Wycliffe Bible

Isaiah 3

The great confusion which cometh by sin.

Isaiah 3:1 For lo! the lordli gouernour, the Lord of oostis, schal take awei fro Jerusalem and fro Juda a myyti man, and strong, and al the strengthe of breed, and al the strengthe of watir; Isaiah 3:2 a strong man, and a man a werriour, and a domesman, and a profete, and a false dyuynour in auteris, and an elde man, Isaiah 3:3 a prince ouer fifti men, and a worschipful man in cheer, and a counselour, and a wijs man of principal crafti men, and a prudent man of mystik, ethir goostli, speche. Isaiah 3:4 And Y schal yyue children the princes of hem, and men of wymmens condiciouns schulen be lordis of hem. Isaiah 3:5 And the puple schal falle doun, a man to a man, ech man to his neiybore; a child schal make noyse ayens an eld man, and an vnnoble man ayens a noble man. Isaiah 3:6 For a man schal take his brother, the meneal of his fadir, and schal seie, A clooth is to thee, be thou oure prince; forsothe this fallyng be vndur thin hond. Isaiah 3:7 And he schal answere in that dai, and seie, Y am no leche, and nether breed, nether cloth is in myn hous; nyle ye make me prince of the puple. Isaiah 3:8 For whi Jerusalem felle doun, and Juda felle doun togidere; for the tunge of hem, and the fyndingis of hem weren ayens the Lord, for to terre to wraththe the iyen of his mageste.

The impudency of the people.

Isaiah 3:9 The knowyng of her cheer schal answere to hem; and thei prechiden her synne, as Sodom dide, and hidden not. Wo to the soule of hem, for whi yuels ben yoldun to hem. Isaiah 3:10 Seie ye to the iust man, that it schal be to hym wel; for he schal ete the fruyt of hise fyndyngis. Isaiah 3:11 Wo to the wickid man in to yuel; for whi the yeldyng of hise hondis schal be maad to hym.

The oppression and covetousness of the rulers.

Isaiah 3:12 The wrongful axeris of my puple robbiden it, and wymmen weren lordis therof. Mi puple, thei that seien thee blessid, disseyuen thee, and distrien the weie of thi steppis. Isaiah 3:13 The Lord stondith for to deme, and the Lord stondith for to deme puplis; Isaiah 3:14 the Lord schal come to doom, with the eldere men of his puple, and with hise princes; for ye han wastid my vyner, and the raueyn of a pore man is in youre hous. Isaiah 3:15 Whi al to-breken ye my puple, and grynden togidere the faces of pore men? seith the Lord God of oostis.

The judgments which shall be for the pride of the women.

Isaiah 3:16 And the Lord God seide, For that that the douytris of Syon weren reisid, and yeden with a necke stretchid forth, and yeden bi signes of iyen, and flappiden with hondis, and yeden, and with her feet yeden in wel araied goyng, Isaiah 3:17 the Lord schal make ballyd the nol of the douytris of Sion, and the Lord schal make nakid the heer of hem. Isaiah 3:18 In that dai the Lord schal take awei the ournement of schoon, and goldun litle bellis lijk the moone, Isaiah 3:19 and ribans, and brochis, and ournementis of armes nyy the schuldris, and mytris, ether chapelettis, Isaiah 3:20 and coombis, and ournementis of armes niy the hondis, and goldun ourenementis lijk laumpreis, and litil vessels of oynementis, Isaiah 3:21 and eere ryngis, and ryngis, and preciouse stoonys hangynge in the forheed, Isaiah 3:22 and chaungynge clothis, and mentils, and schetis, ether smockis, and needlis, Isaiah 3:23 and myrouris, and smal lynun clothis aboute the schuldris, and kercheues, and roketis. Isaiah 3:24 And stynk shal be for swete odour, and a corde for the girdil; ballidnesse schal be for crispe heer, and an heire for a brest girdil. Isaiah 3:25 Also thi faireste men schulen falle bi swerd, and thi stronge men schulen falle in batel. Isaiah 3:26 And the yatis therof schulen weile, and morene; and it schal sitte desolat in erthe.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook