Wycliffe Bible

Mark 13

Christ foretelleth the destruction of the Temple:

Mark 13:1 And whanne he wente out of the temple, oon of hise disciplis seide to hym, Maister, biholde, what maner stoonys, and what maner bildyngis. Mark 13:2 And Jhesu answeride, and seide to hym, Seest thou alle these grete bildingis? ther schal not be left a stoon on a stoon, which schal not be distried. Mark 13:3 And whanne he sat in the mount of Olyues ayens the temple, Petir and James and Joon and Andrew axiden hym bi hem silf, Mark 13:4 Seie thou to vs, whanne these thingis schulen be don, and what tokene schal be, whanne alle these thingis schulen bigynne to be endid. Mark 13:5 And Jhesus answeride, and bigan to seie to hem, Loke ye, that no man disseyue you; Mark 13:6 for manye schulen come in my name, seiynge, That Y am; and thei schulen disseyue manye. Mark 13:7 And whanne ye here batels and opynyouns of batels, drede ye not; for it bihoueth these thingis to be doon, but not yit anoon is the ende. Mark 13:8 For folk schal rise on folk, and rewme on rewme, and erthe mouyngis and hungur schulen be bi placis; these thingis schulen be bigynnyngis of sorewis.

the persecutions for the Gospel:

Mark 13:9 But se ye you silf, for thei schulen take you in counsels, and ye schulen be betun in synagogis; and ye schulen stonde bifor kyngis and domesmen for me, in witnessyng to hem.

that the Gospel must be preached to all nations:

Mark 13:10 And it bihoueth, that the gospel be first prechid among al folk. Mark 13:11 And whanne thei taken you, and leden you forth, nyle ye bifore thenke what ye schulen speke, but speke ye that thing that schal be youun to you in that our; for ye ben not the spekeris, but the Hooli Goost. Mark 13:12 For a brother schal bitake the brother in to deth, and the fadir the sone, and sones schulen rise togider ayens fadris and modris, and punysche hem bi deeth. Mark 13:13 And ye schulen be in hate to alle men for my name; but he that lastith in to the ende, schal be saaf.

that great calamities shall happen to the Jews:

Mark 13:14 But whanne ye schulen se the abhomynacioun of discoumfort, stondynge where it owith not; he that redith, vndurstonde; thanne thei that be in Judee, fle in to hillis. Mark 13:15 And he that is aboue the roof, come not doun in to the hous, nethir entre he, to take ony thing of his hous; Mark 13:16 and he that schal be in the feeld, turne not ayen bihynde to take his cloth. Mark 13:17 But wo to hem that ben with child, and norischen in tho daies. Mark 13:18 Therfor preye ye, that thei be not don in wyntir. Mark 13:19 But thilke daies of tribulacioun schulen be suche, whiche maner weren not fro the bigynnyng of creature, which God hath maad, til now, nethir schulen be. Mark 13:20 And but the Lord hadde abredgide tho daies, al fleische hadde not be saaf; but for the chosun whiche he chees, the Lord hath maad schort the daies. Mark 13:21 And thanne if ony man seie to you, Lo! here is Crist, lo! there, bileue ye not. Mark 13:22 For false Cristis and false prophetis schulen rise, and schulen yyue tokenes and wondris, to disseyue, if it may be don, yhe, hem that be chosun. Mark 13:23 Therfor take ye kepe; lo! Y haue bifor seid to you alle thingis.

and the manner of his coming to judgment:

Mark 13:24 But in tho daies, aftir that tribulacioun, the sunne schal be maad derk, and the moon schal not yyue hir liyt, Mark 13:25 and the sterris of heuene schulen falle doun, and the vertues that ben in heuenes, schulen be moued. Mark 13:26 And thanne thei schulen se mannus sone comynge in cloudis of heuene, with greet vertu and glorie. Mark 13:27 And thanne he schal sende hise aungelis, and schal geder hise chosun fro the foure wyndis, fro the hiyest thing of erthe til to the hiyest thing of heuene. Mark 13:28 But of the fige tree lerne ye the parable. Whanne now his braunche is tendre, and leeues ben sprongun out, ye knowen that somer is nyy. Mark 13:29 So whanne ye seen these thingis be don, wite ye, that it is nyy in the doris. Mark 13:30 Treuli Y seie to you, that this generacioun schal not passe awei, til alle these thingis be don. Mark 13:31 Heuene and erthe schulen passe, but my wordis schulen not passe.

the hour whereof being known to none, every man is to watch and pray, that we be not found unprovided, when he cometh to each one particularly by death.

Mark 13:32 But of that dai or our no man woot, nether aungels in heuene, nether the sone, but the fadir. Mark 13:33 Se ye, wake ye, and preie ye; for ye witen not, whanne the tyme is. Mark 13:34 For as a man that is gon fer in pilgrimage, lefte his hous, and yaf to his seruauntis power of euery work, and comaundide to the porter, that he wake. Mark 13:35 Therfor wake ye, for ye witen not, whanne the lord of the hous cometh, in the euentide, or at mydnyyt, or at cockis crowyng, or in the mornyng; Mark 13:36 leste whanne he cometh sodenli, he fynde you slepynge. Mark 13:37 Forsothe that that Y seie to you, Y seie to alle, Wake ye.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook