Wycliffe Bible

Judges 4

Deborah and Barak deliver Israel from Jabin and Sisera.

Judges 4:1 And the sones of Israel addiden to do yuel in the siyt of the Lord, aftir the deeth of Aioth. Judges 4:2 And the Lord bitook hem in to the hondis of Jabyn, kyng of Canaan, that regnede in Asor; and he hadde a duyk of his oost, Sisara bi name; and he dwellide in Aroseth of hethene men. Judges 4:3 And the sones of Israel crieden to the Lord; for he hadde nyn hundrid yrone charis, keruynge as sithis, and twenti yeer he oppresside hem greetli.

Judges 4:4 Forsothe Delbora was a prophetesse, the wijf of Lapidoth, which Delbora demyde the puple in that tyme; Judges 4:5 and sche sat vndur a palm tree, that was clepid bi her name, bitwixe Rama and Bethel, in the hil of Effraym; and the sones of Israel stieden to hir at ech dom. Judges 4:6 And sche sente, and clepide Barach, the sone of Abynoen, of Cedes of Neptalym, and sche seide to hym, The Lord God of Israel comaundide to thee, Go thou, and lede an oost in to the hil of Thabor, and thou schalt take with thee ten thousande of fiyteris of the sones of Neptalym and of the sones of Zabulon. Judges 4:7 Sotheli Y schal brynge to thee, in the place of the stronde of Cison, Sisara, prince of the oost of Jabyn, and his charis, and al the multitude; and Y schal bitake hem in thin hond. Judges 4:8 And Barach seide to hir, If thou comest with me, Y schal go; if thou nylt come with me, Y schal not go. Judges 4:9 And sche seyde to hym, Sotheli Y schal go with thee; but in this tyme the victorie schal not be arettide to thee; for Sisara schal be bitakun in the hond of a womman. Therfor Delbora roos, and yede with Barach in to Cedes.

Judges 4:10 And whanne Zabulon and Neptalym weren clepid, he stiede with ten thousynde of fiyteris, and hadde Delbora in his felouschipe. Judges 4:11 Forsothe Aber of Cyneth hadde departid sum tyme fro othere Cyneys hise britheren, sones of Obab, alie of Moises; and he hadde set forth tabernaclis til to the valei, which is clepid Sennym, and was bisidis Cedes. Judges 4:12 And it was teld to Sisara, that Barach, sone of Abynoen, hadde stiede in to the hil of Thabor. Judges 4:13 And he gaderide nyn hundrid yronne charis, keruynge as sithis, and al the oost fro Aroseth of hethene men to the stronde of Cison. Judges 4:14 And Delbora seide to Barach, Rise thou, for this is the day, in which the Lord bitook Sisara in to thin hondis; lo! the Lord is thi ledere. And so Barach cam doun fro the hil of Thabor, and ten thousynde of fyyteris with hym. Judges 4:15 And the Lord made aferd Sisara, and alle the charis of hym, and al the multitude, bi the scharpnesse of swerd, at the siyt of Barach, in so myche that Sisara lippide doun of the chare, and fledde a foote. Judges 4:16 And Barach pursuede the charis fleynge and the oost til to Aroseth of hethene men; and al the multitude of enemyes felde doun til to deeth. Judges 4:17 Sotheli Sisara fledde, and cam to the tente of Jahel, the wijf of Aber Cyney; forsothe pees waas bitwixe Jabyn, kyng of Asor, and bitwixe the hows of Aber Cyney.

Jael killeth Sisera.

Judges 4:18 Therfor Jahel yede out in to the comyng of Sisara, and seide to hym, My lord, entre thou to me, entre thou to me; drede thou not. And he entride in to the tabernacle of hir, and was hilid of hir with a mentil. Judges 4:19 And he seide to hir, Y biseche, yyue thou to me a litil of watir, for Y thirste greetli. And sche openyde a botel of mylk, and yaf to hym to drynke, and hilide hym. Judges 4:20 And Sisara seide to hir, Stonde thou bifor the dore of the tabernacle, and whanne ony man cometh, and axith thee, and seith, Whether ony man is here? thou schalt answere, No man is here. Judges 4:21 And so Jahel, the wijf of Aber, took a nayl of the tabernacle, and sche took also an hamer; and sche entride pryueli, and puttide with silence the nail on the temple of his heed, and sche fastnede the nail smytun with the hamer in to the brayn, til to the erthe; and he slepte, and diede to gidere, and failide, and was deed. Judges 4:22 And lo! Barach suede Sisara, and cam; and Jahel yede out in to his comyng, and seide to hym, Come, and Y schal schewe to thee the man, whom thou sekist. And whanne he hadde entrid to hir, he siy Sisara liggynge deed, and a nail fastnede in to hise templis. Judges 4:23 Therfor in that day God made low Jabyn, the kyng of Canaan, bifor the sones of Israel; Judges 4:24 whiche encresiden ech dai, and with strong hond oppressiden Jabyn, the kyng of Canaan, til thei diden hym awey.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook