Genesis 45
Joseph maketh himself known to his brethren.
Genesis 45:1 Joseph myyte no lengere absteyne hym silf, while many men stoden bifore; wherfor he comaundide that alle men schulden go out, and that noon alien were present in the knowyng of Joseph and hise britheren. Genesis 45:2 And Joseph reiside the vois with wepyng, which Egipcians herden, and al the hows of Farao. Genesis 45:3 And he seide to hise britheren, Y am Joseph; lyueth my fadir yit? The brithren myyten not answere, and weren agast bi ful myche drede. Genesis 45:4 To whiche he seide mekeli, Neiye ye to me. And whanne thei hadden neiyed nyy, he seide, Y am Joseph youre brother, whom ye selden in to Egipt;
He comforteth them in God's providence.
Genesis 45:5 nyle ye drede, nether seme it to be hard to you, that ye seelden me in to these cuntreis; for God hath sent me bifore you in to Egipt for youre helthe. Genesis 45:6 For it is twei yeer that hungur bigan to be in the lond, yit fyue yeer suen, in whiche me schal not mow ere, nether repe; Genesis 45:7 and God bifor sente me, that ye be reserued on erthe, and moun haue metis to lyue. Genesis 45:8 Y was sent hidur not bi youre counsel, but bi Goddis wille, which made me as the fadir of Farao, and the lord of al his hows, and prince in al the lond of Egipt.
He sendeth for his father.
Genesis 45:9 Haste ye, and stie ye to my fadir, and ye schulen seie to hym, Thi sone Joseph sendith these thingis; God hath maad me lord of al the lond of Egipt; come doun to me, and tarie not, and dwelle in the lond of Gessen; Genesis 45:10 and thou schalt be bisidis me, thou, and thi sones, and the sones of thi sones, thi scheep, and thi grete beestis, and alle thingis whiche thou weldist, Genesis 45:11 and there Y schal fede thee; for yit fyue yeer of hungur ben residue, lest bothe thou perische, and thin hows, and alle thingis whiche thou weldist. Genesis 45:12 Lo! youre iyen, and the iyen of my brother Beniamyn seen, that my mouth spekith to you; Genesis 45:13 telle ye to my fadir al my glorie, and alle thingis whiche ye sien in Egipt; haste ye, and brynge ye hym to me. Genesis 45:14 And whanne he hadde biclippid, and hadde feld in to the necke of Beniamyn, his brother, he wepte, the while also Benjamin wepte in lijk maner on the necke of Joseph. Genesis 45:15 And Joseph kisside alle hise britheren, and wepte on alle; aftir whiche thingis thei weren hardi to speke to hym.
Pharaoh confirmeth it.
Genesis 45:16 And it was herd, and pupplischid bi famouse word in the halle of the kyng, The britheren of Joseph ben comun. And Farao ioiede, and al his meynee; Genesis 45:17 and Farao seide to Joseph, that he schulde comaunde hise britheren, and seie, Charge youre beestis, and go ye in to the lond of Canaan, Genesis 45:18 and take ye fro thennus youre fadir, and kynrede, and come ye to me; and Y schal yyue to you alle the goodis of Egipt, that ye ete the merow of the lond. Genesis 45:19 Comaunde thou also, that thei take waynes of the lond of Egipt to the cariage of her litle children, and wyues, and seie thou, Take ye youre fadir, and haste ye comynge soone, Genesis 45:20 nether leeue ye ony thing of the purtenaunce of youre hows, for alle the richessis of Egipt schulen be youre.
Joseph furnisheth them for their journey, and exhorteth them to concord.
Genesis 45:21 The sones of Israel diden, as it was comaundid to hem; to whiche Joseph yaf waynes, bi the comaundement of Farao, and metis in the weie; Genesis 45:22 and he comaundide twei stoolis to be brouyt forth to ech; forsothe he yaf to Beniamyn thre hundrid platis of siluer, with fyue the beste stoolis; Genesis 45:23 and sente to his fadir so myche of siluer, and of cloothis, and he addide to hem ten male assis, that schulden bere of alle richessis of Egipt, and so many femal assis, berynge wheete and looues in the weie. Genesis 45:24 Therfor he lefte hise britheren, and seide to hem goynge forth, Be ye not wrooth in the weie.
Jacob is revived with the news.
Genesis 45:25 Whiche stieden fro Egipt, and camen in to the lond of Canaan, to her fadir Jacob; Genesis 45:26 and telden to hym, and seiden, Joseph, thi sone, lyueth, and he is lord in al the lond of Egipt. And whanne this was herd, Jacob wakide as of a greuouse sleep; netheles he bileuyde not to hem. Genesis 45:27 Thei telden ayenward al the ordre of the thing; and whanne Jacob hadde seyn the waynes, and alle thingis whiche Joseph hadde sent, his spirit lyuede ayen, Genesis 45:28 and he seide, It suffisith to me, if Joseph my sone lyueth yit, Y schal go and Y schal se hym bifore that Y die.
|
