Christ preacheth to his disciples to avoid hypocrisy, and fearfulness in publishing his doctrine:
Luke 12:1 And whanne myche puple stood aboute, so that thei treden ech on othir, he bigan to seie to hise disciplis, Be ye war of the sourdouy of the Farisees, that is ypocrisie. Luke 12:2 For no thing is hilid, that schal not be schewid; nether hid, that schal not be wist. Luke 12:3 For whi tho thingis that ye han seid in derknessis, schulen be seid in liyt; and that that ye han spokun in eere in the couchis, schal be prechid in roofes. Luke 12:4 And Y seie to you, my freendis, be ye not a ferd of hem that sleen the bodie, and aftir these thingis han no more what thei schulen do. Luke 12:5 But Y schal schewe to you, whom ye schulen drede; drede ye hym, that aftir he hath slayn, he hath power to sende in to helle. And so Y seie to you, drede ye hym. Luke 12:6 Whether fyue sparowis ben not seld for twei halpens; and oon of hem is not in foryetyng bifor God? Luke 12:7 But also alle the heeris of youre heed ben noumbrid. Therfor nyle ye drede; ye ben of more prijs than many sparowis. Luke 12:8 Treuli Y seie to you, ech man that knoulechith me bifor men, mannus sone schal knouleche hym bifor the aungels of God. Luke 12:9 But he that denyeth me bifor men, schal be denyed bifor the aungels of God. Luke 12:10 And ech that seith a word ayens mannus sone, it schal be foryouun to hym; but it schal not be foryouun to hym, that blasfemeth ayens the Hooli Goost. Luke 12:11 And whanne thei leden you in to synagogis, and to magistratis, and potestatis, nyle ye be bisie, hou or what ye schulen answere, or what ye schulen seie. Luke 12:12 For the Hooli Goost schal teche you in that our, what it bihoueth you to seie.
warneth the people to beware of covetousness, by the parable of the rich man who set up greater barns.
Luke 12:13 And oon of the puple seide to hym, Maystir, seie to my brothir, that he departe with me the eritage. Luke 12:14 And he seyde to hym, Man, who ordeynede me a domesman, or a departere, on you? Luke 12:15 And he seide to hem, Se ye, and be ye war of al coueytice; for the lijf of a man is not in the abundaunce of tho thingis, whiche he weldith. Luke 12:16 And he tolde to hem a liknesse, and seide, The feeld of a riche man brouyte forth plenteuouse fruytis. Luke 12:17 And he thouyte with ynne hym silf, and seide, What schal Y do, for Y haue not whidur Y schal gadere my fruytis? Luke 12:18 And he seith, This thing Y schal do; Y schal throwe doun my bernes, and Y schal make gretter, and thidir Y schal gadir alle thingis that growen to me, and my goodis. Luke 12:19 And Y schal seie to my soule, Soule, thou hast many goodis kept in to ful many yeeris; rest thou, ete, drynke, and make feeste. Luke 12:20 And God seide to hym, Fool, in this nyyt thei schulen take thi lijf fro thee. And whos schulen tho thingis be, that thou hast arayed? Luke 12:21 So is he that tresourith to hym silf, and is not riche in God.
We must not be over careful of earthly things,
Luke 12:22 And he seide to hise disciplis, Therfor Y seie to you, nyle ye be bisy to youre lijf, what ye schulen ete, nether to youre bodi, with what ye schulen be clothid. Luke 12:23 The lijf is more than mete, and the body more than clothing. Luke 12:24 Biholde ye crowis, for thei sowen not, nethir repen, to whiche is no celer, ne berne, and God fedith hem. Hou myche more ye ben of more prijs than thei. Luke 12:25 And who of you bithenkynge may put to o cubit to his stature? Luke 12:26 Therfor if ye moun not that that is leest, what ben ye bisie of othere thingis? Luke 12:27 Biholde ye the lilies of the feeld, hou thei wexen; thei trauelen not, nethir spynnen. And Y seie to you, that nethir Salomon in al his glorie was clothid as oon of these. Luke 12:28 And if God clothith thus the hey, that to dai is in the feeld, and to morewe is cast in to an ouen; hou myche more you of litil feith. Luke 12:29 And nyle ye seke, what ye schulen ete, or what ye schulen drynke; and nyle ye be reisid an hiy. Luke 12:30 For folkis of the world seken alle these thingis; and your fadir woot, that ye neden alle these thingis.
but seek the Kingdom of God,
Luke 12:31 Netheles seke ye first the kyngdom of God, and alle these thingis schulen be caste to you. Luke 12:32 Nile ye, litil flok, drede, for it pleside to youre fadir to yyue you a kyngdom.
Luke 12:33 Selle ye tho thingis that ye han in possessioun, and yyue ye almes. And make to you sachels that wexen not oolde, tresoure that failith not in heuenes, whidir a theef neiyith not, nether mouyt destruyeth. Luke 12:34 For where is thi tresoure, there thin herte schal be. Luke 12:35 Be youre leendis gird aboue, and lanternes brennynge in youre hoondis;
be ready at a knock to open to our Lord whensoever he cometh.
Luke 12:36 and be ye lijk to men that abiden her lord, whanne he schal turne ayen fro the weddyngis, that whanne he schal come, and knocke, anoon thei openen to hym. Luke 12:37 Blessid be tho seruauntis, that whanne the lord schal come, he schal fynde wakynge. Treuli Y seie to you, that he schal girde hym silf, and make hem sitte to mete, and he schal go, and serue hem. Luke 12:38 And if he come in the secounde wakynge, and if he come in the thridde wakynge, and fynde so, tho seruauntis ben blessid. Luke 12:39 And wite ye this thing, for if an hosebonde man wiste, in what our the theef wolde come, sotheli he schulde wake, and not suffre his hous to be myned. Luke 12:40 And be ye redi, for in what our ye gessen not, mannus sone schal come.
Christ's ministers are to see to their charge,
Luke 12:41 And Petre seide to hym, Lord, seist thou this parable to vs, or to alle? Luke 12:42 And the Lord seide, Who, gessist thou, is a trewe dispendere, and a prudent, whom the lord hath ordeyned on his meyne, to yyue hem in tyme mesure of whete? Luke 12:43 Blessid is that seruaunt, that the lord whanne he cometh, schal fynde so doynge. Luke 12:44 Verili Y seie to you, that on alle thingis that he weldith, he schal ordeyne hym. Luke 12:45 That if that seruaunt seie in his herte, My lord tarieth to come; and bigynne to smyte children, and handmaydenes, and ete, and drynke, and be fulfillid ouer mesure, Luke 12:46 the lord of that seruaunt schal come, in the dai that he hopith not, and the our that he woot not; and schal departe hym, and putte his part with vnfeithful men. Luke 12:47 But thilke seruaunt that knew the wille of his lord, and made not hym redi, and dide not aftir his wille, schal be betun with many betyngis. Luke 12:48 But he that knew not, and dide worthi thingis of strokis, schal be betun with fewe. For to eche man to whom myche is youun, myche schal be axid of hym; and thei schulen axe more of hym, to whom thei bitoken myche.
and look for persecution.
Luke 12:49 Y cam to sende fier in to the erthe, and what wole Y, but that it be kyndlid? Luke 12:50 And Y haue to be baptisid with a baptysm, and hou am Y constreyned, til that it be perfitli don? Luke 12:51 Wene ye, that Y cam to yyue pees in to erthe? Nay, Y say to you, but departyng. Luke 12:52 For fro this tyme ther schulen be fyue departid in oon hous; thre schulen be departid ayens tweyne, and tweyne schulen be departid ayens thre; Luke 12:53 the fadir ayens the sone, and the sone ayens the fadir; the modir ayens the douytir, and the douytir ayens the modir; the hosebondis modir ayens the sones wijf, and and the sones wijf ayens hir hosebondis modir.
The people must take this time of grace,
Luke 12:54 And he seide also to the puple, Whanne ye seen a cloude risynge fro the sunne goynge doun, anoon ye seien, Reyn cometh; and so it is don. Luke 12:55 And whanne ye seen the south blowynge, ye seien, That heete schal be; and it is don. Luke 12:56 Ypocritis, ye kunnen preue the face of heuene and of erthe, but hou preuen ye not this tyme. Luke 12:57 But what and of you silf ye demen not that that is iust?
because it is a fearful thing to die without reconciliation.
Luke 12:58 But whanne thou goist with thin aduersarie in the weie to the prince, do bisynesse to be delyuerid fro hym; lest perauenture he take thee to the domesman, and the domesman bitake thee to the maistirful axer, and the maistirful axer sende thee in to prisoun. Luke 12:59 Y seie to thee, thou schalt not go fro thennus, til thou yelde the laste ferthing.