Wycliffe Bible

Job 33

Elihu offereth himself instead of God, with sincerity and meekness, to reason with Job.

Job 33:1 Therfor, Joob, here thou my spechis, and herkene alle my wordis. Job 33:2 Lo! Y haue openyd my mouth, my tunge schal speke in my chekis. Job 33:3 Of symple herte ben my wordis, and my lippis schulen speke clene sentence. Job 33:4 The spirit of God made me, and the brething of Almyyti God quykenyde me. Job 33:5 If thou maist, answere thou to me, and stoonde thou ayens my face. Job 33:6 Lo! God made me as and thee; and also Y am formyd of the same cley. Job 33:7 Netheles my myracle make thee not afeerd, and myn eloquence be not greuouse to thee.

He excuseth God from giving man an account of his ways, by his greatness.

Job 33:8 Therfor thou seidist in myn eeris, and Y herde the vois of thi wordis; Job 33:9 Y am cleene, and with out gilt, and vnwemmed, and wickidnesse is not in me. Job 33:10 For God foond querels in me, therfor he demyde me enemy to hym silf. Job 33:11 He hath set my feet in a stok; he kepte alle my pathis. Job 33:12 Therfor this thing it is, in which thou art not maad iust; Y schal answere to thee, that God is more than man. Job 33:13 Thou stryuest ayenus God, that not at alle wordis he answeride to thee.

God calleth man to repentance by visions,

Job 33:14 God spekith onys, and the secounde tyme he rehersith not the same thing. Job 33:15 God spekith bi a dreem in the visioun of nyyt, whanne sleep fallith on men, and thei slepen in the bed. Job 33:16 Thanne he openith the eeris of men, and he techith hem, and techith prudence; Job 33:17 that he turne awei a man fro these thingis whiche he made, and delyuere hym fro pride; Job 33:18 delyuerynge his soule fro corrupcioun, and his lijf, that it go not in to swerd.

by afflictions,

Job 33:19 Also God blameth a synnere bi sorewe in the bed, and makith alle the boonys of hym to fade. Job 33:20 Breed is maad abhomynable to hym in his lijf, and mete desirable bifor to his soule. Job 33:21 His fleisch schal faile for rot, and hise boonys, that weren hilid, schulen be maad nakid. Job 33:22 His soule schal neiye to corrupcioun, and his lijf to thingis bryngynge deeth.

and by his ministry.

Job 33:23 If an aungel, oon of a thousynde, is spekynge for hym, that he telle the equyte of man, God schal haue mercy on hym, Job 33:24 and schal seie, Delyuere thou hym, that he go not doun in to corrupcioun; Y haue founde in what thing Y schal do merci to hym. Job 33:25 His fleisch is wastid of turmentis; turne he ayen to the daies of his yonge wexynge age. Job 33:26 He schal biseche God, and he schal be quemeful to hym; and he schal se his face in hertly ioye, and he schal yelde to man his riytfulnesse. Job 33:27 He schal biholde men, and he schal seie, Y haue synned, and verili Y haue trespassid; and Y haue not resseyued, as Y was worthi. Job 33:28 For he delyueride his soule, that it schulde not go in to perischyng, but that he lyuynge schulde se liyt. Job 33:29 Lo! God worchith alle these thingis in thre tymes bi alle men; Job 33:30 that he ayen clepe her soulis fro corrupcioun, and liytne in the liyt of lyuynge men.

He inclineth Job to attention.

Job 33:31 Thou, Joob, perseyue, and here me, and be thou stille, the while Y speke. Job 33:32 Sotheli if thou hast what thou schalt speke, answere thou to me, speke thou; for Y wole, that thou appere iust. Job 33:33 That if thou hast not, here thou me; be thou stille, and Y schal teche thee wisdom.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook