and oon of hem shal not falle on the erthe with outen youre fadir. Matthew 10:30 And alle the heeris of youre heed ben noumbrid. Matthew 10:31 Therfor nyle ye drede; ye ben betere than many sparewis. Matthew 10:32 Therfor euery man that schal knouleche me bifore men, Y schal knouleche hym bifor my fadir that is in heuenes. Matthew 10:33 But he that shal denye me bifor men, and I shal denye him bifor my fadir that is in heuenes. Matthew 10:34 Nile ye deme, that Y cam to sende pees in to erthe; Y cam not to sende pees, but swerd. Matthew 10:35 For Y cam to departe a man ayens his fadir, and the douytir ayens hir modir, and the sones wijf ayens the housbondis modir; Matthew 10:36 and the enemyes of a man ben thei, that ben homeli with him. Matthew 10:37 He that loueth fadir or modir more than me, is not worthi to me. And he that loueth sone or douyter ouer me, is not worthi to me. Matthew 10:38 And he that takith not his croos, and sueth me, is not worthi to me. Matthew 10:39 He that fyndith his lijf, shal lose it; and he that lesith his lijf for me, shal fynde it.

and promiseth a blessing to those that receive them.

Matthew 10:40 He that resseyueth you, resseyueth me; and he that resseyueth me, resseyueth hym that sente me. Matthew 10:41 He that resseyueth a prophete in the name of a prophete, shal take the mede of a prophete. And he that resseyueth a iust man in the name of a iust man, schal take the mede of a iust man. Matthew 10:42 And who euer yyueth drynke to oon of these leeste a cuppe of coolde watir oonli in the name of a disciple, treuli Y seie to you, he shal not leese his mede.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook