Wycliffe Bible

Judges 7

Gideon's army of two and thirty thousand is brought to three hundred.

Judges 7:1 Therfor Jerobaal, which also Gedeon, roos bi nyyt, and al the puple with hym, and cam to the welle which is clepid Arad. Sotheli the tentis of Madian weren in the valey, at the north coost of the hiy hil. Judges 7:2 And the Lord seide to Gedeon, Myche puple is with thee, and Madian schal not be bitakun in to the hondis ther of, lest Israel haue glorie ayens me, and seie, Y am delyuerid bi my strengthis. Judges 7:3 Speke thou to the puple, and preche thou, while alle men heren, He that is ferdful in herte, and dredeful with outforth, turne ayen. And thei yeden awei fro the hil of Galaad, and two and twenti thousynde of men turniden ayen fro the puple; and oneli ten thousynde dwelliden. Judges 7:4 And the Lord seide to Gedeon, Yet the puple is myche; lede thou hem to the watris, and there Y schal preue hem, and he go, of whom Y schal seye, that he go; turne he ayen, whom Y schal forbede to go. Judges 7:5 And whanne the puple hadde go doun to watris, the Lord seide to Gedeon, Thou schalt departe hem bi hem silf, that lapen watris with hond and tunge, as doggis ben wont to lape; sotheli thei, that drynken with knees bowid, schulen be in the tothir part. Judges 7:6 And so the noumbre of hem, that lapiden watris bi hond castynge to the mouth, was thre hundrid men; forsothe al the tothir multitude drank knelynge. Judges 7:7 And the Lord seide to Gedeon, In thre hundrid men, that lapiden watris, Y schal delyuere you, and Y schal bitake Madian in thin hond; but al the tothir multitude turne ayen in to her place. Judges 7:8 And so whanne thei hadden take meetis and trumpis for the noumbre, he comaundide al the tothir multitude to go to her tabernaclis; and he, with thre hundrid men, yaf hym silf to batel. Sothely the tentis of Madian weren bynethe in the valey.

He is encouraged by the dream and interpretation of the barley cake.

Judges 7:9 In the same nyyt the Lord seyde to hym, Ryse thou, and go doun in to the castels of Madian, for Y haue bitake hem in thin hond; Judges 7:10 sotheli if thou dredist to go aloon, Phara, thi child, go doun with thee. Judges 7:11 And whanne thou schalt here what thei speken, thanne thin hondis schulen be coumfortid, and thou schalt do down sikerere to the tentis of enemyes. Therfor he yede doun, and Phara, his child, in to the part of tentis, where the watchis of armed men weren. Judges 7:12 Forsothe Madian, and Amalech, and alle the puplis of the eest layen spred in the valey, as the multitude of locustis; sotheli the camelis weren vnnoumbrable, as grauel that liggith in the brenke of the see. Judges 7:13 And whanne Gedeon hadde come, a man tolde a dreem to his neiybore, and telde bi this maner that, that he hadde seyn, I siy a dreem, and it semyde to me, that as o loof of barly bakun vndur the aischis was walewid, and cam doun in to the tentis of Madian; and whanne it hadde come to a tabernacle, it smoot and distriede that tabernacle, and made euene outirly to the erthe. Judges 7:14 That man answeride, to whom he spak, This is noon other thing, no but the swerd of Gedeon, sone of Joas, a man of Israel; for the Lord hath bitake Madian and alle tentis therof in to the hondis of Gedeon.

Judges 7:15 And whanne Gedeon had herd the dreem, and the interpretyng therof, he worschypide the Lord, and turnede ayen to the tentis of Israel, and seide, Ryse ye; for the Lord hath bitake in to oure hondis the tentis of Madian.

His stratagem of trumpets and lamps in pitchers.

Judges 7:16 And he departide thre hundrid men in to thre partis, and he yaf trumpis in her hondis, and voyde pottis, and laumpis in the myddis of the pottis. Judges 7:17 And he seide to hem, Do ye this thing which ye seen me do; Y schal entre in to a part of the tentis, and sue ye that, that Y do. Judges 7:18 Whanne the trumpe in myn hond schal sowne, sowne ye also bi the cumpas of tentis, and crye ye togidere, To the Lord and to Gedeon.

Judges 7:19 And Gedeon entride, and thre hundrid men that weren with hym, in to a part of the tentis, whanne the watchis of mydnyyt bigunnen; and whanne the keperis weren reysid, thei bigunnen to sowne with trumpis, and to bete togidere the pottis among hem silf. Judges 7:20 And whanne thei sowneden in thre places bi cumpas, and hadden broke the pottis, thei helden laumpis in the left hondis, and sownynge trumpis in the riyt hondis; and thei crieden, The swerd of the Lord and of Gedeon; and stoden alle in her place, Judges 7:21 bi the cumpas of the tentis of enemyes. And so alle the tentis weren troblid; and thei crieden, and yelliden, and fledden; Judges 7:22 and neuertheles the thre hundrid men contynueden, sownynge with trumpis. And the Lord sente swerd in alle the castels, and thei killiden hem silf bi deeth ech other; Judges 7:23 and thei fledden til to Bethsecha, and bi the side, fro Elmonla in to Thebbath. Sotheli men of Israel crieden togidere, of Neptalym, and of Aser, and of alle Manasses, and pursueden Madian; and the Lord yaf victorie to the puple of Israel in that day.

The Ephraimites take Oreb and Zeeb.

Judges 7:24 And Gedeon sente messangeris in to al the hil of Effraym, and seide, Come ye doun ayens the comyng of Madian, and ocupie ye the watris til to Bethbera and Jordan. And al Effraym criede, and bifore ocupide the watris and Jordan til to Bethbera. Judges 7:25 And Effraym killide twei men of Madian, Oreb and Zeb; he killide Oreb in the ston of Oreb, forsothe he killide Zeb in the pressour of Zeb; and thei pursueden Madian, and baren the heedis of Oreb and of Zeb to Gedeon, ouer the flodis of Jordan.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook