The promulgation of the Gospel.
Isaiah 40:1 My puple, be ye coumfortid, be ye coumfortid, seith youre Lord God. Isaiah 40:2 Speke ye to the herte of Jerusalem, and clepe ye it, for the malice therof is fillid, the wickidnesse therof is foryouun; it hath resseyued of the hond of the Lord double thingis for alle hise synnes.
The preaching of John the Baptist.
Isaiah 40:3 The vois of a crier in desert, Make ye redi the weie of the Lord, make ye riytful the pathis of oure God in wildirnesse. Isaiah 40:4 Ech valey schal be enhaunsid, and ech mounteyn and litil hil schal be maad low; and schrewid thingis schulen be in to streiyt thingis, and scharpe thingis schulen be in to pleyn weies. Isaiah 40:5 And the glorie of the Lord schal be schewid, and ech man schal se togidere, that the mouth of the Lord hath spoke. Isaiah 40:6 The vois of God, seiynge, Crie thou. And Y seide, What schal Y crie? Ech fleisch is hei, and al the glorie therof is as the flour of the feeld. Isaiah 40:7 The hei is dried vp, and the flour felle doun, for the spirit of the Lord bleew therynne. Isaiah 40:8 Verely the puple is hey; the hey is dried vp, and the flour felle doun; but the word of the Lord dwellith with outen ende.
The preaching of the Apostles.
Isaiah 40:9 Thou that prechist to Sion, stie on an hiy hil; thou that prechist to Jerusalem, enhaunse thi vois in strengthe; enhaunse thou, nyle thou drede; seie thou to the citees of Juda, Lo! youre God. Isaiah 40:10 Lo! the Lord God schal come in strengthe, and his arm schal holde lordschipe; lo! his mede is with hym, and his werk is bifore hym. Isaiah 40:11 As a scheepherd he schal fede his flok, he schal gadere lambreen in his arm, and he schal reise in his bosom; he schal bere scheep with lomb.
The prophet, by the omnipotency of God,
Isaiah 40:12 Who mat watris in a fist, and peiside heuenes with a spanne? Who peiside the heuynesse of the erthe with thre fyngris, and weide mounteyns in a weihe, and litle hillis in a balaunce? Isaiah 40:13 Who helpide the Spirit of the Lord, ether who was his councelour, and schewide to hym? Isaiah 40:14 With whom took he councel, and who lernyde hym, and tauyte hym the path of riytfulnesse, and lernyde hym in kunnyng, and schewyde to him the weie of prudence? Isaiah 40:15 Lo! folkis ben as a drope of a boket, and ben arettid as the tunge of a balaunce; lo! Isaiah 40:16 ylis ben as a litil dust, and the Liban schal not suffice to brenne his sacrifice, and the beestis therof schulen not suffice to brent sacrifice. Isaiah 40:17 Alle folkis ben so bifore hym, as if thei ben not; and thei ben rettid as no thing and veyn thing to hym.
and his incomparableness,
Isaiah 40:18 To whom therfor maden ye God lijk? ether what ymage schulen ye sette to hym? Isaiah 40:19 Whether a smyth schal welle togidere an ymage, ether a gold smyth schal figure it in gold, and a worchere in siluer schal diyte it with platis of siluer? Isaiah 40:20 A wijs crafti man chees a strong tre, and vnable to be rotun; he sekith how he schal ordeyne a symylacre, that schal not be mouyd. Isaiah 40:21 Whether ye witen not? whether ye herden not? whether it was not teld to you fro the begynnynge? whether ye vndurstoden not the foundementis of erthe? Isaiah 40:22 Which sittith on the cumpas of erthe, and the dwelleris therof ben as locustis; which stretchith forth heuenes as nouyt, and spredith abrood tho as a tabernacle to dwelle. Isaiah 40:23 Which yyueth the sercheris of priuytees, as if thei be not, and made the iugis of erthe as a veyn thing. Isaiah 40:24 And sotheli whanne the stok of hem is nether plauntid, nether is sowun, nether is rootid in erthe, he bleew sudenli on hem, and thei drieden vp, and a whirle wynd schal take hem awei as stobil. Isaiah 40:25 And to what thing ye han licned me, and han maad euene? seith the hooli.
comforteth the people.
Isaiah 40:26 Reise youre iyen an hiy, and se ye, who made these thingis of nouyt; which ledith out in noumbre the kniythod of tho, and clepith alle bi name, for the multitude of his strengthe, and stalworthnesse, and vertu; nether o residue thing was. Isaiah 40:27 Whi seist thou, Jacob, and spekist thou, Israel, My weie is hid fro the Lord, and my doom passide fro my God?
Isaiah 40:28 Whether thou knowist not, ether herdist thou not? God, euerlastynge Lord, that made of nouyt the endis of erthe, schal not faile, nether schal trauele, nether enserchyng of his wisdom is. Isaiah 40:29 That yyueth vertu to the weeri, and strengthe to hem that ben not, and multiplieth stalworthnesse. Isaiah 40:30 Children schulen faile, and schulen trauele, and yonge men schulen falle doun in her sikenesse. Isaiah 40:31 But thei that hopen in the Lord, schulen chaunge strengthe, thei schulen take fetheris as eglis; thei schulen renne, and schulen not trauele; thei schulen go, and schulen not faile.