The parable of the lost sheep:
Luke 15:1 And pupplicans and synful men weren neiyynge to him, to here hym. Luke 15:2 And the Farisees and scribis grutchiden, seiynge, For this resseyueth synful men, and etith with hem.
Luke 15:3 And he spak to hem this parable, and seide, Luke 15:4 What man of you that hath an hundrith scheep, and if he hath lost oon of hem, whethir he leeueth not nynti and nyne in desert, and goith to it that perischide, til he fynde it? Luke 15:5 And whanne he hath foundun it, he ioieth, and leyith it on hise schuldris; and he cometh hoom, Luke 15:6 and clepith togidir hise freendis and neiyboris, and seith to hem, Be ye glad with me, for Y haue founde my scheep, that hadde perischid. Luke 15:7 And Y seie to you, so ioye schal be in heuene on o synful man doynge penaunce, more than on nynti and nyne iuste, that han no nede to penaunce.
of the piece of silver:
Luke 15:8 Or what womman hauynge ten besauntis, and if sche hath lost oo besaunt, whether sche teendith not a lanterne, and turneth vpsodoun the hows, and sekith diligentli, til that sche fynde it? Luke 15:9 And whanne sche hath foundun, sche clepith togidir freendis and neiyboris, and seith, Be ye glad with me, for Y haue founde the besaunt, that Y hadde lost. Luke 15:10 So Y seie to you, ioye schal be bifor aungels of God on o synful man doynge penaunce.
of the prodigal son.
Luke 15:11 And he seide, A man hadde twei sones; Luke 15:12 and the yonger of hem seide to the fadir, Fadir, yyue me the porcioun of catel, that fallith to me. And he departide to hem the catel. Luke 15:13 And not aftir many daies, whanne alle thingis weren gederid togider, the yonger sone wente forth in pilgrymage in to a fer cuntre; and there he wastide hise goodis in lyuynge lecherously. Luke 15:14 And aftir that he hadde endid alle thingis, a strong hungre was maad in that cuntre, and he bigan to haue nede. Luke 15:15 And he wente, and drouy hym to oon of the citeseyns of that cuntre. And he sente hym in to his toun, to fede swyn. Luke 15:16 And he coueitide to fille his wombe of the coddis that the hoggis eeten, and no man yaf hym. Luke 15:17 And he turnede ayen to hym silf, and seide, Hou many hirid men in my fadir hous han plente of looues; and Y perische here thorouy hungir. Luke 15:18 Y schal rise vp, and go to my fadir, and Y schal seie to hym, Fadir, Y haue synned in to heuene, and bifor thee; Luke 15:19 and now Y am not worthi to be clepid thi sone, make me as oon of thin hirid men. Luke 15:20 And he roos vp, and cam to his fadir. And whanne he was yit afer, his fadir saiy hym, and was stirrid bi mercy. And he ran, and fel on his necke, and kisside hym. Luke 15:21 And the sone seide to hym, Fadir, Y haue synned in to heuene, and bifor thee; and now Y am not worthi to be clepid thi sone. Luke 15:22 And the fadir seide to hise seruauntis, Swithe brynge ye forth the firste stoole, and clothe ye hym, and yyue ye a ryng in his hoond, Luke 15:23 and schoon on hise feet; and brynge ye a fat calf, and sle ye, and ete we, and make we feeste. Luke 15:24 For this my sone was deed, and hath lyued ayen; he perischid, and is foundun. And alle men bigunnen to ete. Luke 15:25 But his eldere sone was in the feeld; and whanne he cam, and neiyede to the hous, he herde a symfonye and a croude. Luke 15:26 And he clepide oon of the seruauntis, and axide, what these thingis weren. Luke 15:27 And he seide to hym, Thi brother is comun, and thi fadir slewe a fat calf, for he resseyuede hym saaf. Luke 15:28 And he was wrooth, and wolde not come in. Therfor his fadir wente out, and bigan to preye hym. Luke 15:29 And he answerde to his fadir, and seide, Lo! so many yeeris Y serue thee, and Y neuer brak thi comaundement; and thou neuer yaf to me a kidde, that Y with my freendis schulde haue ete. Luke 15:30 But aftir that this thi sone, that hath deuourid his substaunce with horis, cam, thou hast slayn to hym a fat calf. Luke 15:31 And he seide to hym, Sone, thou art euer more with me, and alle my thingis ben thine. Luke 15:32 But it bihofte for to make feeste, and to haue ioye; for this thi brother was deed, and lyuede ayen; he perischide, and is foundun.