Wycliffe Bible

Genesis 49

Jacob calleth his sons to bless them.

Genesis 49:1 Forsothe Jacob clepide hise sones, and seide to hem, Be ye gaderid that Y telle what thingis schulen come to you in the laste daies; Genesis 49:2 be ye gaderid, and here, ye sones of Jacob, here ye Israel youre fadir.

Their blessing in particular.

Genesis 49:3 Ruben, my firste gendrid sone, thou art my strengthe and the bigynnyng of my sorewe; thou ouytist to be the former in yiftis, the more in lordschip; Genesis 49:4 thou art sched out as watir; wexe thou not, for thou stiedist on the bed of thi fader, and defoulidist his bed.

Genesis 49:5 Symeon and Leuy, britheren, fiytynge vessils of wickidnesse; Genesis 49:6 my soule come not in to the councel of hem, and my glorie be not in the congregacioun of hem; for in her woodnesse thei killiden a man, and in her wille thei myneden the wal; Genesis 49:7 curside be the woodnesse of hem, for it is obstynat, and the indignacioun of hem for it is hard; Y schal departe hem in Jacob, and I schal scatere hem in Israel.

Genesis 49:8 Judas, thi britheren schulen preise thee, thin hondis schulen be in the nollis of thin enemyes; the sones of thi fadir schulen worschipe thee. Genesis 49:9 A whelp of lioun is Judas; my sone thou stiedist to prey; thou restidist, and hast leyn as a lioun, and as a lionesse who schal reise hym? Genesis 49:10 The septre schal not be takun awey fro Juda, and a duyk of his hipe, til he come that schal be sent, and he schal be abiding of hethene men; Genesis 49:11 and he schal tye his colt at the vyner, and his femal asse at the vyne; A! my sone, he schal waische his stoole in wyn, and his mentil in the blood of grape; Genesis 49:12 hise iyen ben fairere than wyn, and hise teeth ben whittere than mylk.

Genesis 49:13 Zabulon schal dwelle in the brenk of the see, and in the stondyng of schipis; and schal stretche til to Sydon.

Genesis 49:14 Isachar, a strong asse, liggynge bitwixe termes, Genesis 49:15 seiy reste, that it was good and seiy the lond that it was best, and he vndirsettide his schuldre to bere, and he was maad seruynge to tributis.

Genesis 49:16 Dan schal deme his puple, as also another lynage in Israel. Genesis 49:17 Dan be maad a serpent in the weie, and cerastes in the path, and bite the feet of an hors, that the stiere therof falle bacward; Lord, Genesis 49:18 Y schal abide thin helthe.

Genesis 49:19 Gad schal be gird, and schal fiyte bifor hym, and he schal be gird bihynde.

Genesis 49:20 Aser his breed schal be plenteuouse, and he schal yyue delicis to kyngis.

Genesis 49:21 Neptalym schal be an hert sent out, and yyuynge spechis of fairenesse.

Genesis 49:22 Joseph, a sone encreessynge, a sone encresinge, and fair in biholdyng; douytris runnen aboute on the wal, Genesis 49:23 but hise brithren wraththeden hym, and chidden, and thei hadden dartis, and hadden enuye to hym. Genesis 49:24 His bowe sat in the stronge, and the boondis of his armes, and hondis weren vnboundun bi the hond of the myyti of Jacob; of hym a scheepherd yede out, the stoon of Israel. Genesis 49:25 God of thi fadir schal be thin helpere, and Almyyti God schal blesse thee with blessyngis of heuene fro aboue, and with blessyngis of the see liggynge binethe, with blessyngis of tetis, and of wombe; Genesis 49:26 the blessyngis of thi fadir ben coumfortid, the blessyngis of his fadris, til the desire of euerlastynge hillis cam; blessyngis ben maad in the heed of Joseph, and in the nol of Nazarei among his britheren.

Genesis 49:27 Beniamyn, a rauyschynge wolf, schal ete prey eerly, and in the euentid he schal departe spuylis.

Genesis 49:28 Alle these weren in twelue kynredis of Israel; her fadir spak these thingys to hem, and blesside hem alle by propre blessyngis,

He chargeth them about his burial.

Genesis 49:29 and comaundide hem, and seide, Y am gaderid to my puple, birie ye me with my fadris in the double denne, which is in the lond of Efron Ethei, ayens Manbre, Genesis 49:30 in the lond of Canaan, which denne Abraham bouyte with the feeld of Efron Ethei, in to possessioun of sepulcre. Genesis 49:31 There thei birieden hym, and Sare his wijf, also Ysaac was biried there with Rebecca his wijf; there also Lia liggith biried. Genesis 49:32 {Absent from this edition.}

He dieth.

Genesis 49:33 And whanne the comaundementis weren endid, bi whiche he tauyte the sones, he gaderide hise feet on the bed, and diede, and he was put to his puple.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook