Christ sendeth out at once seventy disciples to work miracles, and to preach:
Luke 10:1 And aftir these thingis the Lord Jhesu ordeynede also othir seuenti and tweyn, and sente hem bi tweyn and tweyn bifor his face in to euery citee and place, whidir he was to come. Luke 10:2 And he seide to hem, There is myche ripe corn, and fewe werke men; therfor preie ye the lord of the ripe corn, that he sende werke men in to his ripe corn. Luke 10:3 Go ye, lo! Y sende you as lambren among wolues. Luke 10:4 Therfor nyle ye bere a sachel, nethir scrippe, nethir schoon, and greete ye no man bi the weie. Luke 10:5 In to what hous that ye entren, first seie ye, Pees to this hous. Luke 10:6 And if a sone of pees be there, youre pees schal reste on hym; but if noon, it schal turne ayen to you. Luke 10:7 And dwelle ye in the same hous, etynge and drynkynge tho thingis that ben at hem; for a werk man is worthi his hire. Nyle ye passe from hous in to hous. Luke 10:8 And in to what euer citee ye entren, and thei resseyuen you, ete ye tho thingis that ben set to you; Luke 10:9 and heele ye the sijke men that ben in that citee. And seie ye to hem, The kyngdom of God schal neiye in to you. Luke 10:10 In to what citee ye entren, and thei resseyuen you not, go ye out in to the streetis of it, Luke 10:11 and seie ye, We wipen of ayens you the poudir that cleued to vs of youre citee; netheles wite ye this thing, that the rewme of God schal come nyy. Luke 10:12 Y seie to you, that to Sodom it schal be esiere than to that citee in that dai. Luke 10:13 Wo to thee, Corosayn; wo to thee, Bethsaida; for if in Tyre and Sidon the vertues hadden be don, whiche han be don in you, sum tyme thei wolden haue sete in heyre and asches, and haue don penaunce. Luke 10:14 Netheles to Tire and Sidon it schal be esiere in the doom than to you. Luke 10:15 And thou, Cafarnaum, art enhaunsid til to heuene; thou schalt be drenchid til in to helle. Luke 10:16 He that herith you, herith me; and he that dispisith you, dispisith me; and he that dispisith me, dispisith hym that sente me.
admonisheth them to be humble, and wherein to rejoice:
Luke 10:17 And the two and seuenti disciplis turneden ayen with ioye, and seiden, Lord, also deuelis ben suget to vs in thi name. Luke 10:18 And he seide to hem, Y saiy Sathnas fallynge doun fro heuene, as leit. Luke 10:19 And lo! Y haue youun to you power to trede on serpentis, and on scorpyouns, and on al the vertu of the enemy, and nothing schal anoye you. Luke 10:20 Netheles nyle ye ioye on this thing, that spiritis ben suget to you; but ioye ye, that youre names ben writun in heuenes.
thanketh his Father for his grace:
Luke 10:21 In thilk our he gladide in the Hooli Goost, and seide, Y knouleche to thee, fadir, Lord of heuene and of erthe, for thou hast hid these thingis fro wise men and prudent, and hast schewid hem to smale children. Yhe, fadir, for so it pleside bifor thee. Luke 10:22 Alle thingis ben youun to me of my fadir, and no man woot, who is the sone, but the fadir; and who is the fadir, but the sone, and to whom the sone wole schewe.
magnifieth the happy estate of his Church:
Luke 10:23 And he turnede to hise disciplis, and seide, Blessid ben the iyen, that seen tho thingis that ye seen. Luke 10:24 For Y seie to you, that many prophetis and kyngis wolden haue seie tho thingis, that ye seen, and thei sayn not; and here tho thingis, that ye heren, and thei herden not.
teacheth the lawyer how to attain eternal life, and to take every one for his neighbour that needeth his mercy:
Luke 10:25 And lo! a wise man of the lawe ros vp, temptynge hym, and seiynge, Maister, what thing schal Y do to haue euerlastynge lijf? Luke 10:26 And he seide to hym, What is writun in the lawe? hou redist thou? Luke 10:27 He answeride, and seide, Thou schalt loue thi Lord God of al thin herte, and of al thi soule, and of alle thi strengthis, and of al thi mynde; and thi neiybore as thi silf. Luke 10:28 And Jhesus seide to hym, Thou hast answerid riytli; do this thing, and thou schalt lyue. Luke 10:29 But he willynge to iustifie hym silf, seide to Jhesu, And who is my neiybore? Luke 10:30 And Jhesu biheld, and seide, A man cam doun fro Jerusalem in to Jerico, and fel among theues, and thei robbiden hym, and woundiden hym, and wente awei, and leften the man half alyue. Luke 10:31 And it bifel, that a prest cam doun the same weie, and passide forth, whanne he hadde seyn hym. Luke 10:32 Also a dekene, whanne he was bisidis the place, and saiy him, passide forth. Luke 10:33 But a Samaritan, goynge the weie, cam bisidis hym; and he siy hym, and hadde reuthe on hym; Luke 10:34 and cam to hym, and boond togidir hise woundis, and helde in oyle and wynne; and leide hym on his beest, and ledde in to an ostrie, and dide the cure of hym. Luke 10:35 And another dai he brouyte forth twey pans, and yaf to the ostiler, and seide, Haue the cure of hym; and what euer thou schalt yyue ouer, Y schal yelde to thee, whanne Y come ayen. Luke 10:36 Who of these thre, semeth to thee, was neiybore to hym, that fel among theues? Luke 10:37 And he seide, He that dide merci in to hym. And Jhesus seide to hym, Go thou, and do thou on lijk maner.
Luke 10:38 And it was don, while thei wenten, he entride in to a castel; and a womman, Martha bi name, resseyuede hym in to hir hous. Luke 10:39 And to this was a sistir, Marie bi name, which also sat bisidis the feet of the Lord, and herde his word. Luke 10:40 But Martha bisiede aboute the ofte seruyce. And sche stood, and seide, Lord, takist thou no kepe, that my sistir hath left me aloone to serue? therfor seie thou to hir, that sche helpe me.
reprehendeth Martha, and commendeth Mary her sister.
Luke 10:41 And the Lord answerde, and seide to hir, Martha, Martha, thou art bysi, and art troublid aboute ful many thingis; Luke 10:42 but o thing is necessarie. Marie hath chosun the best part, which schal not be takun awei fro hir.