Wycliffe Bible

John 12

Jesus excuseth Mary anointing his feet.

John 12:1 Therfor Jhesus bifor sixe daies of pask cam to Bethanye, where Lazarus hadde be deed, whom Jhesus reiside. John 12:2 And thei maden to hym a soopere there, and Martha mynystride to hym; and Lazarus was oon of men that saten at the mete with hym. John 12:3 Therfor Marie took a pound of oynement of trewe narde precious, and anoyntide the feet of Jhesu, and wipte hise feet with hir heeris; and the hous was fulfillid of the sauour of the oynement. John 12:4 Therfor Judas Scarioth, oon of hise disciplis, that was to bitraye hym, John 12:5 seide, Whi is not this oynement seeld for thre hundrid pens, and is youun to nedi men? John 12:6 But he seide this thing, not for it perteynede to hym of nedi men, but for he was a theef, and he hadde the pursis, and bar tho thingis that weren sent. John 12:7 Therfor Jhesus seide, Suffre ye hir, that in to the day of my biriyng sche kepe that; John 12:8 for ye schulen euermore haue pore men with you, but ye schulen not euermore haue me.

The people flock to see Lazarus.

John 12:9 Therfore myche puple of Jewis knew, that Jhesus was there; and thei camen, not oonli for Jhesu, but to se Lazarus, whom he hadde reisid fro deth.

The high priests consult to kill him.

John 12:10 But the princis of prestis thouyten to sle Lazarus, John 12:11 for manye of the Jewis wenten awei for him, and bileueden in Jhesu.

Christ rideth into Jerusalem.

John 12:12 But on the morew a myche puple, that cam togidere to the feeste dai, whanne thei hadden herd, that Jhesus cam to Jerusalem, John 12:13 token braunchis of palmes, and camen forth ayens hym, and crieden, Osanna, blessid is the kyng of Israel, that cometh in the name of the Lord. John 12:14 And Jhesus foond a yonge asse, and sat on hym, as it is writun, John 12:15 The douytir of Syon, nyle thou drede; lo! thi kyng cometh, sittynge on an asse fole. John 12:16 Hise disciplis knewen not first these thingis, but whanne Jhesus was glorified, thanne thei hadden mynde, for these thingis weren writun of hym, and these thingis thei diden to hym. John 12:17 Therfor the puple bar witnessyng, that was with hym, whanne he clepide Lazarus fro the graue, and reiside hym fro deth. John 12:18 And therfor the puple cam, and mette with hym, for thei herden that he hadde don this signe. John 12:19 Therfor the Farisees seiden to hem silf, Ye seen, that we profiten no thing; lo! al the world wente aftir hym.

Greeks desire to see Jesus.

John 12:20 And there weren summe hethene men, of hem that hadden come vp to worschipe in the feeste dai. John 12:21 And these camen to Filip, that was of Bethsaida of Galilee, and preieden hym, and seiden, Sire, we wolen se Jhesu. John 12:22 Filip cometh, and seith to Andrew; eft Andrew and Filip seiden to Jhesu.

He foretelleth his death.

John 12:23 And Jhesus answerde to hem, and seide, The our cometh, that mannus sone be clarified. John 12:24 Treuli, treuli, Y seie to you, but a corn of whete falle in to the erthe, and be deed, it dwellith aloone; John 12:25 but if it be deed, it bryngith myche fruyt. He that loueth his lijf, schal leese it; and he that hatith his lijf in this world, kepith it in to euerlastynge lijf. John 12:26 If ony man serue me, sue he me; and where Y am, there my mynystre schal be. If ony man serue me, my fadir schal worschipe hym. John 12:27 Now my soule is troublid, and what schal Y seie? Fadir, saue me fro this our; but therfor Y cam in to this our; John 12:28 fadir, clarifie thi name. And a vois cam fro heuene, and seide, And Y haue clarified, and eft Y schal clarifie. John 12:29 Therfor the puple that stood, and herde, seide, that thundur was maad; othere men seide, an aungel spak to hym. John 12:30 Jhesus answerde, and seide, This vois cam not for me, but for you. John 12:31 Now is the doom of the world, now the prince of this world schal be cast out. John 12:32 And if Y schal be enhaunsid fro the erthe, Y schal drawe alle thingis to my silf. John 12:33 And he seide this thing, signifiynge bi what deth he was to die. John 12:34 And the puple answeride to hym, We han herd of the lawe, that Crist dwellith with outen ende; and hou seist thou, It bihoueth mannys sone to be arerid? John 12:35 Who is this mannus sone? And thanne Jhesus seith to hem, Yit a litil liyt is in you; walke ye, the while ye han liyt, that derknessis catche you not; he that wandrith in derknessis, woot nere whidur he goith. John 12:36 While ye han liyt, bileue ye in liyt, that ye be the children of liyt. Jhesus spak these thingis, and wente, and hidde hym fro hem.

The Jews are generally blinded:

John 12:37 And whanne he hadde don so many myraclis bifor hem, thei bileueden not in to hym; John 12:38 that the word of Ysaie, the prophete, schulde be fulfillid, which he seide, Lord, who bileuede to oure heryng, and to whom is the arm of the Lord schewid? John 12:39 Therfor thei myyten not bileue, for eft Ysaye seide, John 12:40 He hath blyndid her iyen, and he hath maad hard the herte of hem, that thei se not with iyen, and vndurstonde with herte; and that thei be conuertid, and Y heele hem. John 12:41 Ysaye seide these thingis, whanne he say the glorie of hym, and spak of hym.

yet many chief rulers believe, but do not confess him:

John 12:42 Netheles of the pryncis manye bileueden in hym, but for the Farisees thei knowlechiden not, that thei schulden not be put out of the synagoge; John 12:43 for thei loueden the glorie of men, more than the glorie of God.

therefore Jesus calleth earnestly for confession of faith.

John 12:44 And Jhesus criede, and seide, He that bileueth in me, bileueth not in me, but in hym that sente me. John 12:45 He that seeth me, seeth hym that sente me. John 12:46 Y liyt cam in to the world, that ech that bileueth in me, dwelle not in derknessis. John 12:47 And if ony man herith my words, and kepith hem, Y deme hym not; for Y cam not, that Y deme the world, but that Y make the world saaf. John 12:48 He that dispisith me, and takith not my wordis, hath hym that schal iuge hym; thilke word that Y haue spokun, schal deme hym in the last dai. John 12:49 For Y haue not spokun of my silf, but thilke fadir that sente me, yaf to me a maundement, what Y schal seie, and what Y schal speke. John 12:50 And Y woot, that his maundement is euerlastynge lijf; therfor tho thingis that Y speke, as the fadir seide to me, so Y speke.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook