Wycliffe Bible

Leviticus 13

The laws and tokens whereby the priest is to be guided in discerning the leprosy.

Leviticus 13:1 The Lord spak to Moyses and Aaron, and seide, Leviticus 13:2 A man in whos skyn and fleisch rysith dyuerse colour, ether whelke, ethir as sum schynynge thing, that is, a wounde of lepre, he schal be brouyt to Aaron preest, ether to oon who euer of hise sones; Leviticus 13:3 and whanne he seeth lepre in the skyn, and the heeris chaungide in to whijte colour, and that spice of lepre lowere than the tother skyn and fleisch, it is a wounde of lepre, and he schal be departid at the doom of the preest. Leviticus 13:4 Sotheli if schynyng whijtnesse is in the skyn, nethir is lower than the tother fleisch, and the heeris ben of the formere colour, the preest schal close hym seuene daies; Leviticus 13:5 and schal biholde hym in the seuenthe dai, and sotheli if the lepre wexith not ferther, nethir passith the formere termes in the fleisch, eft the preest schal close hym ayen seuene other daies; Leviticus 13:6 and schal biholde in the seuenthe day, if the lepre is derkere, and wexith not in the fleisch, the preest schal clense hym, for it is a scabbe; and the man schal waische hise clothis, and he schal be clene. Leviticus 13:7 That if the lepre wexith eft, aftir that he is seyn of the preest, and is yoldun to clennesse, he schal be brouyt to the preest, and schal be demed of vnclennesse. Leviticus 13:8 If the wounde of lepre is in man, he schal be brouyt to the preest, and he schal se the man;

Leviticus 13:9 and whanne whijt colour is in the fleisch, and chaungith the siyt of heeris, and thilke fleisch apperith quyk, Leviticus 13:10 it schal be demid eldest lepre, and growun to the skyn; therfor the preest schal defoule hym, Leviticus 13:11 and he schal not close eft, for it is of opyn vnclennesse. Leviticus 13:12 But if lepre rennynge about in the skyn flourith out, and hilith al the fleisch, fro the heed til to the feet, what euer thing fallith vndur the siyt of iyen; the preest schal biholde hym, Leviticus 13:13 and schal deme that he is holdun with clenneste lepre, for all the skyn is turned in to whijtnesse, and therfor the man schal be cleene. Leviticus 13:14 Sotheli whanne quyk fleisch apperith in hym, Leviticus 13:15 thanne he schal be defoulid bi the doom of the preest, and he schal be arettid among vncleene men; for quyk fleisch is vnclene, if it is spreynt with lepre. Leviticus 13:16 That if the fleisch is turned eft in to whijtnesse, and hilith al the man, Leviticus 13:17 the preest schal biholde hym, and schal deme, that he is cleene.

Leviticus 13:18 Fleisch and skyn, in which a botche is bred, Leviticus 13:19 and is heelid, and a step of wounde apperith whijt, ethir sum deel reed, in the place of the botche, the man schal be brouyt to the preest; Leviticus 13:20 and whanne the preest seeth the place of lepre lowere than the tother fleisch, and the heeris turned in to whijtnesse, the preest schal defoule hym; for the wounde of lepre is bred in the botche. Leviticus 13:21 That if the heer is of the former colour, and the signe of wounde is sumdeel derk, and is not lowere than the nyy fleisch, the preest schal close the man seuene daies; Leviticus 13:22 and sotheli, if it wexith, the preest schal deme the man of lepre; Leviticus 13:23 forsothe if it stondith in his place, it is a signe of botche, and the man schal be cleene.

Leviticus 13:24 Fleisch and skyn, which the fier hath brent, and is heelid, and hath a whijt ethir reed signe of wounde, Leviticus 13:25 the preest schal biholde it, and lo! if it is turned in to whijtnesse, and the place therof is lowere than the tothir skyn, the preest schal defoule the man, for a wounde of lepre is bred in the signe of wounde. Leviticus 13:26 That if the colour of heeris is not chaungid, nether the wounde is lowere than the tother fleisch, and thilke spice of lepre is sumdeel derk, the preest schal close the man bi seuene daies; Leviticus 13:27 and in the seuenthe dai he schal biholde; if the lepre wexith in the fleisch, the preest schal defoule the man; Leviticus 13:28 ellis if the whijtnesse stondith in his place, and is not cleer ynow, it is a wounde of brennyng, and therfor the man schal be clensid, for it is a signe of brennyng.

Leviticus 13:29 A man ethir womman, in whos heed ether beerd lepre buriounneth, the preest schal se hem; Leviticus 13:30 and if the place is lowere than the tothir fleisch, and the heer is whijt, and is sotilere, ether smallere, than it is wont, the preest schal defoule hem, for it is lepre of the heed, and of the beerd. Leviticus 13:31 Ellis if he seeth the place of wem euene with the nyy fleisch, and seeth the here blak, the preest schal close hem bi seuene daies, and schal se in the seuenthe dai; Leviticus 13:32 if the wem waxith not, and the heer is of his colour, and the place of wounde is euene with the tother fleisch, Leviticus 13:33 the man schal be schauun, without the place of wem, and he schal be closid eft bi seuene othere daies. Leviticus 13:34 If in the seuenthe day the wounde is seyn to haue stonde in his place, nether is lowere than the tother fleisch, the preest schal clense the man; and whanne his clothis ben waischun, he schal be cleene. Leviticus 13:35 Ellis if aftir the clensyng a spotte wexith eft in the skyn, Leviticus 13:36 the preest schal no more enquere, whether the heer is chaungid in to whijt colour, for apeertli he is vncleene. Leviticus 13:37 Sotheli if the spotte stondith, and the heeris ben blake, knowe the preest that the man is heelid, and tristili pronounce he the man cleene.

Leviticus 13:38 A man ethir a womman, in whos skyn whijtnesse apperith, the preest schal biholde hem; Leviticus 13:39 if he perseyueth, that whijtnesse sum deel derk schyneth in the skyn, wite he, that it is no lepre, but a spotte of whijt colour, and that the man is cleene. Leviticus 13:40 A man of whos heed heeris fleten awei, is calu, and clene; Leviticus 13:41 and if heeris fallen fro the forheed, he is ballid, and is cleene; Leviticus 13:42 ellis if in the ballidnesse bifore, ether in the ballidnesse bihynde, whijt ether reed colour is bred, and the preest seeth this, Leviticus 13:43 he schal condempne the man without doute of lepre, which is bred in the ballidnesse. Leviticus 13:44 Therfor whoeuer is defoulid with lepre, and is departid at the doom of the preest, Leviticus 13:45 he schal haue hise clothis vnsewid, bareheed, the mouth hilid with a cloth, he schal crye hym silf defoulid, and viyl; Leviticus 13:46 in al tyme in which he is lepre and vnclene, he schal dwelle aloone without the castels.

Leviticus 13:47 A wollun cloth, ethir lynnun, that hath lepre in the warp, Leviticus 13:48 ethir oof, ethir certis a skyn, ether what euer thing is maad of skiyn, Leviticus 13:49 if it is corrupt with a whijt spotte, ethir reed, it schal be arettid lepre, and it schal be schewid to the preest; Leviticus 13:50 which schal close it biholden bi seuene daies. Leviticus 13:51 And eft he schal biholde in the seuenthe dai, and if he perseyueth, that it wexide, it schal be contynuel lepre; he schal deme the cloth defoulid, and al thing in which it is foundun; Leviticus 13:52 and therfor the cloth schal be brent in flawmes. Leviticus 13:53 That if he seeth that the spotte wexide not, he schal comaunde, Leviticus 13:54 and thei schulen waische that thing wherynne the lepre is, and he schal close it ayen bi seuene othere daies; Leviticus 13:55 and whanne he seeth the formere face not turned ayen, netheles that nether the lepre wexede, he schal deme that thing vnclene, and he schal brenne it in fier, for lepre is sched in the ouer part of the cloth, ether thorouy al. Leviticus 13:56 Ellis if the place of lepre is derkere, aftir that the cloth is waischun, he schal breke awey that place, and schal departe fro the hool. Leviticus 13:57 That if fleynge lepre and vnstidefast apperith ferthermore in these places, that weren vnwemmed bifore, it owith be brent in fier; if it ceessith, Leviticus 13:58 he schal waische the secounde tyme tho thingis that ben cleene, and tho schulen be cleene. Leviticus 13:59 This is the lawe of lepre of cloth, wollun and lynnun, of warp and of oof, and of al purtenaunce of skiyn, hou it owith to be clensyd, ethir to be defoulid.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook