Wycliffe Bible

John 8

Christ delivereth the woman taken in adultery.

John 8:1 But Jhesus wente in to the mount of Olyuete. John 8:2 And eerli eft he cam in to the temple; and al the puple cam to hym; and he sat, and tauyte hem. John 8:3 And scribis and Fariseis bryngen a womman takun in auoutrye, and thei settiden hir in the myddil, John 8:4 and seiden to hym, Maystir, this womman is now takun in auoutrie. John 8:5 And in the lawe Moises comaundide vs to stoone suche; therfor what seist thou? John 8:6 And thei seiden this thing temptynge hym, that thei myyten accuse hym. And Jhesus bowide hym silf doun, and wroot with his fyngur in the erthe. John 8:7 And whanne thei abiden axynge hym, he reiside hym silf, and seide to hem, He of you that is without synne, first caste a stoon in to hir. John 8:8 And eft he bowide hym silf, and wroot in the erthe. John 8:9 And thei herynge these thingis, wenten awei oon aftir anothir, and thei bigunnen fro the eldre men; and Jhesus dwelte aloone, and the womman stondynge in the myddil. John 8:10 And Jhesus reiside hym silf, and seide to hir, Womman, where ben thei that accusiden thee? no man hath dampned thee. John 8:11 Sche seide, No man, Lord. Jhesus seide to hir, Nethir Y schal dampne thee; go thou, and now aftirward nyle thou synne more.

He preacheth himself the light of the world, and justifieth his doctrine:

John 8:12 Therfor eft Jhesus spak to hem, and seide, Y am the liyt of the world; he that sueth me, walkith not in derknessis, but schal haue the liyt of lijf. John 8:13 Therfor the Fariseis seiden, Thou berist witnessyng of thi silf; thi witnessyng is not trewe. John 8:14 Jhesus answerde, and seide to hem, And if Y bere witnessyng of my silf, my witnessyng is trewe; for Y woot fro whennus Y cam, and whidur Y go. John 8:15 But ye witen not fro whennus Y cam, ne whidur Y go. For ye demen aftir the fleisch, but Y deme no man; John 8:16 and if Y deme, my doom is trewe, for Y am not aloone, but Y and the fadir that sente me. John 8:17 And in youre lawe it is writun, that the witnessyng of twei men is trewe. John 8:18 Y am, that bere witnessyng of my silf, and the fadir that sente me, berith witnessyng of me. John 8:19 Therfor thei seiden to hym, Where is thi fadir? Jhesus answeride, Nether ye knowen me, nethir ye knowen my fadir; if ye knewen me, perauenture ye schulden knowe also my fadir. John 8:20 Jhesus spak these wordis in the tresorie, techynge in the temple; and no man took hym, for his our cam not yit. John 8:21 Therfor eft Jhesus seide to hem, Lo! Y go, and ye schulen seke me, and ye schulen die in youre synne; whidur Y go, ye moun not come. John 8:22 Therfor the Jewis seiden, Whether he schal sle hym silf, for he seith, Whidur Y go, ye moun not come? John 8:23 And he seide to hem, Ye ben of bynethe, Y am of aboue; ye ben of this world, Y am not of this world. John 8:24 Therfor Y seide to you, that ye schulen die in youre synnes; for if ye bileuen not that Y am, ye schulen die in youre synne. John 8:25 Therfor thei seiden to hym, Who art thou? Jhesus seide to hem, The bigynnyng, which also speke to you. John 8:26 Y haue many thingis to speke, and deme of you, but he that sente me is sothefast; and Y speke in the world these thingis, that Y herde of hym. John 8:27 And thei knewen not, that he clepide his fadir God. John 8:28 Therfor Jhesus seith to hem, Whanne ye han areisid mannus sone, thanne ye schulen knowe, that Y am, and of my silf Y do no thing; but as my fadir tauyte me, Y speke these thingis. John 8:29 And he that sente me is with me, and lefte me not aloone; for Y do euermore tho thingis, that ben plesynge to hym. John 8:30 Whanne he spak these thingis, manye bileueden in hym. John 8:31 Therfor Jhesus seide to the Jewis, that bileueden in hym, If ye dwellen in my word, verili ye schulen be my disciplis; John 8:32 and ye schulen knowe the treuthe, and the treuthe schal make you fre.

answereth the Jews that boasted of Abraham,

John 8:33 Therfor the Jewis answeriden to hym, We ben the seed of Abraham, and we serueden neuere to man; hou seist thou, That ye schulen be fre? John 8:34 Jhesus answeride to hem, Treuli, treuli, Y seie to you, ech man that doith synne, is seruaunt of synne. John 8:35 And the seruaunt dwellith not in the hows with outen ende, but the sone dwellith with outen ende. John 8:36 Therfor if the sone make you fre, verili ye schulen be fre. John 8:37 Y woot that ye ben Abrahams sones, but ye seken to sle me, for my word takith not in you. John 8:38 Y speke tho thingis, that Y say at my fadir; and ye doen tho thingis, that ye sayn at youre fadir. John 8:39 Thei answerden, and seiden to hym, Abraham is oure fadir. Jhesus seith to hem, If ye ben the sones of Abraham, do ye the werkis of Abraham. John 8:40 But now ye seken to sle me, a man that haue spoken to you treuthe, that Y herde of God; Abraham dide not this thing. John 8:41 Ye doen the werkis of youre fadir. Therfor thei seiden to hym, We ben not borun of fornycacioun; we han o fadir, God. John 8:42 But Jhesus seith to hem, If God were youre fadir, sotheli ye schulden loue me; for Y passide forth of God, and cam; for nether Y cam of my silf, but he sente me. John 8:43 Whi knowen ye not my speche? for ye moun not here my word. John 8:44 Ye ben of the fadir, the deuel, and ye wolen do the desyris of youre fadir. He was a mansleere fro the bigynnyng, and he stood not in treuthe; for treuthe is not in hym. Whanne he spekith lesyng, he spekith of his owne; for he is a liere, and fadir of it. John 8:45 But for Y seie treuthe, ye bileuen not to me. John 8:46 Who of you schal repreue me of synne? if Y sey treuthe, whi bileuen ye not to me? John 8:47 He that is of God, herith the wordis of God; therfor ye heren not, for ye ben not of God. John 8:48 Therfor the Jewis answeriden, and seiden, Whether we seien not wel, that thou art a Samaritan, and hast a deuel? John 8:49 Jhesus answerde, and seide, Y haue not a deuel, but Y onoure my fadir, and ye han vnhonourid me. John 8:50 For Y seke not my glorye; there is he, that sekith, and demeth. John 8:51 Treuli, treuli, Y seie to you, if ony man kepe my word, he schal not taste deth with outen ende. John 8:52 Therfor the Jewis seiden, Now we han knowun, that thou hast a deuel. Abraham is deed, and the prophetis, and thou seist, If ony man kepe my word, he schal not taste deth withouten ende. John 8:53 Whether thou art grettere than oure fader Abraham, that is deed, and the prophetis ben deed; whom makist thou thi silf? John 8:54 Jhesus answeride, If Y glorifie my silf, my glorie is nouyt; my fadir, is that glorifieth me, whom ye seien, that he is youre God. John 8:55 And ye han not knowun hym, but Y haue knowun hym; and if Y seie that Y knowe hym not, Y schal be a liere lich to you; but Y knowe hym, and Y kepe his word. John 8:56 Abraham, youre fadir, gladide to se my dai; and he saiy, and ioyede. John 8:57 Thanne the Jewis seiden to hym, Thou hast not yit fifti yeer, and hast thou seien Abraham? John 8:58 Therfor Jhesus seide to hem, Treuli, treuli, Y seie to you, bifor that Abraham schulde be, Y am.

and conveyeth himself from their cruelty.

John 8:59 Therfor thei token stonys, to caste to hym; but Jhesus hidde hym, and wente out of the temple.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook