Isaiah 35
They joyful flourishing of Christ's Kingdom.
Isaiah 35:1 The forsakun Judee and with outen weie schal be glad, and wildirnesse schal make ful out ioye, and schal floure as a lilie. Isaiah 35:2 It buriownynge schal buriowne, and it glad and preisynge schal make ful out ioie. The glorie of Liban is youun to it, the fairnesse of Carmele and of Saron; thei schulen se the glorie of the Lord, and the fairnesse of oure God.
The weak are encouraged by the virtues and privileges of the Gospel.
Isaiah 35:3 Coumforte ye comelid hondis, and make ye strong feble knees. Isaiah 35:4 Seie ye, Men of litil coumfort, be ye coumfortid, and nyle ye drede; lo! oure God schal brynge the veniaunce of yeldyng, God hym silf schal come, and schal saue vs. Isaiah 35:5 Thanne the iyen of blynde men schulen be openyd, and the eeris of deef men schulen be opyn. Isaiah 35:6 Thanne a crokid man schal skippe as an hert, and the tunge of doumbe men schal be openyd; for whi watris ben brokun out in desert, and stremes in wildirnesse. Isaiah 35:7 And that that was drie, is maad in to a poond, and the thirsti is maad in to wellis of watris. Grenenesse of rehed, and of spier schal growe in dennes, in whiche dwelliden dragouns bifore. And a path and a weie schal be there, Isaiah 35:8 and it schal be clepid an hooli weie, he that is defoulid schal not passe therbi; and this schal be a streiyt weie to you, so that foolis erre not therbi. Isaiah 35:9 A lioun schal not be there, and an yuel beeste schal not stie therbi, nether schal be foundun there. Isaiah 35:10 And thei schulen go, that ben delyuered and ayenbouyt of the Lord; and thei schulen be conuertid, and schulen come in to Sion with preisyng; and euerlastynge gladnesse schal be on the heed of hem; thei schulen haue ioie and gladnesse, and sorewe and weilyng schulen fle awei.
|
