Wycliffe Bible

Luke 8

Luke 8:1 And it was don aftirward, and Jhesus made iourney bi citees and castels, prechynge and euangelisynge the rewme of God, and twelue with hym; Luke 8:2 and sum wymmen that weren heelid of wickid spiritis and sijknessis, Marie, that is clepid Maudeleyn, of whom seuene deuelis wenten out,

Women minister unto Christ of their substance.

Luke 8:3 and Joone, the wijf of Chuse, the procuratoure of Eroude, and Susanne, and many othir, that mynystriden to hym of her ritchesse.

Christ, after he had preached from place to place, attended with his Apostles, propoundeth the parable of the sower,

Luke 8:4 And whanne myche puple was come togidir, and men hiyeden to hym fro the citees, he seide bi a symylitude, Luke 8:5 He that sowith, yede out to sowe his seed. And while he sowith, sum fel bisidis the weie, and was defoulid, and briddis of the eir eten it. Luke 8:6 And othir fel on a stoon, and it sprunge vp, and driede, for it hadde not moysture. Luke 8:7 And othir fel among thornes, and the thornes sprongen vp togider, and strangliden it. Luke 8:8 And othir fel in to good erthe, and it sprungun made an hundrid foold fruyt. He seide these thingis, and criede, He that hath eeris of heryng, here he. Luke 8:9 But hise disciplis axiden him, what this parable was. Luke 8:10 And he seide to hem, To you it is grauntid to knowe the pryuete of the kyngdom of God; but to othir men in parablis, that thei seynge se not, and thei herynge vndurstonde not. Luke 8:11 And this is the parable. The seed is Goddis word; Luke 8:12 and thei that ben bisidis the weie, ben these that heren; and aftirward the feend cometh, and takith awei the word fro her herte, lest thei bileuynge be maad saaf. Luke 8:13 But thei that fel on a stoon, ben these that whanne thei han herd, resseyuen the word with ioye. And these han not rootis; for at a tyme thei bileuen, and in tyme of temptacioun thei goen awei. Luke 8:14 But that that fel among thornes, ben these that herden, and of bisynessis, and ritchessis, and lustis of lijf thei gon forth, and ben stranglid, and bryngen forth no fruyt. Luke 8:15 But that that fel in to good erthe, ben these that, in a good herte, and best heren the word, and holdun, and brengen forth fruyt in pacience.

and of the candle:

Luke 8:16 No man lityneth a lanterne, and hilith it with a vessel, or puttith it vndur a bed, but on a candilstike, that men that entren seen liyt. Luke 8:17 For ther is no priuei thing, which schal not be openyd, nether hid thing, which schal not be knowun, and come in to open. Luke 8:18 Therfor se ye, hou ye heren; for it schal be youun to hym that hath, and who euer hath not, also that that he weneth that he haue, schal be takun awei fro hym.

Luke 8:19 And his modir and britheren camen to hym; and thei myyten not come to hym for the puple. Luke 8:20 And it was teeld to hym, Thi modir and thi britheren stonden with outforth, willynge to se thee.

declareth who are his mother, and brethren:

Luke 8:21 And he answeride, and seide to hem, My modir and my britheren ben these, that heren the word of God, and doon it.

rebuketh the winds:

Luke 8:22 And it was don in oon of daies, he wente vp in to a boot, and hise disciplis. And he seide to hem, Passe we ouer the see. And thei wenten vp. Luke 8:23 And while thei rowiden, he slepte. And a tempest of wynde cam doun in to the watir, and thei weren dryuun hidur and thidur with wawis, and weren in perel. Luke 8:24 And thei camen nyy, and reisiden hym, and seiden, Comaundoure, we perischen. And he roos, and blamyde the wynde, and the tempest of the watir; and it ceesside, and pesibilte was maad. Luke 8:25 And he seide to hem, Where is youre feith? Which dredynge wondriden, and seiden togidir, Who, gessist thou, is this? for he comaundith to wyndis and to the see, and thei obeien to hym.

casteth the legion of devils out of the man into the herd of swine:

Luke 8:26 And thei rowiden to the cuntree of Gerasenus, that is ayens Galilee. Luke 8:27 And whanne he wente out to the loond, a man ran to hym, that hadde a deuel long tyme, and he was not clothid with cloth, nether dwellide in hous, but in sepulcris. Luke 8:28 This, whanne he saiy Jhesu, fel doun bifor hym, and he criynge with a greet vois seide, What to me and to thee, Jhesu, the sone of the hiyest God? Y biseche thee, that thou turmente not me. Luke 8:29 For he comaundide the vncleene spirit, that he schulde go out fro the man. For he took hym ofte tymes, and he was boundun with cheynes, and kept in stockis, and, whanne the boondis weren brokun, he was lad of deuelis in to desert. Luke 8:30 And Jhesus axide hym, and seide, What name is to thee? And he seide, A legioun; for many deuelis weren entrid in to hym. Luke 8:31 And thei preyden hym, that he schulde not comaunde hem, that thei schulden go in to helle. Luke 8:32 And there was a flok of many swyne lesewynge in an hil, and thei preieden hym, that he schulde suffre hem to entre in to hem. And he suffride hem. Luke 8:33 And so the deuelis wenten out fro the man, and entriden in to the swyne; and with a birre the flok wente heedlyng in to the pool, and was drenchid. Luke 8:34 And whanne the hirdis sayn this thing don, thei flowen, and tolden in to the cite, and in to the townes. Luke 8:35 And thei yeden out to se that thing that was don. And thei camen to Jhesu, and thei founden the man sittynge clothid, fro whom the deuelis wenten out, and in hool mynde at hise feet; and thei dredden. Luke 8:36 And thei that sayn tolden to hem, hou he was maad hool of the legioun.

is rejected of the Gadarenes:

Luke 8:37 And al the multitude of the cuntre of Gerasenus preiede hym, that he schulde go fro hem, for thei werun holdun with greet drede. He wente vp in to a boot, and turnede ayen. Luke 8:38 And the man of whom the deuelis weren gon out, preide hym, that he schulde be with hym. Jhesus lefte hym, and seide, Luke 8:39 Go ayen in to thin hous, and telle hou grete thingis God hath don to thee. And he wente thorow al the cite, and prechide, hou grete thingis Jhesus hadde don to hym. Luke 8:40 And it was don, whanne Jhesus was gon ayen, the puple resseyuede hym; for alle weren abidynge hym.

Luke 8:41 And lo! a man, to whom the name was Jayrus, and he was prynce of a synagoge; and he fel doun at the feet of Jhesu, and preiede hym, that he schulde entre in to his hous, Luke 8:42 for he hadde but o douyter almost of twelue yeer eelde, and sche was deed. And it bifel, the while he wente, he was thrungun of the puple.

healeth the woman of her bloody issue,

Luke 8:43 And a womman that hadde a flux of blood twelue yeer, and hadde spendid al hir catel in leechis, and sche miyte not be curid of ony, Luke 8:44 and sche cam nyy bihynde, and touchide the hem of his cloth, and anoon the fluxe of hir blood ceesside. Luke 8:45 And Jhesus seide, Who is that touchide me? And whanne alle men denyeden, Petre seide, and thei that weren with hym, Comaundour, the puple thristen, and disesen thee, and thou seist, Who touchide me? Luke 8:46 And Jhesus seide, Summan hath touchid me, for that vertu yede out of me. Luke 8:47 And the womman seynge, that it was not hid fro hym, cam tremblynge, and fel doun at hise feet, and for what cause sche hadde touchid hym sche schewide bifor al the puple, and hou anoon sche was helid. Luke 8:48 And he seide to hir, Douytir, thi feith hath maad thee saaf; go thou in pees.

and raiseth from death Jairus' daughter.

Luke 8:49 And yit while he spak, a man cam fro the prince of the synagoge, and seide to hym, Thi douytir is deed, nyle thou trauel the maister. Luke 8:50 And whanne this word was herd, Jhesus answeride to the fadir of the damysel, Nyle thou drede, but bileue thou oonli, and sche schal be saaf. Luke 8:51 And whanne he cam to the hous, he suffride no man to entre with hym, but Petir and Joon and James, and the fadir and the modir of the damysel. Luke 8:52 And alle wepten, and biweileden hir. And he seide, Nyle ye wepe, for the damysel is not deed, but slepith. Luke 8:53 And thei scorneden hym, and wisten that sche was deed. Luke 8:54 But he helde hir hoond, and criede, and seide, Damysel, rise vp. Luke 8:55 And hir spirit turnede ayen, and sche roos anoon. And he comaundide to yyue to hir to ete. Luke 8:56 And hir fadir and modir wondriden greetli; and he comaundide hem, that thei schulden not seie to ony that thing that was don.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook