Joshua 13
The bounds of the land not yet conquered.
Joshua 13:1 Josue was eld and of greet age; and the Lord seide to him, Thou hast woxe eld, and art of long tyme; and largeste lond is left, which is not yit departid bi lot; Joshua 13:2 that is, al Galile, Filistiym, and al Gessuri, Joshua 13:3 fro the troblid flood that moistith Egipt, til to the termes of Acaron ayenus the north; the lond of Chanaan, which is departid in to fyue litle kyngis of Filistym, of Gaza, and of Azotus, of Ascolon, of Geth, and of Accaron. Joshua 13:4 Forsothe at the south ben Eueis, al the lond of Canaan, and Maara of Sidonyes, til to Affetha, and to the termes of Amorrei, and the coostis of hym; Joshua 13:5 and the cuntrei of Liban ayens the eest, fro Baalgath, vndur the hil of Hermon, til thou entrist into Emath, Joshua 13:6 of alle men that dwelliden in the hil, fro the Liban til to the watris of Masserephoth, and alle men of Sidon; Y am, that schal do awei hem fro the face of the sones of Israel; therfor come it in to the part of eritage of Israel, as Y comaundide to thee. Joshua 13:7 And thou now departe the lond in to possessioun to the nyne lynagis, and to the half lynage of Manasses,
The inheritance of the two tribes and half.
Joshua 13:8 with which lynage Ruben and Gad weldiden the lond, which lond Moises, the seruaunt of the Lord, yaf to hem biyende the flowyngis of Jordan, at the eest coost; Joshua 13:9 fro Aroer, which is set in the brynke of the stronde of Arnon, in the middis of the valei, and alle the feeldi places of Medaba, Joshua 13:10 til to Dibon, and alle the citees of Seon, kyng of Amorreis, that regnyde in Esebon, til to the termes of the sones of Amon, Joshua 13:11 and of Galaad, and to the termes of Gessuri, and of Machati, and al the hil of Hermon, and al Basan, til to Salecha; Joshua 13:12 al the rewme of Og in Basan, that regnede in Astoroth, and in Edraym; he was of the relikis of Rafaym, that is, of giauntis; and Moises smoot hem and dide awey hem. Joshua 13:13 And the sones of Israel nolden destrye Gessurri and Machati; and thei dwelliden in the myddis of Israel, til in to present dai.
The LORD and his sacrifices are the inheritance of Levi.
Joshua 13:14 Sotheli he yaf not possessioun to the lynage of Leuy, but sacrifices, and slayn sacrifices of the Lord God of Israel; that is his eritage, as God spak to hym.
The bounds of the inheritance of Reuben.
Joshua 13:15 Therfor Moises yaf possessioun to the lynage of the sones of Ruben, bi her kynredis; Joshua 13:16 and the term of hem was fro Aroer, which is set in the brenke of the stronde of Arnon, and in the myddil valei of the same stronde, al the pleyn that ledith to Medaba, Joshua 13:17 and Esebon, and alle the townes of tho, that ben in the feeldi places; and Dibon, and Baal Bamoth, and the citee of Baal Meon, Joshua 13:18 and Gesa, and Sedymoth, and Mephe, Joshua 13:19 and Cariathaym, and Sabana, and Sarathaphar, in the hil of the valey of Betheroeth, Joshua 13:20 and of Asedoch, Phasca, and Bethaissymoth; Joshua 13:21 alle the feeldi citees, and alle the rewmes of Seon, kyng of Amorrey, that regnede in Esebon, whom Moyses smoot, with hise princes, Madian, Euey and Recten, and Sur, and Hur, and Rebee, duykis of Seon, enhabiters of the lond.
Balaam slain.
Joshua 13:22 And the sones of Israel killiden bi swerd Balaam, the fals diuynour, the sone of Beor, with othere men slayn. Joshua 13:23 And the terme of the sones of Ruben was maad the flood of Jordan; this is the possessioun of Rubenytis bi her kynredis of citees and of townes.
The bounds of the inheritance of Gad,
Joshua 13:24 And Moises yaf to the lynage of Gad, and to the sones therof, bi her kynredis, possessioun, of which this is departyng; Joshua 13:25 he yaf the termes of Jazer, and alle the citees of Galaad, and the half part of the lond of the sones of Amon, til to Aroer which is ayens Tabba; Joshua 13:26 and fro Esebon til to Ramoth of Masphe, and Bethamyn, and Manayn, til to the termes of Dabir; Joshua 13:27 and in the valei he yaf Betharan, and Bethneuar, and Socoth, and Saphan, the tother part of the rewme of Seon, kyng of Esebon; and the ende of this is Jordan, til to the laste part of the see of Cenereth ouer Jordan, at the eest coost. Joshua 13:28 This is the possessioun of the sones of Gad, bi her meynees, the citees and townes of tho.
and of the half tribe of Manasseh.
Joshua 13:29 He yaf also possessioun to the half lynage of Manasses, and to hise sones, bi her kynredis, Joshua 13:30 of which possessioun this is the bigynnyng; he yaf Ammaym, and al Basan, and alle the rewmes of Og, kyng of Basan, and alle the townes of Jair, that ben in Basan, sixti citees; Joshua 13:31 and half the part of Galaad, and Astoroth, and Edray, the citees of the rewme of Og, kyng of Basan; to the sones of Machir, sones of Manasses, and to half the part of the sones of Machir, bi her kynredis. Joshua 13:32 Moises departide this possessioun in the feeldi placis of Moab ouer Jordan, ayens Jericho, at the eest coost.
The LORD and his sacrifices are the inheritance of Levi.
Joshua 13:33 Forsothe he yaf not possessioun to the lynage of Leuy; for the Lord God himself of Israel is the possessioun of Leuy, as the Lord spak to hym.
|
