Wycliffe Bible

Luke 19

Of Zacchaeus a publican.

Luke 19:1 And Jhesus goynge yn, walkide thorou Jericho. Luke 19:2 And lo! a man, Sache bi name, and this was a prince of pupplicans, and he was riche. Luke 19:3 And he souyte to se Jhesu, who he was, and he myyte not, for the puple, for he was litil in stature. Luke 19:4 And he ran bifore, and stiyede in to a sicomoure tree, to se hym; for he was to passe fro thennus. Luke 19:5 And Jhesus biheld vp, whanne he cam to the place, and saiy hym, and seide to hym, Sache, haste thee, and come doun, for to dai Y mot dwelle in thin hous. Luke 19:6 And he hiyynge cam doun, and ioiynge resseyuede hym. Luke 19:7 And whanne alle men sayn, thei grutchiden seiynge, For he hadde turned to a synful man. Luke 19:8 But Sache stood, and seide to the Lord, Lo! Lord, Y yyue the half of my good to pore men; and if Y haue ony thing defraudid ony man, Y yelde foure so myche. Luke 19:9 Jhesus seith to hym, For to dai heelthe is maad to this hous, for that he is Abrahams sone; Luke 19:10 for mannus sone cam to seke, and make saaf that thing that perischide.

The ten pieces of money.

Luke 19:11 Whanne thei herden these thingis, he addide, and seide a parable, for that he was nyy Jerusalem, and for thei gessiden, that anoon the kyngdom of God schulde be schewid. Luke 19:12 Therfor he seide, A worthi man wente in to a fer cuntre, to take to hym a kyngdom, and to turne ayen. Luke 19:13 And whanne hise ten seruauntis weren clepid, he yaf to hem ten besauntis; and seide to hem, Chaffare ye, til Y come. Luke 19:14 But hise citeseyns hatiden hym, and senten a messanger aftir hym, and seiden, We wolen not, that he regne on vs. Luke 19:15 And it was don, that he turnede ayen, whan he hadde take the kyngdom; and he comaundide hise seruauntis to be clepid, to whiche he hadde yyue monei, to wite, hou myche ech hadde wonne bi chaffaryng. Luke 19:16 And the firste cam, and seide, Lord, thi besaunt hath wonne ten besauntis. Luke 19:17 He seide to hym, Wel be, thou good seruaunt; for in litil thing thou hast be trewe, thou schalt be hauynge power on ten citees. Luke 19:18 And the tother cam, and seide, Lord, thi besaunt hath maad fyue besauntis. Luke 19:19 And to this he seide, And be thou on fyue citees. Luke 19:20 And the thridde cam, and seide, Lord, lo! thi besaunt, that Y hadde, put vp in a sudarie. Luke 19:21 For Y dredde thee, for thou art a sterne man; thou takist awey that that thou settidist not, and thou repist that that thou hast not sowun. Luke 19:22 He seith to hym, Wickid seruaunt, of thi mouth Y deme thee. Wistist thou, that Y am a sterne man, takynge awei that thing that Y settide not, and repyng ethat thing that Y sewe not? Luke 19:23 and whi hast thou not youun my money to the bord, and Y comynge schulde haue axid it with vsuris? Luke 19:24 And he seide to men stondynge nyy, Take ye awei fro hym the besaunt, and yyue ye to hym that hath ten beyauntis: Luke 19:25 And thei seiden to hym, Lord, he hath ten besauntis. Luke 19:26 And Y seie to you, to ech man that hath, it schal be youun, and he schal encreese; but fro him that hath not, also that thing that he hath, schal be takun of hym. Luke 19:27 Netheles brynge ye hidur tho myn enemyes, that wolden not that Y regnede on hem, and sle ye bifor me.

Christ rideth into Jerusalem with triumph:

Luke 19:28 And whanne these thingis weren seid, he wente bifore, and yede vp to Jerusalem. Luke 19:29 And it was don, whanne Jhesus cam nyy to Bethfage and Betanye, at the mount, that is clepid of Olyuete, he sente hise twei disciplis, and seide, Luke 19:30 Go ye in to the castel, that is ayens you; in to which as ye entren, ye schulen fynde a colt of an asse tied, on which neuer man sat; vntye ye hym, and brynge ye to me. Luke 19:31 And if ony man axe you, whi ye vntien, thus ye schulen seie to hym, For the Lord desirith his werk. Luke 19:32 And thei that weren sent, wenten forth, and fonden as he seide to hem, a colt stondynge. Luke 19:33 And whanne thei vntieden the colt, the lordis of hym seiden to hem, What vntien ye the colt? Luke 19:34 And thei seiden, For the Lord hath nede to hym. Luke 19:35 And thei ledden hym to Jhesu; and thei castynge her clothis on the colt, setten Jhesu on hym. Luke 19:36 And whanne he wente, thei strowiden her clothis in the weie. Luke 19:37 And whanne he cam nyy to the comyng doun of the mount of Olyuete, al the puple that cam doun bygunnen to ioye, and to herie God with greet vois on alle the vertues, that thei hadden sayn, Luke 19:38 and seiden, Blessid be the king, that cometh in the name of the Lord; pees in heuene, and glorie in hiye thingis. Luke 19:39 And sum of the Farisees of the puple seiden to hym, Maister, blame thi disciplis. Luke 19:40 And he seide to hem, Y seie to you, for if these ben stille, stoonus schulen crye.

weepeth over it:

Luke 19:41 And whanne he neiyede, he seiy the citee, and wepte on it, Luke 19:42 and seide, For if thou haddist knowun, thou schuldist wepe also; for in this dai the thingis ben in pees to thee, but now thei ben hid fro thin iyen. Luke 19:43 But daies schulen come in thee, and thin enemyes schulen enuyroun thee with a pale, and thei schulen go aboute thee, and make thee streit on alle sidis, Luke 19:44 and caste thee doun to the erthe, and thi sones that ben in thee; and thei schulen not leeue in thee a stoon on a stoon, for thou hast not knowun the tyme of thi visitacioun.

driveth the buyers and sellers out of the Temple:

Luke 19:45 And he entride in to the temple, and bigan to caste out men sellynge ther inne and biynge, Luke 19:46 and seide to hem, It is writun, That myn hous is an hous of preyer, but ye han maad it a den of theues.

teaching daily in it. The rulers would have destroyed him, but for fear of the people.

Luke 19:47 And he was techynge euerydai in the temple. And the princis of prestis, and the scribis, and the princis of the puple souyten to lese hym; Luke 19:48 and thei founden not, what thei schulden do to hym, for al the puple was ocupied, and herde hym.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook