Wycliffe Bible

Judges 5

The song of Deborah and Barak.

Judges 5:1 And Delbora and Barach, sone of Abynoen, sungen in that dai, and seiden, Judges 5:2 Ye men of Israel, that offriden wilfuli youre lyues to perel, blesse the Lord. Judges 5:3 Ye kingis, here, ye princes, perceyueth with eeris; Y am, Y am the womman, that schal synge to the Lord; Y schal synge to the Lord God of Israel. Judges 5:4 Lord, whanne thou yedist out fro Seir, and passidist bi the cuntrees of Edom, the erthe was moued, and heuenes and cloudis droppiden with watris; Judges 5:5 hillis flowiden fro the face of the Lord, and Synai fro the face of the Lord God of Israel. Judges 5:6 In the daies of Sangar, sone of Anach, in the daies of Jahel, paththis restiden, and thei that entriden bi tho yeden bi paththis out of the weie. Judges 5:7 Stronge men in Israel cessiden, and restiden, til Delbora roos, a modir in Israel. Judges 5:8 The Lord chees newe batels, and he destriede the yatis of enemyes; scheeld and spere apperiden not in fourti thousynde of Israel. Judges 5:9 Myn herte loueth the princes of Israel; ye that offriden you to perel bi youre owyn wille, Judges 5:10 blesse ye the Lord; speke ye, that stien on schynynge assis, and sitten aboue in doom, and goen in the wey. Judges 5:11 Where the charis weren hurtlid doun to gidere, and the oost of enemyes was straunglid, there the riytfulnessis of the Lord be teld, and mercy among the stronge of Israel; thanne the puple of the Lord cam doun to the yatis, and gat prinsehod. Judges 5:12 Rise, rise thou, Delbora, rise thou, and speke a song; rise thou, Barach, and thou, sone of Abynoen, take thi prisoneris. Judges 5:13 The relikis of the puple ben sauyd; the Lord fauyt ayens stronge men of Effraym. Judges 5:14 He dide awei hem in Amalech, and aftir hym of Beniamyn in to thi puplis, thou Amalech. Princes of Machir and of Zabulon yeden doun, that ledden oost to fiyte. Judges 5:15 The duykis of Isachar weren with Delbora, and sueden the steppis of Barach, which yaf hym silf to perel, as in to a dich, and in to helle. While Ruben was departid ayens hym silf; the strijf of greet hertyd men was foundun. Judges 5:16 Whi dwellist thou bitwixe tweyne endis, that thou here the hissyngis of flockis? While Ruben was departid ayens hym silf, the strijf of greet hertid men was foundun. Judges 5:17 Gad restide biyendis Jordan, and Dan yaf tent to schippis. Aser dwellide in the brenke of the see, and dwellide in hauenes. Judges 5:18 Forsothe Zabulon and Neptalym offriden her lyues to deeth, in the cuntre of Morema, that is interpretid, hiy. Judges 5:19 Kyngis camen, and fouyten; kyngis of Canaan fouyten in Thanath, bisidis the watris of Magedon; and netheles thei token no thing bi prey. Judges 5:20 Fro heuene me fauyt ayens hem; sterris dwelliden in her ordre and cours, and fouyten ayens Sisara. Judges 5:21 The stronde of Cyson drow the deed bodies of hem, the stronde of Cadymyn, the stronde of Cyson. My soule, to-trede thou stronge men. Judges 5:22 The hors howis felden, while the strongeste of enemyes fledden with bire, and felden heedli. Judges 5:23 Curse ye the lond of Meroth, seide the aungel of the Lord, curse ye the dwelleris of hym, for thei camen not to the help of the Lord, in to the help of the strongeste of hym. Judges 5:24 Blessyd among wymmen be Jahel, the wijf of Aber Cyney; blessid be sche in hir tabernacle. Judges 5:25 To Sisara axynge watir sche yaf mylk, and in a viol of princes sche yaf botere. Judges 5:26 Sche puttide the left hond to a nail, and the riyt hond to the hameris of smyythis; and sche smoot Sisara, and souyte in the heed a place of wounde, and perside strongli the temple. Judges 5:27 He felde bitwixe the feet of hir, he failide, and diede; he was waltryd bifor hir feet, and he lay with out soule, and wretchidful. Judges 5:28 His modir bihelde bi a wyndow, and yellide; and sche spak fro the soler, Whi tarieth his chaar to come ayen? Whi tarieden the feet of his foure horsid cartis? Judges 5:29 Oon wisere than othere wyues of hym answeride these wordis to the modir of hir hosebonde, Judges 5:30 In hap now he departith spuylis, and the faireste of wymmen is chosun to hym; clothis of dyuerse colouris ben youun to Sisara in to prey, and dyuerse aray of houshold is gaderid to ourne neckis. Judges 5:31 Lord, alle thin enemyes perische so; sotheli, thei that louen thee, schyne so, as the sunne schyneth in his risyng. And the lond restide fourti yeer.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook