Judges 15
Samson is denied his wife.
Judges 15:1 Forsothe aftir sum del of tyme, whanne the daies of wheete heruest neiyiden, Sampson cam, and wolde visite his wijf, and he brouyte to hir a kide of geet; and when he wolde entre in to hir bed bi custom, the fadir of hir forbeed hym, and seide, Judges 15:2 Y gesside that thou haddist hatid hir, and therfor Y yaf hir to thi freend; but sche hath a sistir, which is yongere and fairere than sche, be sche wijf to thee for hir.
He burneth the Philistines' corn with foxes and firebrands.
Judges 15:3 To whom Sampson answeride, Fro this day no blame schal be in me ayens Filistees, for Y schal do yuels to you. Judges 15:4 And he yede, and took thre hundrid foxis, and ioynede the tailis of hem to tailis, and boond brondis in the myddis, Judges 15:5 whiche he kyndlid with fier, and leet hem, that thei schulden renne aboute hidur and thidur; which yeden anoon in to the cornes of Filisteis, bi whiche kyndlid, bothe cornes borun now to gidere, and yit stondynge in the stobil, weren brent, in so myche that the flawme wastide vyneris, and places of olyue trees.
His wife and her father are burnt by the Philistines.
Judges 15:6 And Filisteis seiden, Who dide this thing? To whiche it was seid, Sampson, hosebonde of the douytir of Thannathei, for he took awey Sampsones wijf, and yaf to another man, wrouyte this thing. And Filisteis stieden, and brenten bothe the womman and hir fadir.
Samson smiteth them hip and thigh.
Judges 15:7 To whiche Sampson seide, Thouy ye han do this, netheles yit Y schal axe veniaunce of you, and than Y schal reste. Judges 15:8 And he smoot hem with greet wounde, so that thei wondriden, and puttiden the hyndrere part of the hipe on the thiy; and he yede doun, and dwellide in the denne of the stoon of Ethan.
He is bound by the men of Judah and delivered to the Philistines.
Judges 15:9 Therfor Filisteis stieden in to the lond of Juda, and settiden tentis in the place, that was clepid aftirward Lethi, that is, a cheke, wher the oost of hem was spred a brood. Judges 15:10 And men of the lynage of Juda seiden to hem, Whi stieden ye ayens vs? Whiche answeriden, We comen that we bynde Sampson, and yelde to hym tho thingis whiche he wrouyte in vs. Judges 15:11 Therfor thre thousynde of men of Juda yeden doun to the denne of the flynt of Ethan; and thei seiden to Sampson, Woost thou not, that Filisteis comaunden to vs? Why woldist thou do this thing? To whiche he seide. Judges 15:12 As thei diden to me, Y dide to hem. Thei seien, We comen to bynde thee, and to bitake thee in to the hondis of Filisteis. To whiche Sampson answeride, Swere ye, and biheete ye to me, that ye sle not me. Judges 15:13 And thei seiden, We schulen not sle thee, but we schulen bitake thee boundun. And thei bounden him with twei newe cordis, and token fro the stoon of Ethan.
He killeth them with a jawbone.
Judges 15:14 And whanne thei hadden come to the place of cheke, and Filisteis criynge hadden runne to hym, the spirit of the Lord felde in to hym, and as stikis ben wont to be wastid at the odour of fier, so and the bondis, with whiche he was boundun, weren scaterid and vnboundun. Judges 15:15 And he took a cheke foundun, that is, the lowere cheke boon of an asse, that lay, and he killyde with it a thousinde men; and seide, Judges 15:16 With the cheke of an asse, that is, with the lowere cheke of a colt of femal assis, Y dide hem awey, and Y killide a thousynde men. Judges 15:17 And whanne he songe these wordis, and hadde fillid, he castide forth fro the hond the lowere cheke; and he clepide the name of that place Ramath Lethi, which is interpretid, the reisyng of a cheke.
God maketh the fountain En-hakkore for him in Lehi.
Judges 15:18 And he thristide greetly, and criede to the Lord, and seide, Thou hast youe in the hond of thi seruaunt this grettest helthe and victory; and lo! Y die for thyrst, and Y schal falle in to the hondis of vncircumcidid men. Judges 15:19 Therfor the Lord openyde a wang tooth in the cheke boon of the asse, and watris yeden out therof, bi whiche drunkun he refreischide the spirit, and resseuede strengthis; therfor the name of that place was clepid the Welle of the clepere of the cheke til to present dai. Judges 15:20 And he demyde Israel in the daies of Filistiym twenti yeer.
|
