Five kings war against Gibeon.
Joshua 10:1 And whanne Adonysedech, kyng of Jerusalem, hadde herde these thingis, that is, that Josue hadde take Hai, and hadde destried it; for as Josue hadde do to Jerico and to the kyng therof, so he dide to Hay, and to the kyng therof; and that Gabaonytis hadden fled to Israel, and weren boundun in pees with hem, Joshua 10:2 Adonysedech dredde greetli; for Gabaon was a greet citee, and oon of the kyngis citees, and grettere than the citee of Hai, and alle the fiyteris therof weren most stronge. Joshua 10:3 Therfor Adonysedech, kyng of Jerusalem, sente to Ocham, kyng of Ebron, and to Pharam, kyng of Herymoth, and to Japhie, kyng of Lachis, and to Dabir, kyng of Eglon, and seide, Joshua 10:4 Stie ye to me, and helpe ye, that we fiyte ayens Gabaon, for it was yoldun to Josue, and to the sones of Israel. Joshua 10:5 Therfor fyue kyngis of Ammorreis, the kyng of Jerusalem, the kyng of Ebron, the kyng of Herymoth, the kyng of Lachis, the kyng of Eglon, weren gaderid, and stieden togidere with her oostis; and settiden tentis ayens Gabaon, and fouyten ayens it.
Joshua rescueth it.
Joshua 10:6 Sotheli the dwelleris of the citee of Gabaon, that weren bisegid, senten to Josue, that dwellide than in tentis at Galgala, and seide to hym, Withdrawe not thin hondis fro the help of thi seruauntis; stie thou soone, and delyuere vs, and helpe thou; for alle the kyngis of Amorreis, that dwelliden in the hilli places, camen togidere ayens vs. Joshua 10:7 And Josue stiede fro Galgala, and al the oost of fiyters, the strengeste men, with hym.
Joshua 10:8 And the Lord seide to Josue, Drede thou not hem, for Y yaf hem in to thin hondis; noon of hem schal mow ayenstonde thee. Joshua 10:9 Therfor Josue felde sodenli on hem, and stiede in al the nyyt fro Galgala; Joshua 10:10 and the Lord disturblide hem fro the face of Israel, and al to-brak with greet veniaunce in Gabaon. And Josue pursuede hem bi the weie of the stiyng of Betheron, and smoot til to Azecha and Maceda.
God fighteth against them with hailstones.
Joshua 10:11 And whanne thei fledden the sones of Israel, and weren in the goyng doun of Betheron, the Lord sente grete stoonus on hem fro heuene, til to Azecha; and many mo weren deed bi the stoonys of hail, than thei whiche the sones of Israel smytiden bi swerd.
The sun and moon stand still at the word of Joshua.
Joshua 10:12 Thanne Josue spak to the Lord, in the dai in which he bitook Amorrey in the siyt of the sones of Israel; and Josue seide bifore hem, Sunne, be thou not mouyd ayens Gabaon, and the moone ayens the valei of Hailon. Joshua 10:13 And the sunne and the moone stoden, til the folc of God vengide it silf of hise enemyes. Whether this is not writun in the book of iust men? And so the sunne stood in the myddis of heuene, and hastide not to go doun in the space of o dai; so long a dai was not bifore and aftirward; Joshua 10:14 for the Lord obeiede to the vois of man, and fauyt for Israel.
Joshua 10:15 And Josue turnede ayen, with al Israel, in to the tentis of Galgala.
The five kings are mured in a cave.
Joshua 10:16 Forsothe fyue kyngis fledden, and hidden hem silf in the denne of the citee of Maceda. Joshua 10:17 And it was teld to Josue, that fyue kyngis weren foundun hid in the denne of the citee of Maceda. Joshua 10:18 Which Josue comaundide to felowis, and seide, Walewe ye grete stoonus to the mouth of the denne, and putte ye witti men, that schulen kepe the closid kyngis; sotheli nyle ye stonde, Joshua 10:19 but pursue ye the enemyes, and slee ye alle the laste of fleeris; and suffre ye not hem entre in to the strengthis of her citees, whiche enemyes youre Lord God bitook in to youre hondis. Joshua 10:20 Therfor whanne the aduersaries weren betun with greet veniaunce, and weren almost wastid til to deeth, thei that myyten fle Israel, entriden in to the strengthid citees. Joshua 10:21 And al the oost turnede ayen hoole, and in hoole noumbre to Josue, in to Maceda, where the tentis weren thanne; and no man was hardi to grutche, ether to make priuy noise, ayens the sones of Israel. Joshua 10:22 And Josue comaundide, and seide, Opene ye the mouth of the denne, and brynge forth to me the fyue kyngis that ben hid therynne.
They are brought forth,
Joshua 10:23 And the mynystris diden, as it was comaundid to hem; and thei brouyten forth to Josue fyue kyngis fro the denne; the kyng of Jerusalem, the kyng of Ebron, the kyng of Herymoth, the kyng of Lachis, the kyng of Eglon.
Joshua 10:24 And whanne thei weren led out to Josue, he clepide alle the men of Israel, and seide to the princes of the oost, that weren with hym, Go ye, and sette youre feet on the neckis of these kyngis. And whanne thei hadden go, and trediden the neckis of the kyngis suget to her feet, Joshua 10:25 eft Josue seide to hem, Nyle ye drede, nethir drede ye with ynne, be ye coumfortid, and be ye stronge; for the Lord schal do so to alle youre enemyes, ayens whiche ye schulen fiyte.
Joshua 10:26 And Josue smoot, and killide hem, and hangide on fyue trees; and thei weren hangid til to euentid. Joshua 10:27 And whanne the sunne yede doun, he comaundide to felowis, that thei schulden put hem doun fro the iebatis; and whanne thei weren put doun, thei castiden forth hem in to the denne, in which thei weren hid; and thei puttiden grete stoonus on the mouth therof, whiche stoonus dwellen til to present tyme.
Seven kings more are conquered.
Joshua 10:28 In the same dai Josue took also Maceda, and smoot bi the scharpnesse of swerd, and killide the kyng therof, and alle the dwelleris therof; he lefte not therynne, nameli, litle relikis; and he dide to the kyng of Maceda as he hadde do to the kyng of Jerico. Joshua 10:29 Forsothe Josue passide with al Israel fro Maceda in to Lempna, and fauyt ayens it, Joshua 10:30 which the Lord bitook, with the kyng therof, in the hond of Israel; and thei smytiden the citee bi the scharpnesse of swerd, and alle the dwelleris therof, and leften not ony relikis therynne; and thei diden to the kyng of Lempna as thei hadden do to the kyng of Jerico.
Joshua 10:31 Fro Lempna he passide with al Israel in to Lachis; and whanne the oost was disposid bi cumpas, he fauyt ayens it. Joshua 10:32 And the Lord bitook Lachis in the hond of the sones of Israel; and he took it in the tothir dai, and smoot bi the scharpnesse of swerd, and ech man, that was therynne, as he hadde do to Lempna.
Joshua 10:33 In that time Yram, kyng of Gazar, stiede to helpe Lachis; whom Josue smoot, with al his puple, til to deeth.
Joshua 10:34 And he passide fro Lachis in to Eglon, Joshua 10:35 and cumpasside, and ouercam it in the same dai; and he smoot bi the scharpnesse of swerd alle men that weren therynne, bi alle thingis whiche he hadde do to Lachis. Joshua 10:36 Also he stiede with al Israel fro Eglon in to Ebron, and fauyt ayens it, Joshua 10:37 and took, and smoot bi the scharpnesse of swerd; and the kyng therof, and alle citees of that cuntrey, and alle men that dwelliden therynne; he lefte not ony relikis therynne; as he hadde do to Eglon so he dide also to Ebron, and wastide bi swerd alle thingis that weren therynne.
Joshua 10:38 Fro thennus he turnyde in to Dabir, and took it, and wastide; Joshua 10:39 and he smoot bi the scharpnesse of swerd the kyng therof, and alle tounnes bi cumpas; he lefte not ony relikis therynne; as he hadde do to Ebron, and to Lempna, and to the kyngis of tho, so he dide to Dabir, and to the kyng therof.
Joshua 10:40 And so Josue smoot al the lond of the hillis, and of the south, and of the feeld, and Asedoch with her kyngis; he lefte not therynne ony relikis, but he killide al thing that myyte brethe, as the Lord God of Israel comaundide to hym; Joshua 10:41 fro Cades Barne til to Gazan, and al the lond of Jesson, til to Gabaon Josue took, Joshua 10:42 and wastide with o fersnesse alle the kyngis, and cuntreis of hem; for the Lord God of Israel fauyt for hym.
Joshua returneth to Gilgal.
Joshua 10:43 And he turnede ayen with al Israel to the place of tentis in Galgala.