Wycliffe Bible

Leviticus 11

What beasts may,

Leviticus 11:1 And the Lord spak to Moises and Aaron, and seide, Leviticus 11:2 Seie ye to the sones of Israel, Kepe ye alle thingis whiche Y wroot to you, that Y be youre God. These ben the beestis, whiche ye schulen ete, of alle lyuynge beestis of erthe; Leviticus 11:3 ye schulen ete al thing among beestis that hath a clee departid, and chewith code;

and what may not be eaten.

Leviticus 11:4 sotheli what euer thing chewith code, and hath a clee, but departith not it, as a camel and othere beestis doon, ye schulen not ete it, and ye schulen arette among vnclene thingis. Leviticus 11:5 A cirogrille, which chewith code, and departith not the clee, is vnclene; and an hare, Leviticus 11:6 for also he chewith code, but departith not the clee; Leviticus 11:7 and a swiyn, that chewith not code, thouy he departith the clee. Leviticus 11:8 Ye schulen not ete the fleischis of these, nether ye schulen touche the deed bodies, for tho ben vnclene to you.

What fishes.

Leviticus 11:9 Also these thingis ben that ben gendrid in watris, and is leueful to ete; Leviticus 11:10 ye schulen ete al thing that hath fynnes and scalis, as wel in the see, as in floodis and stondynge watris; sotheli what euer thing of tho that ben moued and lyuen in watris, hath not fynnes and scalis, schal be abhominable, and wlatsum to you; Leviticus 11:11 ye schulen not ete the fleischis of tho, and ye schulen eschewe the bodies deed bi hem silf. Leviticus 11:12 Alle thingis in watris that han not fynnes and scalis, schulen be pollutid,

What fowls.

Leviticus 11:13 These thingis ben of foulis whiche ye schulen not ete, and schulen be eschewid of you; an egle, and a grippe, aliete, and a kyte, and a vultur by his kynde; Leviticus 11:14 and al of rauyns kynde bi his licnesse; Leviticus 11:15 a strucioun, Leviticus 11:16 and nyyt crowe, a lare, and an hauke bi his kinde; Leviticus 11:17 an owle, and dippere, and ibis; Leviticus 11:18 a swan and cormoraunt, and a pellican; Leviticus 11:19 a fawcun, a iay bi his kynde; a leepwynke, and a reremows. Leviticus 11:20 Al thing of foulis that goith on foure feet, schal be abhomynable to you; Leviticus 11:21 sotheli what euer thing goith on foure feet, but hath lengere hipis bihynde, bi whiche it skippith on the erthe, ye schulen ete; Leviticus 11:22 as is a bruke in his kynde, and acatus, and opymacus, and a locuste, alle bi her kynde. Leviticus 11:23 Forsothe what euer thing of briddis hath foure feet oneli, it schal be abhomynable to you; Leviticus 11:24 and who euer touchith her bodies deed bi hem silf, schal be defoulid, and schal be vnclene til to euentid; Leviticus 11:25 and if it is nede, that he bere ony deed thing of these, he schal waische his clothis, and he schal be vnclene til to the goyng doun of the sunne. Leviticus 11:26 Sotheli ech beeste that hath a clee, but departith not it, nether chewith code, schal be vnclene; and what euer thing touchith it, schal be defoulid. Leviticus 11:27 That that goith on hondis, of alle beestis that gon on foure feet, schal be vnclene; he, that touchith her bodies deed bi hem silf, schal be defoulid til to euentid; Leviticus 11:28 and he, that berith siche deed bodies, schal waische hise clothis, and he schal be vnclene til to euentid; for alle these thingis ben vnclene to you.

The creeping things which are unclean.

Leviticus 11:29 Also these thingis schulen be arettid among defoulid thingis, of these that ben moued on erthe; a wesele, and mows, and a cocodrille, alle bi her kynde; Leviticus 11:30 mygal, camelion, and stellio, and lacerta, and a maldewerp. Leviticus 11:31 Alle these ben vnclene; he that touchith her bodies deed bi hem silf, schal be vnclene til to euentid; Leviticus 11:32 and that thing schal be defoulid, on which ony thing of her bodies deed bi hem silf fallith, as wel a vessel of tree, and a cloth, as skynnes and heiris; and in what euer thing werk is maad, it schal be dippid in watir, and tho thingis schulen be defoulid til to euentid, and so aftirward tho schulen be clensid. Leviticus 11:33 Sotheli a vessel of erthe, in which ony thing of these fallith with ynne, schal be defoulid, and therfor it schal be brokun. Leviticus 11:34 Ech mete, which ye schulen ete, schal be vnclene, if water is sched thereon; and ech fletynge thing, which is drunkun of ech vessel, where ynne vnclene thingis bifelden, schal be vnclene; Leviticus 11:35 and what euer thing of siche deed bodies bi hem silf felde theronne, it schal be vnclene, whether furneisis, ethir vessels of thre feet, tho schulen be destried, and schulen be vnclene. Leviticus 11:36 Sotheli wellis and cisternes, and al the congregacioun of watris, schal be clene. He that touchith her bodi deed bi it silf, schal be defoulid. Leviticus 11:37 If it fallith on seed, it schal not defoule the seed; Leviticus 11:38 sotheli if ony man schedith seed with watir, and aftirward the watir is touchid with deed bodies bi hem silf, it schal be defoulid anoon. Leviticus 11:39 If a beeste is deed, which it is leueful to you to ete, he that touchith the deed bodi therof schal be vnclene til to euentid; and he that etith therof ony thing, Leviticus 11:40 ethir berith, schal waische his clothis, and schal be vnclene til to euentid. Leviticus 11:41 Al thing that crepith on erthe, schal be abhomynable, nether schal be takun in to mete. Leviticus 11:42 What euer thing goith on the brest and foure feet, and hath many feet, ethir drawun bi the erthe, ye schulen not ete, for it is abhomynable. Leviticus 11:43 Nyle ye defoule youre soulis, nether touche ye ony thing of tho, lest ye ben vnclene; Leviticus 11:44 for Y am youre Lord God; be ye hooli, for Y am hooli. Defoule ye not youre soulis in ech crepynge beeste which is moued on erthe; for Y am the Lord, Leviticus 11:45 that ladde you out of the lond of Egipt, that Y schulde be to you in to God; ye schulen be hooli, for Y am hooli. Leviticus 11:46 This is the lawe of lyuynge beestes, and of foulis, and of ech lyuynge soule which is moued in watir, and crepith in erthe; Leviticus 11:47 that ye knowe differences of clene thing and vnclene, and that ye wite what ye schulen ete, and what ye owen forsake.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook